50
1 Inalin goh Apo Dios di,
“Mid mapto' ya alyonyuan un'u da'yu pakakon
an umat hinan lala'in mangihiyan hi ahawana,
ya pinakakna.
Mid mapto' goh ya alyonyuan un'u da'yu ihbut ta way pumbayad'uh utang'u.
Mu adi umat hina ti manu ay pakako' da'yu ya dumalat nan numbaholanyu!
2 Ti hidin immalia' an mangibaliw ay da'yu ya undan mi'id ayu
ta adia' tabtabolon ay da'yuh din himmapita'?
Ya undan mid abalina' an mamaliw ay da'yu?
Inilayu ahan an un anggay di hapit'u at matdu' di baybay ya wangwang,
at mun'atoyday ekan hidi!
3 Ya abalina' goh an pumbalinon hi helong ad daya
an paddungnay mahanian hi langgut.”
Nan A'un'unnud nan Baal Apo Dios
4 Nan na'abbagtun Dios ya intudunay nepto' hi hapito'
ta way ato' an mangal'alu' an mangipa'amlong hinan tatagun munlungdaya.
Ti bangunona' hi ahelhehelhelong ta donglo' nan pohdonan itudun ha"in.
5 Ya indatana' ay Hiyah panginnila'
ti hidin dengngol'uy Tuguna ya inunud'u an agguy'u nginohoy.
6 At inid'ug'uy bonog'uh nan manuplit ay Ha"in,
ya inhagang'uy angah'uh nan manipdut hi hamay'u.
Ya inyu'ulay'uy namainandan ha"in
ya nan numpanukpaandah angah'u.
7 Mu ta"on hi un umat hinay inatdan ha"in mu binadangana' hinan na'abbagbagtun Dios,
at paddungnay impa'ugtul'uy angah'u an mange'edpol hinan malgom
ti inila' an adia' mabainan.
8 Ya Hiya an Dios ya wagwagdan ha"in an mangipa'innila an mi'id di bahol'u.
At wa ay di mangidiklamun ha"in ya umalida
ta umuymi hahapiton hinan awadan di huwis.
9 Ti nan na'abbagbagtun Dios di bumadang ay ha"in.
At ngadan ay da'yuy mangalih unna' numbahol?
Mu an amin nan mumpabahol ay ha"in ya diday mapogpog
an umatdah nan nadunut an lo'ob an nun'ala'oy.
10 At an amin tu'un mundayaw ay Apo Dios ya mangun'unud hinan hapiton di baalna
ya ta"on hi un naligat di ma'at ay ditu'u an paddungnay un tu'u wah nan hehellong
ya ihamad tu'un mangedenol ay Apu tu'u,
at Hiyan Dios di pange'kodan tu'u.
11 Mu da'yun un hay apa"ian di udum an taguy nomnomnomona
ya awniat henen ninomnomyuy mama"in da'yu.
Ti hi Apo Dios di mummoltan da'yu,
at nidugah di punholholtapanyu.