44
Hi Apo Dios di Dios ya Anggay
1 Ya inalin goh Apo Dios di,
“Da'yun holag Israel an pento"uh baal'u ya donglonyu tun ibaga' ay da'yu.
2 Ha"in an Dios an nunlumun da'yu ya badanga' da'yu,
at adi ayu tuma'ot ti da'yu nongkay di pento"uh baal'u.
3 At ipa'ali' di danum hinan nun'anga' an babluyyu ta malbongday giginginnaw,
ya wagaha' nan holagyu,
at honogo' nan Na'abuniyanan an Lennawan dida.
4 At maphod di pi'taguanda an umatdah nan holo'
ya nan ma'alih poplar an ayiw hinan pingit di ginnaw.
5 At way ohan dida ya alyonay,
Hi Apo Dios di ad hakup ay ha"in.
Ya nan udum ya alyonday,
Holag da'min Jacob.
Ya nan udum ya itudo'dah ngamayday ngadan'un Dios,
ya imbilangday odoldan niddum hinan holag Israel.”
6 At hi Apo Dios an nidugah di abalinanan Baliw ya Alin nan holag Israel ya inalinay,
“Ha"in nan Dios an mi'id di te"ana ya mi'id di pogpogna,
ya mi'id di udum hi Dios ti Ha"in ya anggay.
7 Wada mah di udum hi umat ay Ha"in?
Wadada ay ya ibagayu ta ipa'inniladay ma'at hi udum hi algaw
ta mipattig di abalinandan umat hinan ina'inat'u.
8 At adi ayu nongkay tuma'ot
ti undan agguy'u tuwali inalin da'yuh din nadnoy di aat di ma'ma'at hi pidwa?
Da'yuy ihtigu' ti undan waday udum hi Dios hi un bo'on Ha"in ya anggay?
Ya immannung an mi'id di udum hi mipaddung hinan daplah an ihi'uganyu
ti Ha"in ya anggay.”
9 At an amin nan mumpun'ammah bulul ya nibahhawda
ti danen inyammada an ibilangdah nabalul ya mi'id di hulbida.
Ya nan mundayaw ay danen bulul ya umatdah nan nabulaw an agguyda inilay makulug,
at hiyanan hay umangunuh ya mabainanda.
10 Ti undan hay lagbun nan tagun mun'ammah
nan mi'id di abalinanan bulul ta dayawona?
11 Nomnomnomonyun an amin nan mundayaw ay danen niyamman bulul ya mabainanda nongkay.
At ibagayu ta ma'amungda ta humalyao' dida.
Awniat nidugah di tuma'tanda ya abainanda.
12 Nan mumbohal ya idadaana nan usalona,
ya intunguna nan bohalonah nan gimmaban apuy,
ya bumibi'ah an mummattilyu ta engganah un mapolma nan iyammana.
At gapu enen tamuana ya ma'uwaw, ya mahinaangan, ya ma"ablay.
13 Ya umat goh hinan mumpa'ot an hay ayiw di iyammana an lukudonah mahhun,
ya minalkaana ta mattig nan tigon di tagu.
Ya unna mahkay pa'otan ta maphod di tigawna an ay tagu,
ya inyuyna mahkay hinan ihinana.
14 Nan ayiw an pilionan iyamma ya nan maphod an umat hi cedar,
unu cypress, unu oak, unu bolbol,
at hiyanay itanomna ta engganah un umongol an pa'ongolon di udan.
15 Ta umongol ay ya lengngohna,
ya intungunay bongwahna ta panungunah onona ya nun'aniduana.
Ya pina'otnah bulul di bongwahna ta dayawonda.
16 At panungunay bongwah nan ayiw,
ya numpulu'anah dotag hi ihdana ta mabhug.
Ya nun'aniduana goh ta dumolnat.
17 Ya pina'otnay bongwahnah bulul ta hiyay punlu'bubanah dayawona,
ya nunluwalu goh eden inyammanan bulul an alyonay,
“He"ay dios'u, at ibaliwa' ni'.”
18 Nan mangat hi umat hina ya nakudang di nomnomda
an adida ma'awatan nan ato'atonda
ti paddungnay nahophopan di matada ta adida tigon.
19 Ya adida ahan pa'annomnomon an mi'id di alyondaan,
“Anaad ta un nanunguy bongwah nan ayiw hinan inhaang'un ma'an
ya nangipulua' goh hinan dotag
ya dayawo' di bongwahna?”
20 Mi'id damdama ti nahelngan di nomnomda,
at hiyanan paddungnay unda mangan hi dapul
ti e'koddah nan mi'id di abalinanan bumadang.
Mu mi'id hi nomnomdah alyondaan,
“Un nin ahan layah heten o'odna' an alyo' hi dios'u?”
21 Ya inalin goh Apo Dios di,
“Nomnomnomonyu date an da'yun holag Israel ti da'yuy baal'u.
Ha"in di nunlumu ay da'yu,
at badanga' da'yu an adi' da'yu aliwan.
22 Ya inaliwa' nan baholyu,
at mi'id mahkay an umat hi na'ubahan di bunut hinan helhelong hi un pinumtang.
At hiyanan mumbangngad ayun Ha"in ti paddungnay penla"u da'yu!”
23 At da'yun wad abuniyan ya mungkanta ayuh amlongyu,
ya tum'u' ayun wah tun luta,
ya ta"on un da'yun aduntuduntug,
ya da'yun inalahan,
ya a'ayiw ya ikankantayuy amlongyu!
Ti hi Apo Dios ya penla'na nan holag Jacob
ta mipattig di anabagbagtuna ay didan ma'ali goh hi holag Israel!
24 At hi Apo Dios an nunlumun ditu'u an namla' ay ditu'u ya inalinay,
“Ha"in nan Dios an nunlumuh an amin an wada,
ya Ha"in ya anggay di nangibe'lag hi ad daya ya an amin an wah tun luta.
25 Ya Ha"in goh damdamay mangibaag hinan mangalih unda propeta,
mu layahda.
At hay ato' ya adi' iyabulut an ma'at nan impa'inniladah ma'at
ya ta"on hi un nan mumba'i an itangadah nan bittuan, ya bulan, ya algaw
ya ibahhaw'u ta adi ma'at.
Ya hanan nala'eng an tatagu ya itugunday nibahhaw ta mipattig an mi'id di nomnomda.
26 Mu nan baal'un propeta ya pa'annungo' an amin di ibagada,
at alyonda ay di mipaphod ad Jerusalem ya an amin nan babluy ad Judah
ta mumbabluyda goh nan tataguh di ya pa'annungo'.
27 Ya alyo' ay goh di matdu' nan way danumna an umat hi wangwang ya lobong
ya umannung an mun'atdu'da.
28 Ya gulat goh ta alyo' ay Cyrus di mun'ap'apu ya umannung an ma'at,
at atona nan ipa'at'u.
At iyuldinan mipaphod ad Jerusalem ya nan Timplu.”