42
Nan Baal Apo Dios
1 Ya inalin goh Apo Dios di,
“Awniat umali nan pinili' an baal'un idata' hi abalinana
at Hiyay mangipa'am'amlong ay Ha"in.
Ya ipiyodol'u goh nan Na'abuniyanan an Lennawan Hiya
ta mihamad di atonan mangipanuh hinan tataguh abablubabluy.
2 Hiya ya adina it'u' unu olto'olton di hapitna
ta ma"adngol hi kalata.
3 Ya adina mamaon an putungon nan mipaddung hi bilaun na'uy an maptung
unu nan kingki an na'uy madop an adina odpon.
Mu Hiya ya badangana nan mipaligligat ta engganah unna pangabakon nan makulug.
4 Ya adi humigan mamannod hi engganah unna tigon
an nahamad di atondan mangipanuh hinan tataguh nan abablubabluy hitun luta.
Ya nan tataguh nan adadagwin babluy ya pohdonda ahan an donglon nan Uldina.”
5 Ya inalin goh Apo Dios di,
“Ha"in nan Dios an nunlumud daya ta embe'lag'u ta umat hi ambilog an tulda,
ya limmu' goh tun luta ya an amin nan wah tu,
ya Ha"in goh di nangidat hi yahyah ya nitaguan di tagu ya an amin nan matagu.
6 At Ha"in an Dios di nangayag ay He"a,
ya impapto"u He"ah nan nidugah an abalina'.
At He"ay pi'tulaga' ta ipa'annungan din inali',
at ipattigmu nan nahamad an aat'u.
At mipaddung'ah nan dilag an mamatal hi nomnom di tataguh tun luta.
7 Ya awniat He"ay maniat hi matan nan nabulaw ta tummig
ya mangibo'tan hinan paddungnay nun'ibalud an wah nan munhehellong.
8 Ha"in nan Dios an madayaw,
at nan amaphod'u ya adi' idat hi udum!
Ya ta"on un nan pundayawan nan tatagun Ha"in ya adi' iyabulut an umuy hinan bulul.
9 Undan adiyu tigon an nipa'annungda din nahhun an inali' an awniat ma'at?
At ad ugwan ya wada goh di balbalun alyo' ay da'yu ta ma'at hi udum hi algaw.”
Nan Kantan Pundayaw ay Apo Dios
10 Olom ni' ya an amin tu'un wah nan abablubabluy hitun luta ya ikantaan tu'uh Apo Dios
hi balbalun kanta ta pundayaw tu'un Hiya!
Ya middum ayun amin an wah nan baybay,
ya da'yun numpunhituh nan babluy hinan gagwan di baybay.
11 Ya da'yun numpunhituh nan mapulun,
ya da'yun numpunhituh nan babluy an neheggon hidi,
ya ta"on un da'yun holag Kedar ya oltonyun mungkanta.
Ya ta"on un da'yun iSela ya mungkanta ayuh amlongyu,
ya nuntu'u' ayuh nan tulid di duntug!
12 At an amin tu'u ya dayawon tu'uy amaphod Apo Dios,
ya impa'innila tu'uh nan nun'iyadagwin babluy hinan gagwan di baybay!
13 Ti hi Apo Dios ya umat hinan mabi'ah an tindalun umuy mi'gubat an nidugah di bungotna.
At ma"adngol di kiina,
ya ma'abbi'ah an umuyna pundamu nan buhulna.
14 Hi Apo Dios ya inalinay,
“Nadnoy an unna' didindinong.
Mu ad ugwan di pangipe'dama' hi bohol'u,
at umata' hinan babain nadatngan di puntungawana an pumkaw hi dogohna.
15 At pumpa"i' nan aduntuduntug ya nan i"itang an dudunduntug
ta mun'alangu kaymuy holo' ya ayiw.
Ya magana' nan wangwang ya an amin nan lobong.
16 Ya nan nun'abulaw ya ipangulu' didah nan dalan an agguyda eneng'engwa.
Ya pumbalino' hi mapatal nan munhehellong an awadanda,
ya nundotalo' nan nun'appuhin kalata.
Ya umat hituy ato' ti adi' inganuy dida.
17 Mu nan mange'kod hi nitaguandah nan bulul an alyonday hiyay dayawonda ya milahhinda,
at nidugah di abainanda.”
Nan ay Paddungnay Nabulawan ya Napu'itan nan i'Israel
18 Ya inalin goh Apo Dios ay ditu'un holag Israel di,
“Ihamadyun ingaon tun alyo' an da'yun nun'apu'it,
ya da'yun nun'abulaw ya pa'atiggonyu akkay tuwali.
19 Ti undan hay udum hi paddungnay na'abbulaw ya na'appu'it
hi un bo'on da'yun pinili' hi baal'u?
20 Manu ti do'ol mahkay di tinnigyu,
mu mi'id di hulbinan da'yu.
Ya manu ti waday ingayu,
mu nihimung an adiyu pohdon an donglon.
21 Hi Apo Dios ya pohdonan mattig ay ditu'un baalnan holag Israel
di amaphod nan Uldinah nan pangun'unudan tu'u.
22 Mu hay na'at ay ditu'un tataguna ya penloh di buhul tu'uy gina'u tu'u,
ya imbalud ditu'un didah nan munhehellong.
Ya mi'id di ohah mamaliw ay ditu'uh umalin bumadang.”
23 At undan mi'id ahan di ohan ditu'uh way na'adalnan ten na'at?
24 Undan hay mangiyabulut an polhon di buhul nan gina'u tu'un holag Israel
hi un bo'on damdamah Apo Dios?
Ya manu ay ma'at hana ya dumalat di adi tu'u pangunudan an tatagunah nan Uldina.
25 At hiyanan ipa'dam Apo Dios ay ditu'u nan nidugah an bungotnan ipa'wanah gubat,
at paddungnay gumiyab di apuy ta gohbonay udum ay ditu'u.
Mu adi tu'u damdama abuluton nan pohdon den ma'at an itudun ditu'u.
Ya ay paddungnay nunggohob ditu'u,
mu agguy tu'u damdama nagilat.