38
Hay Nundoghan ya Immadaogan nan Alin hi Hezekiah
(II Ki. 20:1-11; II Chron. 32:24-26)
1 Henen gutud ya nundogoh hi Hezekiah an magadyuh matoy. At immuya' an propetan hi Isaiah an hina' Amoz, ya inali' di, “Inalin Apo Dios di, Ipanuhmun amin ti adi'a mahkay pumhod. Ya mundadaan'a ti ag'agay atayam.”
2 At nunligguh hi Hezekiah hinan way dedeng, ya nunluwalun inalinay,
3 “O Apo Dios, inilam ahan an He"ay gun'u intamuan! At inat'un amin di abalina' an nangun'unud hinan pohdom!” Unat goh nalpah an inatnay umat hina ya nidugah an adi pa"edpol hi kilana.
4 Ya himmapit goh hi Apo Dios ay ha"in an hi Isaiah an inalinay,
5 “Mumbangngad'ah awadan Hezekiah, ya inalim ay hiyay, Hi Apo Dios an Dios din hi apum an hi David ya dengngolnay luwalum, ya tinnignay lugwam. At udmana anuy pi'taguam hi himpulu ta lemay tawon.
6 Ya baliwan da'a ya tun ad Jerusalem hinan nun'appuhin aton nan alid Assyria.”
7 Ya inali' di, “Hiyah te panginnilaam an ipa'annung Apo Dios nan inalinan he"a.
8 Tigom nan ma'at hi au'au an ipahunod Apo Dios hi himpuluy wakang hinan agdan an impiyamman din Alin hi Ahaz.” Palpaliwan tatagwa ya nipa'annung an himmunod nan au'auh himpulung wakang.
9 Ya unat goh immadaog hi Hezekiah ya intudo'na din ene'damnan inalinay,
“Hay nomnom'u ya
10 ya inali' di,
Undan ad ugwan an ama'entog'uy ataya'
ta umuya' mahkay hi awadan di nun'a'atoy
ta mihinaa' hidih enggana?
11 At alyo' hi un'u mahkay adi tigon hi Apo Dios
unu nan i'ibba' an tatagun nunhituh tun luta!
12 At abigabigat ya ninomnomnom'uy pamogpogan Apo Dios hi nitagua'
an umat hi apa"ian di tuldan abung nan mumpahtul hi kalnilu.
Ya nan nibayat an ma'abol an agguy nalpah ya pinutulan nan mun'obol.
13 At inlablabi' an hinolholtap din nidugah an ahihaha'it hi odol'u
an paddungnay punggimu' di layon di tungal'u.
At hay punnomnom'u ya mapogpog mahkay di nitagua'.
14 Ya adi mahkay tumuluy kila' an umat hinan gumehogehom an kalapati,
ya na"ablay mahkay di mata' an mangitatangad ay Apo Dios.
At inali' hinan luwalu' di,
Badangana' ni' ahan Apo Dios ti maligligatana'!
15 Mu hay hapito' mah?
An hiyah ne inalinan ha"in hi atona,
at ten inatna.
Ya unna' atog mumpa'ampa
an ta"on hi unna' maligligatan an molo' hi ha'it di nomnom'u.
16 Nan Tugunmu, Apo Dios, di itaguanmi ya ipaphodanmi,
at inyadaoga' ti inyabulutmun mi'tagua'.
17 Immannung an din nunholholtapa' ya numbalinom hi amaphoda'.
Ti dumalat di pamhodmun ha"in ya imbaliwa' hi atoy,
ya inaliwam an amin di bahol'u.
18 Ti nan natoy ya adi mabalin an dayawon da'a,
ya adina haphapiton di anabagtum ya amaphodmu.
Ya umat goh an adi mabalin an mundenol hinan adi maluman an pumpapto'mu.
19 Ya hay mabalin hi mundayaw ay He"a ya nan matagu an umat ay ha"in hi ad ugwan,
ya nan o'ommod ya mabalin an waday atondan mangibagah nan imbabaluydah
aat nan adi maluman an pangipapto'mu.
20 Ibaliwa' ay He"a, Apo Dios,
at ikankantamiy pundayawmin He"ah nan Timpluh enggana
an iddummin ipagangoh nan maphod di gangohnan alpa.”
21 Ya inali' an hi Isaiah hinan baal nan Alin hi Hezekiah ta bo'bo'onday ohah nan bungan di fig, ya ened'opdah nan poghan nan ali, at mapoyanan.
22 Ya inalin Hezekiah di, “Hay panginnilaa' hi unna' pumhod ta mabalin an umuya' mundayaw hinan Timplun Apo Dios?”