33
Hay Abaliwan nan Tatagud Jerusalem
1 Mahmo' ayun nama"ih udum an babluy!
Manu ti agguy ayu pay napogpog, mu la'tot at mapogpog ayu!
Mahmo' ayun nangibahhaw hi nunhahapitanyuh udum an tatagu!
Manu ti agguy da'yu linayahan pay hi udum an tatagu.
Mu hitun pangidinnganyun puma"i ya da'yu kogoh di mapa"i,
ya hitun pangidinnganyun mamalbalih udum ya da'yu kogoh di balbaliyanda.
2 At nunluwalua' an inali' di,
“Hom'on da'mi ni' ahan, Apo Dios, ti He"a ya anggay di namnamaonmi!
Ya ipapto' da'mih abigabigat,
ya ibaliw da'mih nan nidugah an numanomnomanmi.
3 Ti wa ay ta donglon nan buhulmiy hapitmu ya mumpangalayawda,
at inyal'allanah unda tigon di abalinam an mun'iwa'atda!
4 Ya nun'alamin amin di inadangyanda,
at umat hi aton di do'ol an dudun hinan nun'itanom an mi'id di ma'angang.
5 Hi Apo Dios ya na'abbagbagtu ti ad abuniyan di nunhituwana!
Mu pumbalinona tun ad Jerusalem hi nahamad di pangipanuhdah tatagu
ti nahamad di pangatna.
6 Ya Hiyay nahamad hi pange'kodan ti ibaliwna tun babluy tu'u,
ya Hiyay mangidat hi la'eng tu'u ya mangituduh nan maphod an innilaon tu'u.
At hay pundayaw tu'un Apo Dios di hiyay iyadangyan tu'u.
7 Mu awni ya un ma'at hatu
mu anakkayah an ta"on hi un nan nun'atulid an titindalu ya mumpabadangda!
Ya nan gunda hennag an mangipa'innilah lumenggopan tun babluy tu'u ya mumbangngaddan
nidugah di kiladah punha'itan di nomnomda.
8 At mi'id mahkay di lumane'le'od hinan kalata ti atata'ot.
Ti nan nahahapit an pi'yunnudan nan buhul ya imbahhawda
an ta"on hi unda do'ol di nangngol hidin inalida.
9 At minganuy tun babluy tu'u ti mun'a'leng nan nun'itanom,
ya ta"on un ad Lebanon ya paddungnay un mun'alyaw nan inalahan hidi.
Ya nan malumong an ad Sharon ya mumbalin hi mapulun,
ya ta"on hi un nan ayiw hinan inalahan ad Bashan ya ad Carmel ya mun'a'lengda.”
10 Mu tembal da'min Apo Dios an inalinay,
“Ad ugwan ya mahapul an ipattig'u nan nidugah an abalina' ya anabagtu'!
11 At an amin nan ninomnomyun aton ya mi'id di hulbina
ti nan pangatyu nongkay di ay apuy an mamogpog hinan planuyu!
12 At mun'oghob ayu ta umat ayuh nan pagat an noghob,
ya numbalin hi dapul.
13 At an amin ayun tataguh abablubabluy an wah niyadagwi unu neheggon
ya nomnomnomonyu nan ina'inat'u,
ya inabulutyun nidugah di abalina'!”
14 Nan nun'abaholan an i'ibba tu'ud Zion ya wumogwogdah ta'otda,
ya alyonday,
“Anakkayah an ten ay apuy di pummoltan Apo Dios an mi'id ah angangona!
At undan nin way ma'angang ay ditu'u?”
15 Mu inali' an hi Isaiah ay dida an wada nongkay di ma'angang ay ditu'u
an didana nan tatagun nangipa'enghan mangat hi maphod,
an hay makulug di hapitonda,
ya adida bumalbalih dumalat hi umadangyananda,
ya adida abuluton di lagbu ta atonday nappuhi,
ya nan adi midmiddum hinan munnomnom an pumatoy ya mangat hi nappuhi
16 at didana nan malenggop di nitaguanda
an paddungnay nibaliw hinan babluy an daplah di hawana!
Ya umannung an waday ononda ya inumonda!
17 At udum hi algaw ya da'yu nongkay di mannig hinan madayaw an ali an nahamad di pangatna,
ya da'yuy middum hinan nidugah an ambilog di pun'ap'apuwana an nun'iyadagwin babluy.
18 At din ta'tanyuh din hopapna ya gun mipanomnom ay da'yu ya anggay
an umat hinan ap'apun di tindalun nalpuh udum an babluy an munhengel hi buwit
an dida din wah nan ata'nang an pun'adugan hitun babluy tu'u.
19 Mu dane din mun'abungot an tatagun nalpuh udum an babluy
an nat'on di hapitdan adi tu'u ma'awatan ya mapogpogda.
20 At amangonyu adya mahkay ad Zion an babluy
an din gun tu'u a'amungan hinan punnomnomnoman tu'uh nan na'alin pundayawan tu'un Apo Dios,
ya hay mipanomnom ay ditu'u ya nan pumbalinanah nahamad ya mid al'alin punhituwan.
21 Ti hi Apo Dios an nidugah di abalinanay mumpapto' ay ditu'uh di,
ya hay ipaddungana ya nan ambilog an wangwang an adi abalinan di buhul an mamad'ang.
22 At Hiya mahkay di Ali ya mangipanuh ay ditu'un tataguna,
ya Hiyay mangibaliw ay ditu'u,
ya nan Uldinay un'unudon tu'u.
23 Mu nan buhul ya mipaddungdah nan napa"in pupul,
at an amin di inadangyanda ya pun'alan di udum an tatagu,
an ta"on hi un nan napilay ya waday pi'ya'alana.
24 Ya mi'id mahkay mangalih nan numpunhitud Zion hi un mundogoh
ti an amin di numbaholanda ya aliwan Apo Dios.