22
Hay Nipa'innilah Ma'at ad Jerusalem
1 Hiyah te impa'innilan Apo Dios hi ma'at hinan ma'alih Nundotal an Babluy an Gun Pangipattigan Apo Dios hinan Ipa'innilanah nan Tatagu. Inalinay,
“Undan hay ilungdayaanyu ta mumpapanguy ayun amin hinan atap di abungyu?
2 Ya anaad ta humelhel ayun mid poto'nah donglon?
Ti nan nun'atoy ay da'yu ya bo'on hay matadom di natayanda unu gubat.
3 Ya an amin nan mumpangipangpanguluh nan tindalum ya numpangalayawda,
mu nun'atiliwda damdama an ta"on hi unda agguy numpapana nan buhul.
Ya an amin ayun na'ah'upan an limmayaw ya tiniliw da'yu damdaman
ta"on hi un adagwiy nangipluyanyu.”
4 At hiyanan alyo' di,
“Unna' okod ta kilaa' tun i'ibba' an nun'atoy.
Ya adia' al'alu'on!”
5 Ti hi Apo Dios an nidugah di abalinana ya waday pangiyabulutanah a'atan daten nidugah an punholholtapan tu'uh
tun Nundotal an Babluy an Gun Pangipattigan Apo Dios hinan Ipa'innilanah nan Tatagu,
at hiyanan ten mid inila tu'uh aton tu'u.
At mapa"ida tun allup tu'uh tun ad Jerusalem,
ya awniat madngol di ahipopokaw an mumpabadang hinan way aduntuduntug.
6 Ti umalida nan i'Elam ya iKir an numpunlugan hi lugan di mi'gubat
ya numpuntakay hi kabayu an numpumpana ya numpunhapiaw ta gubaton ditu'u.
7 At nan malumong an numpundotal an punhabalan tu'uh tud Judah ya mapnuh lugan di buhul,
ya nan nungkakabayun titindalu ya mumpunhooddah nan way pantaw di babluy tu'u.
8 Ya pumpa"ida nan allup hitud Judah,
at mi'id di ipo"oyan tu'u.
At umuyyu mahkay alan nan almasyuh nan nihinandah nan Palasyu
an hay Ayiw an Nalpud Lebanon di Niyamma.
9 Ya tigonyu ta mahapul an mipaphod nan allup hitud Jerusalem,
at amungonyu nan danum an malpuh nan nanginnampan lobong.
10 Ya uyaponyu goh nan nipaphod an a'abung hitud Jerusalem,
ya pina"iyuy udum
ta nan batun anonyu ya inyammayuh nan napa"in allup.
11 Ya inyammayuy ahayupan di danum hinan numbattanan nan duwan allup
an malpuh nan Dadan an Ahayupan di Danum.
Mu an amin hanan pange'kodanyu ya mi'id di hulbina
ti agguy ayu ahan numpabadang ay Apo Dios an nunlumu.
Ya wan danen ma'at hi udum hi algaw ya Hiyay nunnomnom.
12 Mu binagan ditu'u tuwalih nan nidugah di abalinanan Dios
ta ikila tu'uy punlungdayaan tu'uh nan numbaholan tu'u,
ya numpamukmuk tu'u ya numpunlubung tu'uh langgut
ta ipattig tu'uy puntutuyuan tu'u.
13 Mu un ayuat goh udot umanla'anla ya immanin'inum
an mumpulpulutan hi dotag di baka ya kalnilu.
Ti alyonyuy,
“Aga tu'u akkay ta ipadah tu'un mangamangan ya mangin'inum
ti hi ma'et at matoy tu'u damdama!”
14 Ya inalin goh Apo Dios an nidugah di abalinana ay ha"in di, “Henen baholda ya adi ahan ma'aliwan hi engganah matoyda.”
Nan Ma'at ay Shebna
15 Inalin goh Apo Dios ay ha"in di,
“Umuy'an Shebna an mumpapto' hinan palasyu ta alyom ay hiyay,
16 Undan hay niyatam udot
ta mangamma'ah maphod an lubu'muh tun daplah an ilubu'an di a'ali?
17 Nomnomnomom an hi Apo Dios ya itapal da'ah niyadagwin babluy
ta hidiy ibaludam an ta"on hi un waday abalinam an tagu.
18 At umat'ah nan bola an odnanda,
ya intapal da'ah nan ongol an babluy.
At hidiy atayam ta nan ipahiyam an kalesa ya mi'id di hulbida ti mapa"ida.
At he"ay dumalat hi abainan nan ad baal ay he"a.
19 Ya anon da'ah nan nabagtun haadmu.
20 Ya ipa'ayag'uh Eliakim an hina' Hilkiah ta hiyay mihukat ay he"a.
21 At hiyay mamoltan hinan lubung di ap'apu an inlubungmu, ya nan tamum, ya nan abalinam. At hiyay paddungnay hi aman nan numpunhitud Jerusalem ya an amin hitun ad Judah.
22 Ya pumbalino' hi Eliakim hi ap'apu ta mehnod hinan ali an holag David. At nan ituguna ya ma'unud, at paddungnay nan ibo'tana ya mi'id di mangitangob, ya nan itangobna ya mi'id di mangibughul.
23 Hiya ya mihamad di pun'ap'apuwana ta umat hinan pado' an mihamad an mipado' hinan luta. At hiyay dalat di a'al'alyandan hina"ama.
24 Mu an amindan hina"ama ya nan tutulangna ya hiyay pangedenolandah mahapulda ta umat hinan hallabyan an do'ol di mihabluy an umat hi banga ya tibung.
25 Mu manuh hopapna ti umat nongkay hinan nihamad an hallabyan, mu dumalat di damot nan mun'ihabluy ya la'tot ya naguyud, at magah, ya napa"idan amin nan mun'ihabluy. Ha"in an Dios di nanapit ete.”