13
Nan Bungot Apo Dios hinan i'Israel
1 Ya inalin Apo Dios di,
“Hidi ni' ya mahnag nan ap'apuyu
at hiyanan wa ay ta himmapitda ya unudon an amin nan i'ibbadan holag Israel.
Mu la'tot ya ente'te"an danen a'ap'apun nundayaw ay Ba'al,
at hiyanan nun'a'atoyda.
2 Ti engganad ugwan ya inaynayunyun bumahobahol
ti gun ayu mun'ammah silver hi kilaw an paddungnay baka ta diday onnganyu,
ya pun'awalyu goh udot danen inyammayu.
Ya e'nongyu anuy tatagu ay danen bulul,
ya inungnguyu didan ay bakay tigawda!
3 At hiyanan udum hi algaw
ya umat ayuh nan bunut ya dulnuh nan helhelong an ag'agan ma'ubah,
ya umat ayu goh hinan dugih nan pun'ili'an,
ya ahu' an ag'aga ya niyaddib.
4 Mu Ha"in an Dios an ap'apuyu tuwali di nangibaliw ay da'yuh din nihbutanyud Egypt.
Ya un gulat at ya Ha"in di dayawonyu ya anggay
ti undan way abalinan di udum an mangibaliw ay da'yu?
5 Ha"in di gun nangipapto' ay da'yuh din awadanyuh nan mapulun
an nidugah di mun'ohab.
6 Mu hidin immuy ayuh nan ma"aphod an babluy ta pinumhod di nitaguanyu
ya nginumhay ayun Ha"in,
at inaliwana' ay da'yu.
7 At hiyanan umalia' an mangubah ay da'yu
an umat hi pangat di layon unu lepard an mumbota' hi ononah nan pingit di dalan.
8 At pumbu'li da'yun umat hi pangat di bear hi un way inlayawdah imbaluyna.
Ya ipidwa' an alyon an hay pangat'u ya umat hi pangat di layon
unu nan mun'abungot an animal hinan inalahan ta pun'a'an'u da'yu.
9 Ha"in di gun bumadang ay da'yu,
mu gulatonyun mi'buhul ay Ha"in,
at hiyanan mun'a'ubah ayu.
10 Din o'ommodyu ya inluluddan mumbagah mun'ali ay da'yu.
At uggoh mah ta abalinan nan aliyu ya a'ap'apuyun mangibaliw ay da'yu?
11 At dumalat nan bungot'u ya inyabulut'un waday aliyu,
mu dumalat damdama goh hi bungot'u ya bangngado' di nitaguana.
12 At an amin nan numbaholanyun i'Israel ya adi ma'aliwan
ti nitudo' ya nitalepon.
13 Da'yun holag Israel ya inyabulut'uy pangipaphodanyuh nitaguanyu,
mu adiyu pohdon.
At umat ayuh nan ung'ungngan adina pohdon an bumuhu' hi putun inana
ti nangohoy an agguy nanomnoman.
14 Mu baliwa' da'yuh nan aligatanyu,
ya hinan lubu'yu,
ya hinan atayanyu.
At adi ayu tuma'ot hi atoy ti adi mahkay mabalin an matoy ayu.
Mu adi' damdama da'yu igohgohan
15 an ta"on hi un da'yuy adangyan ya un nan udum.
Mu Ha"in an Dios ya ubaho' da'yu
an umat hi pangat di addib an lumahu ta mamaganan an amin di obobyu,
ya mi'addib an amin nan gina'uyu.
16 Ya ta"on un nan i'ibbayun iSamaria ya mamoltada,
at mun'a'atoydah nan gubat an dumalat hi nan'ugandan Ha"in.
Ya ta"on un nan u'ungungan imbabaluyda ya a'ahawada
ya punhaplat nan buhulda dida ta engganah unda mun'atoy,
ya mun'abughiy putun nan numpunhabi.”