3
Hay Luwalun Habakkuk
1 (v 1, 19b) Ha"in an hi Habakkuk an propeta ya hiyah te luwalu', ya hay intud'a' ya nan ap'apun di muntudtuduh kanta. Ya mahapul an hay aat di ma'alih shigionoth di usalonyuh unyu tukalon nan waday gadengnan umat hinan gitala. Ya inali' di:
2 “He"an Apu an Dios, dengngol'uy aatmu,
at manoh'aa' an amin hinan inatmu!
Mu ta"on ni' un'a bumobohhol ya hom'on da'mid ugwan ta atom nan umipanoh'a
an umat hidin inatmuh hopapna ta ibaliw da'mi!
3 He"an Dios an na'ahhamad ya impattigmuy aatmun da'mid Teman,
ya umat goh hinan Duntug an Paran,
ya immannung an nan benang di anabagbagtum,
ya hinophopanad abuniyan,
ya He"ay dinayaw an amin nan tataguh tun abablubabluy hitun alutaluta.
4 Nunheglay benangmun humili
an umat hinan ma"aphod an benang nan algaw an bumuhu' hi helhelong,
ya nan potang ya malpuh nan ta'laymu
an hiyay awadan nan nidugah an abalinam.
5 Impiyalim nan numbino'ob'on an dogoh,
at nun'atoyda nan tatagu.
6 Ya wa ay ta tuma'dog'a ya umalyog tun luta,
ya wa ay goh ta amangom nan babluy ya gumayonggong nan tatagu.
Ya wa ay ta dumalan'ah nan aduntuduntug ya mun'egdayda,
mu nan nidugah an abalinam ya adi kumapuy an un hihidyay aatna.
7 At tinnig'u nan tatagud Cushan ya ad Midian an wumogwogdah ta'otda.
8 Apu an Dios, undan hay bungotmuy dimmalat hi nanaplatam hinan wangwang ta dimminong?
Ya undan goh dimmalat hinan bungotmuy nanaplatam hinan baybay ya un matob'a'?
Bo'on! Manu ay ti unmu impa'ali nan mangibaliw hinan tatagum!
9 Nan nidugah an abalinam ya umat hinan pana an mepto' hinan luta ti paddungnay manga',
at mawaday numbino'ob'on an wangwang.
10 Ya wa ay ta tigon da'ah nan aduntuduntug ya wumogwogda,
ya gun mumbungug nan dalluyun hinan baybay an hin'alinaan immongol an tumulu.
11 Ya nan bulan ya algaw ya dimminongda
ti hinanian di benang nan nidugah an umanelat an panam ya nan gayangmuh nan egayanganda.
12 Hay nundalanam hitun luta ya nidugah di bungotmu,
at hiyanan nun'igatigatinmu nan tataguh tun abablubabluy.
13 Mu hay immaliam ya imbaliwmu nan tatagum an pento'mu,
ya numpatoymuy a'ap'apun nan numbino'ob'on an tatagun nun'appuhiy pangatda,
at inaanmuy abalinanda an ayda nabladan.
14 Ya ginayangmu nan a'ap'apun nan tindalu an nan gayangday inusalmu,
ya himbumaggay inatdan immalin nangubat hinan tatagum ta nun'iwa'at ami,
ya undaat goh udot umamlong hi nangabakandah nan mi'id abalinanda.
Mu agguy na'at ti pinanam nan a'ap'apun nan tindalu an nan panaday inusalmu.
15 He"a ya impa'wam nan kabayum hinan baybay an nunheglay dalluyuna.
16 Ya unat goh dengngol'un amin hana ya mumpagpag di puhu',
ya pumalewpew di timid'uh ta'ot'u,
ya limmungtuy di odol'u,
ya ta"on di hu'i' ya ahigagayonggong,
at hiyaat un mi'id di olog'un tuma'dog.
Mu un'u anuhan an hohoddon di pummoltaam, Apo Dios, hinan binuhulmin nangubat ay da'mi.
17 Ya ta"on hi un adi humabung nan ayiw an fig,
ya ta"on goh hi un adi bumunga nan greyp ya nan ayiw an olibo,
ya nan mihabal ya ta"on hi un napuh di paguy,
ya mi'id ah kalnilu ya bakah nan kolal,
18 mu mun'am'amlonga' damdama an mangidaydayaw ay Apo Dios an namaliw ay ha"in!
19 (v 19a) Immannung an nan na'abbagbagtun Dios ya Hiyay mangidat hi bi'ah'u,
ya ihamadnay panalimunah nan pangigatina'
an umat goh hinan pangigatinan nan ulha ta mabalin an ti'ido' nan duntug.”