32
Hay Ebel hi Miyebel hinan Alid Egypt
1 Hidin hopap di algaw hidin miyapulu ta duway bulan eden miyapulu ta duway tawon hi niyayanmid Babylon ya inalin goh Apo Dios ay ha"in di,
2 “Ezekiel, agam ta ibagam goh tun ibaga' hinan alid Egypt an alyom di,
Hay punnomnommu ya ta'tan da'ah abablubabluy ti mabungot'an umat'ah nan layon,
mu hay makulug ya umat'ah buwayan mi'id di abalinana
an un hay mangib'ibul hinan danum ya anggay.
3 Ti Ha"in an nan na'abbagbagtun Dios ya alyo' di,
Honogo' di do'ol an tatagu ta paddungnay hidu'on da'a,
ya inda'al da'a.
4 Ya impitapal da'ah nan mamaga,
ya inyayag da'ah nan ahamuhamuti ya nan animal hi inalahan ta onon da'a.
5 Ya pun'iwa'at'uh nan aduntuduntug ya hinan numpundotal
nan ma'angang an lamohmu.
6 Ya etmog tun lutay dalam,
ya umayuh di udum hinan aduntuduntug ta umuy hinan wangwang.
7 At henen pangubaha' ay he"a ya homelong di nunlene'woh
ti hophopa' hi bunut ad daya ta mahawanan nan bittuan, ya bulan, ya algaw.
8 Ya hawana' nongkay ad daya ta homelong an amin tun luta.
Ha"in an na'abbagbagtun Dios di nanapit ete.
9 Ya mumbalin'ah balud hinan babluy an agguymu in'innila,
at nan tataguh udum hi babluy an mangngol eten ma'at ay he"a ya nunheglay ta'otda.
10 Ya muntembag heten ma'at ay he"a,
at numanomnomdan nen donglonda.
At paddungnay hinu'nut'u ay nan hanggap'u,
ya umogyat nan a'alih udum an babluy hi ta'otda
ti ita'otda goh damdamay nitaguanda.
11 Ti Ha"in an na'abbagbagtun Dios di mangalih
umali nan alid Babylon an munhahanggap ta patayon da'a.
12 Ti umalida nan mun'abungot an titindaluna ta patayondan amin nan tatagum,
ya numpa"idan amin nan wah nan babluyyun ipahiyayun i'Egypt.
13 Ya ipapatoy'un amin nan animalyun wah nan neheggon hinan way buhu'an di danum an umat hi baka,
at mi'id mahkay di tagu unu animal hi gun manganibul hinan danum.
14 Ya pumbalino' mahkay nan danum hi mapaganah,
ya maphod di umayuhana.
Ha"in an na'abbagbagtun Dios di nanapit ete.
15 Ya hitun a'atan date hi apa"ian ad Egypt ya matoy an amin di wah di,
at mumbalin hi mi'id di hulbinah nen babluy.
Ya hiyah ne mahkay di panginnilaan nan ma'angang an Ha"in di immannung an Dios.
16 Ya heten nipa'innilan ma'at ay dida ya awniat iyebel nan binabain malpuh udum an babluy hitun apa"ian an amin di wad Egypt. Ha"in an Dios di nanapit ete.”
Nan Lubu' di Nun'atoy
17 Ya hidin miyapulu ta duway tawon eden hopap di bulan hi miyapulu ta lemay algaw hi niyayanmid Babylon ya inalin goh Apo Dios ay ha"in di,
18 “Ezekiel, agam ta ipattigmun munlungdaya'an mangipa'innila an hanan i'Egypt ya matoyda, at umuydah awadan din tatagun nundongol di aatda, mu napogpogda, at immuydah di.
19 Ya alyom goh ay diday, Undan hay punnomnomyu ya maphod di aatyu? Ti ta"on hi un da'yu ya matoy ayu ta umuy ayuh awadan nan nun'atoy an agguy nibilang hi tatagu'.
20 Ya adi ayu melwang an i'Egypt ti nidadaan nan buhulyun mumpamatoy ay da'yun amin.
21 At awniat alyon nan nun'ahhun an nun'atoy an a'ap'apun i'Egypt ya nan udum an bimmadang ay dida di, Maphod ta immali ayuh tu ta middum ayun da'min natoy hidin gubat an agguy nibilang hi tagun Apo Dios!
22 Ya ta"on hi un nan i'Assyria ya wah didan amin hinan titindaludan natoy hi gubat.
23 At an amin din ta'tan di abablubabluy an natoy hinan gubat ya wah didan nun'ilubu'dad dolom.
24 Ya din neheggon ad Assyria an i'Elam ya mata'tanda goh, mu hidin nun'atoydah gubat ya immuydad dolom, at nabainanda goh aya.
25 At niddum nongkay din nun'atoy hi gubat an agguy nibilang hi tagu'. Ya ta"on hi un ni' ta'tan nongkay di abablubabluy dida mu nabainanda nongkay ti wah didad dolom hi awadan di nun'atoy.
26 Ya wah di goh nan iMeshek ya iTubal an didan amin hinan titindaludan nun'atoy hi gubat an nilubu'dah did dolom an niddumdah nan agguy nibilang hi tagu'. At ta"on hi un ta'tan ni' di abablubabluy dida
27 mu ninganuy di odoldah din natayanda an adi umat hidin nun'atulid an titindalun maphod di nilubu'anda an impunganda nan hanggapda, ya niyuhun hi odolday hapiawdan bo'on goh tagu'. Ya dida goh din tina'tan din tataguh abablubabluy.
28 Ya umat goh hinay ma'at ay da'yun i'Egypt hi un ayu matoy an middum ayuh nan tatagun nun'abaholan an nun'apatoy hinan gubat.
29 Ya ta"on goh hi un nan i'Edom ya wah didan amin hinan a'alida ya nan udum an a'ap'apuda an natoy hi gubat. Wah didad dolom an niddumdah nan agguy nibilang hi tagu'.
30 Ya umat goh hinah nan a'ap'apun di wah appit di iggid hi un hagangon di buhu'an di algaw, ya nan iSidon ya wah didad dolom an ta"on hi un dida din mata'tan hidin hopapna an niddumdah din nun'atoy hi gubat, at nabainanda.
31 Mu din alid Egypt an didah din tatagunan nun'atoy hi gubat ya ma"am'amlongda ti muntitiggawanda, ya bo'on dida ya anggay di immuy hidi. Ha"in an na'abbagbagtun Dios di nanapit ete.
32 At ta"on nongkay hi un'u inyabulut ta tina'tan din abablubabluy didah din awadandah tun luta mu matoyda goh ta umuyda middum hinan i'ibbadan natoy hi gubat hi awadan din nun'atoy an agguy nibilang hi tagu'. Ha"in an Dios di nanapit ete.”