☰ Ezekiel 1
Ezekiel
Hay Aat Ten Liblu
Hay Nangitudo' eten Liblu: hi Ezekiel.
Hay Nangitud'an Ezekiel eten Liblu: nan Hudyud Babylon.
Hay Pohdon nan Ngadan ten Liblun Ibaga: hi Apo Dios di mangipabi'ah.
Hay Gutud hi Nangitud'anan ten Liblu: hidin numbattanan di 593 B.C. hi engganah din 570 B.C.
Hay Teman ten Liblu: mipa'innilah nan Hudyun himbut hi ad Babylon nan na'na'at hinan babluydad Judah eden timpu ti moltaon Apo Dios didah di, mu mahapul an innilaonda goh an mipabagtu nan babluy ad Israel hi udum di gutud.
Hay Outline ten Liblu:
Hay NAꞋAYAGAN nan nangitudo' eten liblu (1:1—3:27)
Hay MENSAHEN nan nangitudo' eten liblu (4:1—48:35)
Hay mensahen Ezekiel an intudunah din agguy pay napa"ian nan babluy ad Jerusalem (4:1—24:27)
Hay numbino'ob'on an mensahen intudunah nan miyaleman tawon an din 593-592 B.C. (4:1—7:27)
Hay numbino'ob'on an mensahen intudunah nan miyonom an tawon an din 592-591 B.C. (8:1—19:14)
Hay numbino'ob'on an mensahen intudunah nan miyapitun tawon an din 591-590 B.C. (20:1—23:49)
Hay numbino'ob'on an mensahen intudunah nan miyahiyam an tawon an din 588 B.C. (24:1-27)
Hay mensahen Ezekiel an intudunah nan abablubabluy eden timpu (25:1—32:32)
Waday intudunah nan i'Ammon (25:1-7)
Waday intudunah nan iMoab (25:8-11)
Waday intudunah nan i'Edom (25:12-14)
Waday intudunah nan iPhilistia (25:15-17)
Waday intudunah nan iTyre (26:1—28:19)
Waday intudunah nan iSidon (28:20-26)
Waday intudunah nan i'Egypt (29:1—32:32)
Hay mensahen Ezekiel an intudunah ma'at hi udum di gutud (33:1—48:35)
Hay aat di pi'taguan nan tataguh udum di gutud (33:1-33)
Hay aat di mumpahtul hinan tataguh udum di gutud (34:1-31)
Hay aat di i'Edom hi udum di gutud (35:1-15)
Hay aat di aduntuduntug hi udum di gutud (36:1-38)
Hay aat di babluy ad Israel hi udum di gutud (37:1-28)
Hay aat di mi'gugubat hinan Hudyuh udum di gutud (38:1—39:29)
Hay aat di Timplun Apo Dios hi udum di gutud (40:1—43:27)
Hay aat di u'upihyal hi udum di gutud (44:1-31)
Hay aat di lutah udum di gutud (45:1-12; 47:13-23)
Hay aat di e'nong hi udum di gutud (45:13—46:24)
Hay aat di wangwang hi udum di gutud (47:1-12)
Hay aat di atribotriboh udum di gutud (48:1-29)
Hay aat di pantaw ad Jerusalem hi udum di gutud (48:30-35).
1
Hay Nahhun an Nipa'innila ay Ezekiel hi Aat di Anabagtun Apo Dios
1-3 Hidin nuntawona' hi tulumpulu ta han opat an bulan ya han lemay algaw* ya ha"in an hi Ezekiel an padin hina' Buzi ya ni'hituwa' hinan pingit di Wangwang† an Kebar hi ad Babylon an nunhituwanmin napakak an ay balud. Ya paddungnay nun'enapa', ya niluwat ad abuniyan, ya tinnig'uh Apo Dios. Ya hidiy ni'hapitan Apo Dios ay ha"in, ya na'ela' nan abalinana. (Ya heden gutud ya hiyay miyaleman tawon hi nekakan nan alid Judah an hi Jehoiachin.‡)
4 Ya unat goh tinangad'u ya tinnig'u din mabi'ah an puo' an nalpuh appit hi iggid hi un hagangon di buhu'an di algaw an umila'ilat hinan way ma'ugtul an bunut, ya nale'woh goh hinan ma"abnang an dilag. Ya heden gagwan di ma'ugtul an bunut ya waday humilin ay gumo', 5 ya tinnig'uh di an wadaday opat an matagun§ umat hi taguy tigawda, 6 mu nahin'o'pat di angahda ya paya'da. 7 Ya nan hu'ida ya ma'andong, mu nan dapanda ya umat hi dapan di uyaw an bakan waday u'ubda, ya humili an umat hi gambang. 8 Ya wada goh di ngamayda an umat hi ngamay di tagu an nepong hinan ampan di paya'da. Ya an aminda nongkay ya waday angahda. 9 Ya numpuntummu' nan hindudwan paya'da. Ya wa ay di ayanda ya malalammungda, ya iya'andongdan umuy an adida munhighiggung.
10 Ya hay aat di angahdan hinohha ya numbino'ob'on ti nan wah hinagangda ya umat hi angah di tagu, ya nan niyappit hi agwanda ya umat hi angah di layon, ya nan niyappit hi iggidda ya umat hi angah di baka, ya nan niyappit hi bonogda ya umat hi angah di agila.* 11 Ya na'u'uyad an nita'nang di duwah nan paya'dan hinohha ta nun'itumu' hi paya' nan nedelhanda. Ya nan hindudwa goh an paya'da ya hiyay nanophopdah odolda. 12 Ya an aminda ya iya'andongdan umuy hinan numbino'ob'on an pohdon Apo Dios an pangipluyan an adida ahan nongkay munhighiggung. 13 Ya hay tigaw daden opat an matagu ya unda ay gumelageladaw ya umila'ilat. 14 Ya mabi'ahdan buminangngadan an umatdah nan ilat an un himbumagga.
15 Ya hinamad'un tinnig danen opat an matagu, ya waday hinohhan pilid hinan dellohda. 16 Ya umat hituy aat danen pilid an umela'elat an umat hinan nanginan batun ma'alih chrysolite,† ya numpapaddung di aatdan hinohha. Ya wada goh di hinohhan mamanmannog an piliddan nibalangon hinan gagwan di hinohhan o'ong'ongngol an pilidda.‡ 17 At mabalin an ipluy nan pilid hinan pangipluyan nan opat an matagu an adi gahin un munlewong. 18 Ya manoh'aa' hidin nanniga' ti nan gumo' an nun'iyunudan din pilid ya ata'nang, ya nun'abut an paddungnay nun'amataan di nunlene'woh.§
19 Ya wa ay ta mahlig danen opat an matagu ya mi'ihlig goh daden pilid, ya wa ay goh ta tumayapda ya mitnudda goh. 20 Ya gulat ta way pohdon Apo Dios hi pangipluyan ay daden matagu ya mitnud goh nan pilid ti Hiyay okod. 21 At wa ay ta umiwi nan opat an matagu ya mi'yiwi goh nan pilid, ya wa ay ta duminongda ya mi'dinongda goh, ya wa ay ta tumayapda ya mi'tayapda goh, ti hi Apo Dios di mummandal ay didan amin.
22 Ya nan bagtun di ulun nan opat an matagu ya umipanoh'a ti waday umat hi atap an munletaa' an umat hinan nanginan batun ma'alih crystal.* 23 Ya wah dida nongkay nan opat an matagu an pinapayadday hindudwan paya'da, ya nan hindudwa goh an paya'day nanophopdah odolda. 24 Ya wa ay ta tumayapda ya madngol'u nan gangoh di paya'da an umat hi gongaah di danum hinan baybay, ya umat goh hi gehom di do'ol an tindalu, ya umat goh hi alin Apo Dios an nidugah di abalinana. Ya wa ay ta adida tumayap ya mati'lup nan paya'da.
25 At hidin himmapitan Apo Dios hidih nan ay atap an wah nan bagtun di uluda ya tini'lupday paya'da ta donglonda, 26 ya intangad'u, ya wada han umat hi umbunan di ali an hay niyamma ya nan nanginan batun ma'alih sapphire.† Ya wada han umat hi tagu an inumbun eden umbunan 27 an umat hinan lumetaletaa' an gumo' an wah nan gagwan di gumelageladaw an apuy di gitangna ta engganah uluna. Ya umat hi apuy di mete"ah nan gitangna ta engganay dapana, ya waday ma"abnang hi nunle'woh ay Hiya, 28 ya hinan nunlene'woh ay Hiya ya umat hi abungalngal.
Hanan tinnig'u ya umat hinay aat di anabagtun Apo Dios. At hidin tinnig'uy aatna ya nunnaudo' an nunluung. Ya hin'alina ya wada goh han dengngol'un himmapit,
* 1:1-3 Ete"an nan holag Aaron an mumpadih unda muntawon hi 30 (Num. 4:3), ya ta"on un adi mabalin ay Ezekiel an mumpadih nan Timplun Apo Dios ad Jerusalem ti magadyuh an mapa"i mu waday impatamun Apo Dios ay hiya damdama eden ustuh tawona. † 1:1-3 Hiyay ongol an ala' an nipalpuh nan Wangwang an Euphrates, at paddungnay wangwang di tigawna an ta"on un bo'on immannung an wangwang. ‡ 1:1-3 Inyuy nan iBabylon nan Alin hi Jehoiachin (December, 598-March 16, 597 B.C.) ad Babylon hidin 597 B.C., ya hi Ezekiel di ohan ni'yuy ay hiya. § 1:5 Diday ma'alih cherubim hinan Ezek. 10:2, ya hay tronon Apo Dios ad abuniyan di puntamuanda. * 1:10 Nan opat an angah ten cherubim ya umat hinan nilatlatuh nan opat an bantilan da Judah ay Reuben, ya da Ephraim ay Dan (bahaom nan footnotes di Num. 2:1, ya Num. 2:10, ya Num. 2:18, ya Num. 2:25). † 1:16 Hay kololna ya umat hi balitu'. ‡ 1:16 Hay ituduna ya nan aat Apo Dios an wagwadan amin hi logom. § 1:18 Hay ituduna ya nan aat Apo Dios ti titiggonan amin. * 1:22 Hay kololna ya mumpaha'. † 1:26 Hay kololna ya blue.
☰