1 Ikowan mo so nonta ira emati shitan ey mesepol la pati‐en sha sota ira toray ni gobirno, tan mesepol la esagana iren ontolong no ngarantoy mapteng nga kasapolan ni eshom. 2 Ikowan mo ngo son si‐kara ey ngaaw i penomang ni eshom, tan aliẃen ira mekibekbekal; no diket say mapteng nga dag‐en sha koma, mankombaba ira, ja eg sha ipilit i kostora shi kompormin too.

3 Mesepol la sajay komay nemnem tayon emati, ta angken si‐katejo nonta eg kito pay laeng emati, makedsel kito ngo, jet tayoka sopngila ngo i kowan nen Apo Shiyos, jet imonod kito pay nodta aliẃen koston pangkep. Istay ya naydowam kito pay ya mandeka ni pipiyan tayo, angken sota ngaaw wa daddadsak, ja istay eg tayo mebedinan na isalsheng nontan. Ngaaw nontan i pangkep tayo ni olay; kitoka man‐i‐inapal tan man‐i‐inoges. Tan kaibilang ni eshom ma too ey edogit sota aramid tayo nontan. 4 Nem si Apo Shiyos, ja mengisedakan, inpa‐sas toy ka‐anos to tan semek to, 5 ni insalakan tokito so. Jet sajay ya dingka to son si‐katejo, aliẃen sobadit ni kompormin mapteng ja dingdingka tayo, no diket dingka to iyay ta ebadeg i kaasi to son si‐katejo. Inomas toy basol tayo, tan inpan‐iyan to pay sota Ispirito Santo to son si‐katejo; isonga ẃara ma son si‐katejo i badon biyag, ja singa ikay‐anak kito. 6 Saja inpan‐iyan ton Ispirito Santo to son si‐katejo, si‐katoy on‐anay ni kasapolan tayo, jet sajay ya Ispirito Santo ket in‐akan to son si‐katejo pangkep so nen Jesucristo ja engisedakan son si‐katejo. 7 Jet sota kaasi to, sotan i epakaẃanan ni basol tayo et isonga kinosto‐an tokito, say mekila‐kam kito ngo nonta biyag ja tayoka namnama‐a ja enshiy to engintegan. 8 Enshiy en panshowashowa‐an niyay ya inkowan ko la; sigorado.

Isonga sajay den inkowan ko, piyan kon sotan i i‐adok mon itoro, say sota ira emati so nen Apo Shiyos, topogen shen mapteng i dagdag‐en sha, ta sajay den ogadi, ebadeg met laeng i itolong to son si‐kara, tan shi panmaptengan ni eshom. 9 Nem mesepol la eg ka mekibibiyang nonta enshiy silbi ton tabtabtabal maypangkep ni rilihiyon, ono sota pamati ja maypangkep ni ngarangaran ni ap‐apo sha la, jet kareka mekibekal ono mekisongbat ni maypangkep nonta bilin ni Hodiyos nonta bayag da, ta sotan na pesing, enshiy silbi to, enshiy to itolong. 10 Sota toon mengi‐kan ni pansisi‐janan ni emati, banshaanim nin ni pilmiro, jet no eg to ibjagan, pinshowam ma banshaanan. Nem no iso met laeng, kareka ma mekibiyang son si‐kato, 11 ta dimagsheng ja eg mebidin sotan na too, jet sotan na basol to i keshosa‐an to met laeng.

12 No ibetkag ko la si Artimas son si‐kam, ono si Tikiko, dagam i kabaalan mo ja ondaw shi Nikapolis, ta say planok, man‐iyanak nin shiman no timpo ni teg‐in. 13 Dagam i kabaalan mo ja ontolong so nen Sinas ja abokaro, tan si Apolos ni ida‐jat sha shi daẃan sha. Jet asas mo no ẃaren emin i mesepol sha. 14 Sota kait tayon ematid tan, ikowan mo son si‐kara ey mesepol la osalen shay emin na akew shen ontolong ni olay so nonta ira makasapol ni tolong.

15 Emin ira sota ematin ẃared jay, piyan shen pekikowan kod ja solat koy semek sha son si‐kam. Jet ikowan mo ngoy semek mi so nonta ira kait tayod pamati shitan.

Sota kaasi nen Apo Shiyos ja ẃara son si‐kayo, sapay koma ta ma‐ma‐shoman son si‐kayon emin.