6
1 Iyay pay i piyan kon ibilin son si‐kam ja pesing ni baga‐en. Mesepol la rispito‐en shen pasiya sota ira apo sha, ja aliẃen sinsinan, say sota ngaran nen Apo Shiyos, tan mapteng nga toro pangkep son Cristo, eg damsisen ni eshom.
2 Sota baga‐en ja emati son Cristo i apo to, eg to koma nemnemnemen ey angken eg to pati‐en sotan na apo to ta naybilang ey agi tod pamati. Mesepol la singpeten to ngo eshan ja mansilbi so nonta apo to. Man‐obden kosto, ta say onkon‐od nodtan na obda to, kait ton emati, ta si Apo Shiyos, nan‐inges i semek to son si‐karen showa.
Ka‐onoran na togon
Iyay pay i piyan kon itorom tan i‐adok mo shita toom.
3 No ẃaray eshom ma toon apil i toro to, ja aliẃen inges to iyay ya mapteng nga toro ja edapo so nen Apo Jesucristo, ja eg mengitoshong ni eshiyosan na nemnem,
4 sotan na too, edastog, enshiy amta to. Sotan na toro to, si‐katoy emengi‐kan ni kolo ja pansosongbatan, ono panbabakalan maypangkep ni esel bengat. Jet say pantongpalan niyay, apal, bonget, kesekitan ni nemnem ni eshom, tan eg panpipiniyal.
5 Sajay pay i mengi‐kan ni pansosongbatan ni toon kolang i shaka pannemnem, ja eg maka‐awat ta pasiya ni maypangkep ni podno. Agdalo sota toon say ẃared nemnem sha, kowan sha ey panbaknangan i pamati son Cristo.
6 Nem say pamati, ebadbadeg ngo eshan i itolong to son si‐katejo, no mepnek kito ni kasesaad tayo.
7 Ta nonta inkay‐anak tayo shiya dobong, enshiy tayo di inta‐jon et no metey kito ngo, enshi met laeng i tayo ita‐jon.
8 Isonga no ẃara et i kenen tayo, tan ebaro‐an kito, mepnek kito; eg tayo koma toy‐an.
9 Nem sota toon baknangan toy toka nemnemnema, inam‐ay ya ma‐eẃis ja mandeka ni angken nganton ngaaw. Jet emesaol la mengamkam ni ka‐iri‐irin ja enshiy silbi to. Anongosto ma ey sotan met laeng i emengi‐kan ni kesheshalan to, ta mepilshi ingkatod ingka.
10 Jet sota pengamkam ni pilak, si‐katoy panshoki‐i ni emin na ngaaw. Agpayso ey sota ira eshom ma engamkam ni pilak, inbi‐jag sha may pamatira. Nem anongosto ma ey ensakit i nemnem sha, ta naydaw‐an iren pasiya nodtan na dingkara.
11 Nem si‐kam Timoteo, ja too nen Apo Shiyos, araẃi‐im ma emin sota ngaaw wa ogadi ja inkowan ko la. Jet say nemnemen mo, sota kinashonong, sota eshiyosan na nemnem, sota pangkep ni pamati son Apo Jesus, sota semek mo ni totoo, sota pengitoded mo ni digat, tan sota kina‐anos mo.
12 Dagam i kabaalan mon man‐obda maypangkep nonta pamati, tan nemnemnem mo sota i‐awat nen Apo Shiyos son si‐kam ja biyag ja enshiy to engintegan. Si Apo Shiyos i mismon enotok son si‐kam, tan engi‐kan nontan na biyag son si‐kam, nonta engikowanan mod karakdan ey emati ka. Jet eshakel nontan i engitneng.
13-14 Iyay i ibilin ko son si‐kam Timoteo, jet si‐katoy nemnemnemen mo. Ta si Apo Shiyos, tan si Jesucristo, shakitoka os‐osshongi ni olay. Si Apo Shiyos, si‐katoy engi‐kan ni biyag so ni emin na palsowa et si Cristo Jesus, nonta simango so nen Pontio Pilato, inkowan toy podno. Jet say bilin ko, sajay. Emin sota bilin da ja nay‐awat son si‐kam, onod mon emin, karam dabdabsan i eshom. Jet sotan ni olay ingkatod imotok ali nen Apo tayo ja si Jesucristo.
15 Jet si Jesucristo, ondaw ali shi koston timpo to ja insagana nen Apo Shiyos. Si Apo Shiyos bengat i Kangeto‐an, si‐katoy ari ni emin na ari, tan apo ni emin na apo.
16 Si‐kato bengat i Shiyos ja eg metey, jet shima mismon kawad‐an to, angken sipa, enshiy toon en onshanon so, ta emenenilin pasiya. Angken sipen too, enshiy en engasas son si‐kato, ono mengesas so. Jet si‐katoy mayshedjaw ja toray ja Manakabalin ingkatod ingka. Siya, satan da!
17 Ikowan mo so nonta ira bebaknang nin niman na sibibiyag ired ja dobong ey aliẃen ira ondastog, tan aliẃen sota pilak shay sha en panshindan, ta aliẃen sigorado. Isonga say panshindan sha koma, si Apo Shiyos, ja emengi‐kan ni emin na kasapolan tayo, ja tayoka kenkenasa.
18 Say dag‐en sha koma, sota panmaptengan ni kait sha, ja todongan sha ira, ta sotan i may‐eshig shi koston baknangan. Mesepol la amtaren mengaasi koma, ja esaganen mengila‐kam ni olay.
19 No sajay i pesing ni bebaknang, mapteng, jet ẃaray may‐eshig ja singa poonan shed dangit ja kenasan shed man. Sajay i pesing nga menigorado ni podnon biyag shi dangit.
20 Si‐kam Timoteo, mesepol la eg mo baybay‐an sota inpiyal nen Apo Shiyos son si‐kam, ja dag‐en mo. Kareka maybibiyang nonta enshiy silbi ton toro ni eshom, ja singa notnotnot bengat. Say itsora nontan na too, ireka mansosongbat bengat. Kowan sha ey ẃaray inpa‐amta kono nen Apo Shiyos son si‐kara, nem enshi kari.
21 Waray eshom iren too ja bimaki nonta intenengan sha iyay, jet enshi mala ira shi pamati son Jesus.
Jet sapay koma ta si Apo Shiyos i mengaasi son si‐kam.