2
Say pesing jo say na‐olnos kayon emati son Cristo
1 Jet sajay iray ibilin ko son si‐kam. Say pilmiro, eg mo dibdibkan ja mansheẃat son Apo Shiyos ni olay. Ireẃat mo son si‐kato sota angken nganton kasapolan, agdalo sota mesepol ni eshom ma totoo, tan mesepol pay ja man‐iyaman ka para so ni emin na totoo.
2 Tan ireẃatim iray a‐ashi, tan sota ira eshom ja nankengato i toray sha, say mapteng i pengitoshay sha et say meẃad‐an kito ni etalnen panbiyag ja enshiy kolo, jet say eg medingding i tayoka panshedjaw son Apo Shiyos, tan say eg medingding pay sota mapteng nga ogadi tayo.
3 Sajay i mapteng nga koston ka‐aporbalin Apo Shiyos. Si Apo Shiyos, si‐katoy mengisedakan son si‐katejo,
4 jet say piyan to, maysedakan ngon emin i too, tan piyan ton amta‐en sha i maypangkep ni podnon pamati.
5 Ta si Apo Shiyos, sakey to, enshiy eshom ma Shiyos et sakey ngo bengat i mengi‐sop ni too so nen Apo Shiyos, enshiy eshom — si Cristo Jesus bengat, ja mismon too.
6 Si Cristo Jesus, si‐katoy engi‐kan shorog ni bakdang ton etey shi koros ja engikesho ni basol tayo, say may‐a‐sop kito son Apo Shiyos, ja istay naysi‐jan son si‐kato. Sajay i inpasing nen Cristo ni koston timpo ja inkowan nen Apo Shiyos et si‐katoy ka‐amta‐an to ey ensemek shakito nen Apo Shiyos.
7 Jet sajay i kabol la shinotokan towak son manbedin ni apostol ja mengitosho tan mengikowan ni podnon pamati so nonta ira toon aliẃen Hodiyos. Jet sajay ya inkowan ko, agpayso; aliẃen naka man‐o‐owap.
8 Isonga say piyan ko, no mesa‐nop i emati son Cristo shi emin na dogad, mesepol la sota dalekiy mansheẃat son Apo Shiyos. Nem no timpon pansheẃat, mesepol la metopog i nemnemen sha ja si Apo Shiyos bengat; aliẃen en metaksholan ni bonget ono empait ta nemnem so ni eshom.
9 Jet si‐kayo ngon bibii, asas joy itsora ni baro jo, aliẃen jo ida‐kad i bisti, tan aliẃen sota bowek joy jo singsingpeten; aliẃen kayo man‐osal ni kompormin ebanol ja alkos ni baro, ja balitok ono eshom iren nankepalit i bayad to.
10 Say mesepol et mango, sota mapteng nga ogadi. Si‐katoy anam ni biin kowan to ey ẃaray pamati to.
11 Jet say kowan ko son si‐kayon bibii, mesepol la no timpo ni pan‐ashal jo, on‐eg‐eket kayo koma ja i‐onod joy kowan ni daleki.
12 Ekak itolok ja mantosho iray bibii, ta no sajay i medeka, ja pa‐so‐an shay daleki, singa si‐karay mengitoshay ma ni daleki. Ekak koston manbedin jen engato i saad ni bibii, say eg sha itorayan i daleki. Mesepol la on‐eg‐eket ira.
13 Ta say epangdon pinalsowa nen Apo Shiyos, si Adan, asan si Eva.
14 Tan aliẃen si Adan i nay‐owapan, no diket sota bii, jet si‐katoy bimasol.
15 Isonga emandikat ni toka pan‐enak, nem maysedakan met laeng no itoloy ton memati son Cristo, tan no sesmeken toy kait to, tan no maytotop i ogadi to nodta piyan nen Apo Shiyos, ja amta ton menngel ni bakdang to shorog.