2
Pantanshaan kayo ali ni totoon o‐owap i toro sha
1 Nem angken nonta bayag da, ẃara met laeng iray sinan para padto ja o‐owap i intoro sha so nonta ira too nen Apo Shiyos. Jet angken niman na emankedabas sa timpoyo ngo, ẃara ira aliy inges sha ja kowan sha ey si Apo Shiyos konoy engibetkag son si‐kara. Nem o‐owap kariy toro sha. Sotan alin itoro sha, sikap, jet si‐katoy meneshal ni pamati ni eshom. Eg sha mala eẃaten ey si Jesus i Apo sha, anta nga si‐katoy engisedakan son si‐kara nonta pilmiro. Eg ira met kitdi mebedjag, ta sajay ya shaka dagdag‐a, si‐katoy mengi‐kan ni kesheshalan sha,
2 nem eshakel i mengonod ni toro sha, ja kowan sha ey aliẃen basol i pandeka ni edogit ta aramid. Jet sotan iren i‐owapan sha, si‐karay kabol la ngaaw i ikokowan ali ira nonta eg memati maypangkep nonta pamati tayon podno.
3 Sajay iren o‐owap i toro sha, pilak i shaka nemnemnema. Isonga say pesing sha son si‐kayo, tapngan shakejo ni en‐amis sa esel ja o‐owap say panpidakan shakejo.
Nem emansessesked i keshosara ja singa eman‐a‐agag ni imotok sha, ta sigod ja inkesheng nen Apo Shiyos ey kenshat ta meshosa ira.
4 Ta sinto pay sota ira anghil ja nanbasol nontan da, enshiy binaybay‐an nen Apo Shiyos son si‐kara, no diket inpalaw to iren emin shima impiyarno jet naybalod mala ired man ingkatod onsabi ali sota timpon shosa‐an so ira nen Apo Shiyos.
5 Asan sakey pay, sota ira totoo nonta bayag den timpo nen Noe ja nankekedsel, enshiy en binaybay‐an nen Apo Shiyos son si‐kara. Dinedjos to iya dobong et nalned ja emin ira sota totoon eg emati son si‐kato. Say ebiyag nontan ja eg nalned, si Noe bengat tan sota piton kait to, ta si Noe bengat i engikowan nontan ey manbebawi iray totoo ja mapteng may dag‐en sha.
6 Jet angken pay sota ira tood ma dogad ja kowan sha ey Sodoma tan shi Gomora, shinosa nen Apo Shiyos iren dinalshep ni inpool to so ni ili shen inpanbalin to ni shep‐ol. Sajay i inpasing nen Apo Shiyos say ẃaray banshaan so ira nonta eg memati son si‐kato.
7 Nodtan na dogad, say ebiyag bengat ja insalakan nen Apo Shiyos, si Lot, ta maronong nga too. Si Lot, ngaaw i dekna to tep sota ira nankekedsel la kaidiyan tod man, ensekig ni olay i shaka dagdag‐a.
8 Naydaok si Lot so ira nontan na totood Sodoma jet ina‐akew ja say toka asa tan toka itentenengi son si‐kara, poro kedsel la emin. Jet sajay ya epaspasemak, ngaaw i dekna to, ta si‐kato, maronong.
9 Sajay ya inkowan ko len dingdingka nen Apo Shiyos nonta bayag da, si‐katoy nemnemnemen jo, ta si Apo Shiyos, amta ton mengisedakan so nonta ira totoon emati son si‐kato, angken naydaok ira shi nankekedsel la totoo. Jet amta to pay i pesing to so nonta ira eg memati son si‐kato ingkatod onsabi sota akew wa inkesheng ton keshosara,
10 agdalo ira sota toon say shaka dagdag‐a, sota pipiyan shen ensekig ga aramid tan sota ira kaonsopngil so ni toray ya insaad nen Apo Shiyos.
Sota ira o‐owap i shaka itoro, eg ira mebidin, tan enshiy baing sha. Enshiy takot shen mengikokowan ni ngaaw maypangkep so ira nonta anghil ja pinalsowa nen Apo Shiyos shi dangit.
11 Nem sota ira anghil, angken ẃaray panakabalin sha, tan ẃaray nebeng sha ja in‐akan nen Apo Shiyos, ẃara met laeng i annad sha ja mengikowan ni ngaaw wa esel maypangkep so nonta ira o‐owap i toro sha shi sango‐an nen Apo Shiyos.
12 Sotan iren too ja o‐owap i toro sha, singa atap iren animal la ẃared shontog, ta eg sha nin nemnemen i dag‐en sha, ta sota deknara, si‐katoy shaka pemasigin dag‐en. Jet say sakey pay ya kay‐ingsan shed animal, enshiy panpa‐no‐an ni biyag sha nem eg ma‐shel ira et mebono. No ẃara pay i eg sha eẃatan, nga‐ngaaw i esel la ikokowan sha. Jet say panbenagan sha, inges to sota animal la mesheshal ngoreshan;
13 sota epaladon kakedsel sha, ikaro sha ngoreshan. Angken timpo ni ka‐akawan, ja eshakel i totoo, shaka ipalantaro ja dag‐en sota pipiyan sha, ta sotan konoy siged son si‐karen shaka pandadsaki. Ensekig ira jay ya pasiya! En‐asimogal jo komen may‐odop son si‐kara, ta na‐alas i shaka pesing no maydikob ira son si‐kayo ni timpon joka penginemnem son Cristo.
14 Sajay iren totoo, no ẃaray asen sha pay ya bii, apil la shagos i ẃared nemnem sha. Eg ira on‐ekdas ja mandeka ni ngaaw wa ẃared pangkep sha. Sota ira toon emanbinaliw i nemnem sha, si‐karay shaka en‐enapa ja i‐owapan, jet edaing iren mengamkam ni kompormi. Sajay i shosa‐an so ira nen Apo Shiyos.
15 Bimaki ira ja singa inbiyang sha sota mapteng nga ogadi ja ka‐aporbali nen Apo Shiyos, jet say inonod sha et ngo mowan, sota ngaaw wa aramid. Inonoran sha sota aramid nen Balaam ja anak nen Bosor nonta bayag da, ja say pipiyan ton dag‐en, ja pengal‐an to ni pilak, sota pandeka ni ngaaw.
16 Nem nemnem jo kari sota epasemak son Balaam. Imesel sota animal ton nankabajo‐an to, ja inseg‐ang to si Balaam ta ngaaw i aramid to. Jet siya, eg ma timoloy ya to dag‐en sota istay ninemnem ton dag‐en ja nayda‐kad.
17 Sajay iren totoon o‐owap i toro sha, enshiy jo kon‐oren son si‐kara, ta say kay‐eshigan sha, singa ba‐ẃek ira ja enshiy shanom to, ono singa sota kolpot ja pan‐itekjab bengat ni shagem ja enshiy to inegni‐an na oran. Jet sajay iren totoo, ẃaray insagana nen Apo Shiyos ja embolinget ta dogad ja keshosa‐an sha.
18 Sajay ira, shaka pay itangsit sota aramid shen ensekig ja enshiy silbi to, jet sotan i shaka pengeẃis ni totoo say si‐kara konoy onoren sha. Jet say shaka en‐enapa pay ja eẃisen, sota ira toon ikaybi‐jag shen meki‐od‐odop so nonta ira toon ap‐apil i shaka dagdag‐a.
19 Say shaka pengeẃis son si‐kara, kowan sha ey no si‐karay onoren sha, bolos konoy pipiyan shen dag‐en, angken nganto. Nem si‐karen mismo, nagshengan i mebedin shen dag‐en. Ta si‐kara, basol i indowam shen dagdag‐en, jet angken si‐katoy meneshal son si‐kara, eg mebedin na ibi‐jag sha. Angken nganto, no eg mebedin na ibi‐jag ni toon dag‐en, sotan i may‐eshig ey makabaga‐en son si‐kato, isonga aliẃen bolos i piyan ton dag‐en.
20 Mapteng i kasesaad ni toon emati so nen Jesucristo ja Apo tayon engisedakan son si‐katejo, no ibi‐jag to sota ensekig ga aramid ja kedagdag‐a ni tood ja dobong. Nem no itolok to shorog i bakdang ton maydowam nodta sigod ja aramid to, ja enshi may kedsang ton memediw nontan na ogadi to, mema‐ma may kasesaad to ey say nonta pilmiro.
21 Istay mapmapteng koma no sajay iren too ket eg sha inamta‐an i maypangkep ni mapteng nga ogadin ka‐aporbali nen Apo Shiyos. Ta kimawas sota inpangamtara nonta bilin nen Apo Shiyos ja naykowan son si‐kara nontan, no on‐oli mowan ira nodta sigod.
22 Isonga agpayso sota kowan nonta arig ey, “Sota aso, to inodin kinan met laeng sota in‐ota to. Tan sota keshel ja na‐mes, nay‐oli met laeng nga en nanpitdaw shi pitek.” Sajay i kaytoshongan nonta ira toon istay edinisan nonta aramid ton ensekig nem nay‐oli met laeng mowan na sotan i toka dagdag‐a.