10
Inbetkag nen Jesus sota sampolo tan showen id postol to shi eshom ma ili
1 Si Jesus, sina‐nop to ira sota pinidi ton too to ja sampolo tan showa. Jet kowan to son si‐kara ey, “Ipiyal ko son si‐kayo ey angken sama ira dimonyo ja pimeket shi totoo, mebedin na pebtik jo. Tan sota ira ẃaray sakit to, mebedin ngon pemapteng jo ira.”
2 Say ngaran ira nonta apostol ton sampolo tan showa, sajay. Say epateg son si‐karen emin, si Simon ja say sakey ya ngaran to, si Pedro. Say eshom, si Andres ja agi nen Pedro, tan si Santiago nen Juan ja san‐agin anak nen Sibidi,
3 si Felipe nen Bartolome; si Tomas, si Mateo ja istay para singil ni bowis; si Santiago ja anak nen Alpio, si Tadio,
4 sota si Simon ja bitarano, tan si Judas Iskariote ja mengileko ali so nen Jesus shi anongosto.
5 Sajay iren apostol to ja sampolo tan showa, inbetkag to ira, ja kowan to ey, “Karekayo ondaw shima angken towen kawad‐an ira nonta aliẃen kait tayon Hodiyos, ono shima angken towen ili ni i‐Samaria,
6 no diket say daẃan jo bengat, topog jon ondaw nodta kad‐an ni kait tayon Hodiyos ja singa may‐eshig ey kalniron imaraẃi.
7 Emin na dawdaẃan jo, ikowan jo son si‐kara ey sota naypadton pantoshayan nen Apo Shiyos, shanshani may timpo to.
8 Jet angken sota ira emansekit nodtan, pamapteng jo ira, tan no ẃaray sebi‐en jon etey, panbiyag joy eshom. Pamapteng jo pay ira sota ebayabayang i bakdang sha. Sota ira toon eman‐engaw ja ẃaray dimonyon pimeket son si‐kara, pabtik jo son si‐kara sota dimonyon pimeket. Sajay ya panakabalin, ineẃat jon enshiy bayad to son si‐kak, isonga no i‐osal jod eshom ma too, eg kayo mengshaw ni bayad to.
9 “Karekayo manbedon ni pilak, angken sota manintimos.
10 Eg mesepol la mengita‐jon kayo ni bayong, ja pengi‐iyanan jo ni mesepol jod shalan, ono baron pansa‐datan jo, ono sinilas sa pansa‐datan jo, ono sowan. Ta sota man‐obda, nebeng ton may‐aknan ni kompormin mesepol to.
11 No ẃaray motoken jon ili ono baryo, say enapen jo nodtan, sota toon emepiyal. Jet pan‐iyan kayo nin nodtan na baley to ingkatod eg jo pay laeng idekjas sotan na dogad.
12 Sotan na baley ja motoken jo, ikowan jo so nonta makabaley ey si Apo Shiyos, si‐katoy onbindisiyon son si‐kato.
13 Jet no satan na too ket anam toy inkowan mon bindisiyon ta maronong, sota inkowan jon bindisiyon nen Apo Shiyos, ontoloy son si‐kato. Nem no eg to anam ta ngaaw wa too, bebawi jo sota bindisiyon nen Apo Shiyos ja inkowan jo son si‐kato.
14 Jet no sotan iren too nodtan ket eg shakejo eẃaten, ono eg sha pati‐en i ikowan jo son si‐kara, sota depok ja naypeket shi sediyo, pokpok jo nin asan joka ilekjas sotan na baley ono ili. Ta si‐katoy pengamta‐an sha so ey enshi may biyang jo son si‐kara.
15 Jet no timpo alin pengigsheng nen Apo Shiyos no sipay maysedakan, say podnon mepesamak so nonta too nodtan na dogad, mas embel‐at i keshosara nem say sota toon i‐Sodoma, tan i‐Gomora.
16 “Tanshaaniyo ta ibetkag takejo ja singa kalniron naydaok shima atap pa aso. Isonga mesepol la mantanshaan kayo ja inges toy kepantanshaan ni oleg. Nem mesepol la say itsora ni ogadiyo met laeng, inges toy itsora ni kalopati ja eg meneshal.
17 Tanshaaniyo sotan na toon kaydaokan jo, ta sota eshom son si‐kara, si‐kara met laeng i mengidaw son si‐kayo shi oskaro. Tan angken shima sa‐nopan sha, sepsepdaten shakejod man pay.
18 Jet ikoyod shakejo pay shi sango‐an nonta ira gobinarol, tan sango‐an nonta ira ari, ta too takejo. Jet sotan i ẃaya jon mengiringan na mengikowan son si‐kara ni maypangkep son si‐kak. Tan angken sota ira aliẃen Hodiyos, ẃaray ẃaya jon mengikowan son si‐kara.
19 Jet no i‐awat shakejod man, karekayo meshanagan no ngarantoy isongbat jo son si‐kara, ono ikowan jo, ta sota isongbat jo, maypa‐amta met laeng son si‐kayo nontan na oras ja shakejosoka pan‐ibag‐i.
20 Ta aliẃen si‐kayon mismo i onsongbat so, no diket sota Ispirito nen Apo Shiyos ja Amejo, si‐katoy mengitoshong son si‐kayo.
21 “Jet sajay alin timpo, angken san‐agin daki, ibaag nonta sakey i agi to shi eshom, ey eg et meshanagan ey angken bono‐en sha. Inges niyay met laeng i pesing ni a‐ama shi annak sha. Jet angken sota ira a‐anak, kontra‐en shay maka‐anak son si‐kara et pebonora pay ira.
22 Jet angken si‐kayo, sota joka pemati son si‐kak, si‐katoy kabol la okesan shakejo so ni karakdan na too. Nem sota mengitoded ni angken nganton digat ja onsabi son si‐kato, si‐katoy maysedakan.
23 No pedigaten shakejo shi sakey ya ili, betik kayo shi eshom ma ili. Podno iyay ya ikowan ko son si‐kayo. Mebedin na eg jo posposen na bebtikan na emin sota ili ni Israel ey onmotok ali sota kowan ni para padto ey Anak ni Too.
24 “Iyay i nemnemen jo: sota man‐ashal nin, eg ibaingan ni totoo nem say sota emengitosho son si‐kato. Inges to met laeng sota baga‐en, eg sha ibaingan nem say sota apo to.
25 Sota man‐ashal, mepnek koma no ingesen to sota emengitosho son si‐kato; jet angken ngo sota baga‐en, mepnek ngo koma no ingesen to sota apo to. Say olog niyay, no si‐kak ka apo jo ket eg sha ibaingan, ja kowan sha ey apo sha‐ak ni dimonyo, mas pay ya ngaaw i ikokowan sha maypangkep son si‐kayon took.
26 “Nem say kowan ko, karekayo ontakot son si‐kara. Sota inkowan ko ni abos jo, ja singa esa‐dinan ono nay‐emot niman, mesepol la amta‐an ni eshom.
27 Sota inkowan ko son si‐kayo ja sikrito, si‐kato ngoy ikowan jo shima karakdan. Jet sota intenengan jon intetobok son si‐kayo, si‐kato ngoy ipaleẃag jod karakdan.
28 Karekayo ontakot so nonta ira makakontra son si‐katejo, tep bakdang bengat i kabaalan shen bono‐en; eg sha mebedin na pilshi‐en i dinaẃayo. Nem say mesepol la metekotan koma, si Apo Shiyos, ta ẃaray kabedinan ton meneshal ni bakdang tan dinaẃa ni too shi impiyarno.
29 “Nem ẃara ngoy ebadeg ga semek nen Apo Shiyos. Nemnem jo kari sota titit. Emaydeko i showa ni sakey ya sintimos nem angken sanseskey so nonta titit ja singa enshiy banol sha, eg ibiyang nen Apo Shiyos. No ẃaray ma‐kas sa angken sakey ya titit, amta nen Amejod dangit.
30 Angken pay sota bowek ni toktok jo, amta nen Apo Shiyos i kabebilang to.
31 Isonga karekayo ontakot tep mas ebadbadeg pay i semek to son si‐kayo nem say sota eshakel la titit.
32 “Sota toon mengikowan so ni kait ton too ey si‐kato ket took, ikowan ko ngo son Amak shi dangit ey sotan na too ket took ka emepiyal.
33 Nem sota toon mengikowan so ni too ey eg towak amta, ibiyang ko ngo shi sango‐an nen Amak shi dangit.
34 “Aliẃen jo ipangkep ey dimawak alin mengi‐kan ni olnos shiya dobong. Aliẃen sota maypangkep ni olnos i dinaẃan ko di, no diket say panbenagan ali ni indaw ko, eg man‐i‐inawatan i totoo.
35 Angken sota san‐ama, eg ira man‐inawatan, ono sota san‐ina, eg ngo ira man‐inawatan. Angken pay sota san‐inepon bii, eg ira man‐inawatan.
36 Jet say ẃa‐ẃa‐sha ja mengontra so ni too, sota ẃara met laeng nodta pamilja to.
37 Sota pipiyan toy ameto, ono ineto nem say si‐kak, eg maykeshin took. Angken sota makapipiyan ni anak ton bii ono daki nem say si‐kak, eg maykeshi ngo ey took.
38 Jet sota toon eg to enosan i kaybebaing to ono kebitay to maypangkep son si‐kak, eg maykeshin took, ta eg to onoran i inges ni pengenos ko.
39 Sota mengaẃan ni biyag to, mepokaw son si‐kato et ngo mowan. Nem sota mepokaw i biyag to maypangkep son si‐kak, odi‐en to met laeng sotan na biyag to ingkatod ingka.
40 “Sota mengeẃat son si‐kayo, may‐eshig ey si‐kak i ineẃat sha. Jet sota mengeẃat son si‐kak, may‐eshig ey say ineẃat sha, si Apo Shiyos ja engibetkag ali son si‐kak.
41 Sota menintil ni para padto nen Apo Shiyos ta amta to ey sotan i mengipedawag ni esel nen Apo Shiyos, may‐inges i kon‐oren to nodta kon‐oren nonta para padto ja i‐akan nen Apo Shiyos son si‐kato. Jet sota toon menintil ni toon maronong, ta amta to ey mapteng nga too, may‐inges i kon‐oren to nodta maronong nga too ja i‐akan nen Apo Shiyos son si‐kato.
42 Jet agpayso iyay. Sota toon mengi‐kan ni angken shanom ma inomen nonta sakey ya kabeba‐an na took, ta amta to ey si‐kak i makatoo son si‐kato, sotan na toon mengi‐kan ni shanom, sigoradon ẃaray kon‐oren to ja i‐akan nen Apo Shiyos son si‐kato.”