16
Nan‐ongal si Jesus
1 Idi mama‐shem ma ja edabas da sota akew ni ngilin, si Maria Magdalena, si Salome, tan si Maria ja ina nen Santiago, enongkal ira ni danen emanseng‐ew, ja sha ipoyok koma nodta bakdang nen Jesus.
2 Jet idi agsapa ni Domingko, ja emanbo‐day aliy sekit, dimaw ira nodta naydiyangan nen Jesus.
3 Say tabtabal sha, kowan sha ey, “Sipay onposin mengkal ni baton naytangeb nodta bongot ni diyang say onsekep kito?”
4 Nem idi onshemang ira, inon‐an sha ey na‐kal gayam sota bato, ey ebadeg ga pasiya.
5 Simekep ira nodta diyang et inon‐an shay balodakin nanbaro ni empoti ja edayag, ja timongaw nodta apit ni kanawan. Jet nasshaaw iren pasiya.
6 Kowan nonta balodaki son si‐kara ey, “Karekayo messhaaw. Amtak ey say piyan jon on‐an, si Jesus ja i‐Nasarit ja naydansa shi koros. Nem enshid jay, nan‐ongal da! Asas jo kari ita istay inparokolan sha so.
7 Jet no asen jon enshi, daw kayo, jet jo ikowan so nonta ira too to ey nanbiyag mowan da, agdalo son Pedro. Jet niman, ondaw da si Jesus ja mepangdo ey si‐kayo shi Galilia, jet shiman i asanan jo so! Tep saman i inkowan to son si‐kayo nonta aneng pay laeng i ketey to.” Kowan nonta balodaki.
8 Bimo‐day mala ira sota bibii ja namtik ired diyang, tep ireka manbebayedbed ni takot sha. Jet enshiy sha inkokowan so ni angken sipa nontan tep eta‐kot ira.
Nanpa‐sas si Jesus son Maria Magdalena
9 Idi naksheng nga nan‐ongal si Jesus ni agsapen pasiya ni Domingko, say kapangdo‐an na nanpa‐sasan to, si Maria Magdalena. (Sajay sota si Maria ja inpabtikan so nen Jesus ni piton dimonyo ja pimeket son si‐kato.)
10-11 Jet si Maria ngo, dimaw so nonta ira too nen Jesus ja nay‐olop ni olay son si‐kato nontan da et sina‐kop to iren esa‐nop ja emandeshingit tan emannengis ni inkabono nen Jesus. Jet inkowan to son si‐kara ey, “Nanbiyag mowan si Jesus! Inon‐an kon mismo!”
Nem idi intenengan sha, eg sha pinati.
Nanpa‐sas si Jesus so ni showen too to
12 Idi naksheng iyay, nanpa‐sas mowan si Jesus so ni showen too to ja eman‐ekad ja edapod siyodad ni Jerusalem. Jet na‐apil i inpangidmang sha son si‐kato.
13 Jet nan‐oli sota shadẃa, ja sha inkowan so ni eshom ma kait shen too nen Jesus, nem iso met laeng nga eg sha pinati.
In‐awat ma nen Jesus sota ka‐onoran na bilin ton epateg so nonta ira apostol to
14 Idi naksheng nga nanpa‐sas si Jesus so iren jay, nanpa‐sas mowan so nonta ira sawal ni sakey ya apostol to nonta maramen ireka mengan. Jet inseg‐ang to ira ni eg sha so pinati‐an so nonta insodsod nonta ira engasas son si‐kato ni inpan‐ongal to; kowan to ey epaladoy katangken ni toktok sha.
15 Jet kowan to pay son si‐kara ey, “Daw kayo shi emin na sakop niya dobong jet jo ikowan so ni emin na totoo i mapteng nga shamag maypangkep son si‐kak.
16 Sota memati tan mebonjagan, maysedakan ira, nem sota eg memati, shosa‐en ali nen Apo Shiyos.
17 “Jet sota ira memati, mandeka ngo ira ni kaskasshaaw wa eẃatan so ni totoo ey podnoy shaka pan‐itoro. Say dag‐en shen kaskasshaaw, sajay: mengipebtik ira ni dimonyon pimeket shi totoo no i‐osal shay ngaran ko, man‐a‐sel ira ni eshakel la kalasin esel ja eg sha amta;
18 angken egni‐an sha pay i oleg tan inomen shay sabishong ja istay keteyan sha koma, eg ira mesekitan; tan ontakal iray emanpansekit no isakpal shay takday sha son si‐kara.”
19 Jet si Apo Jesus, idi naksheng nga inkowan to iyay son si‐kara, inda ma nen Apo Shiyos shi naykayang et en timongaw shi apit ni kanawan nen Apo Shiyos.
20 Jet sota ira toon inbilinan to so nonta inkowan to la, nansisi‐jan ira, ja sha intoro shi emin na dogad sota maypangkep son Jesus. Jet eki‐obda ngo si Jesus son si‐kara, isonga nayki‐det sota intoro shen esel nen Jesus, tep in‐aknan to pay ira ni panakabalin shen mandeka ni milagro. Siya, satan da.