22
Bimaki si Judas ta ekitodag so nodta makakontra son Jesus
1 Shanshani nontan sota timpo ni piyasta ni Hodiyos ja kowan sha ey Paskowa.
2 Sota apo ira ni papashi ni Hodiyos tan mamaistoro ni dinteg ni Hodiyos, piyan shen pasiya ja bono‐en si Jesus, nem entakot ira nonta totoon eshakel ja na‐awis son si‐kato. Isonga ireka mengenap nontan ni pesing shen memono son si‐kato.
3 Si Satanas, sinairo tos Judas Iskariote ja sakey so nonta ira sampolo tan showen apostol nen Jesus.
4 Si Judas, dimaw ja en ekitbal so nonta ira apo ni papashi tan kowadja ni Timplo no ngarantoy pesing ton mengitosho ni kawad‐an nen Jesus say seskelen sha.
5 Jet ireka man‐imdeng, tan shaka pan‐akni ni pilak ja dagbo to.
6 Jet si Judas, ekitodag ey itoro to son si‐karay kad‐an nen Jesus nem saman na enshiy eshakel la totoo, say enshi komay kolo. Jet manshoki nontan, ẃara ni olay shi nemnem nen Judas Iskariote no toway pesing ton mengibaag so nen Jesus son si‐kara.
Sota ka‐onoran na pekipengan nen Jesus so nonta ira apostol to
7 Shimanon sota akew wa shaka pengan ni tinapay ya enshiy daok ton para debag tan shaka pemalti ni kalniron sid‐an sha nem Paskowa.
8 Jet nontan, si Jesus, inbetkag tos Pedro nen Juan, ja kowan to ey, “Daw kayo, jo isekana i penganan tayo nem ma‐shem tep Paskowa ma.”
9 Kowan sha ey, “Toway daẃan min en pengisekana‐an ni penganan tayo?”
10 Kowan nen Jesus ey, “Itnengiyon pasiya iyay. No onsabi kayod Jerusalem, ẃaray dakin aspolen jo ja emasan ni salaw ja na‐inan ni shanom. Onod jo nodta baley ya seskepan to,
11 jet ikowan jo iyay so nonta makabaley: ‘Kowan ali nen Maistoro ey towa konoy kowadton penganan to tan si‐kamin too to niman na ma‐shem, tep Paskowa?’
12 Jet ipa‐sas to son si‐kayo i embanaw wa kowadto nodta naykayang, ja ẃara nodtan na emin i mesepol tayo. Si‐katoy pengisekana‐an jo ni kenen tayo nem ma‐shem.” Kowan nen Jesus.
13 Dimaw ira sota shadẃa shi Jerusalem et siya, kosto noman na nay‐agpayso sota kowan nen Jesus son si‐kara. Jet insaganared man sota kenen sha nontan na ma‐shem.
14 Idi mama‐shem mala, si Jesus tan sota sampolo tan showen apostol to, dimaw iren mengan nodtan. Timongaw ira,
15 jet si Jesus, kowan to son si‐kara ey, “Piyan kon pasiya ja mekipengan nin son si‐kayo niman na Paskowa, asan naka mandikat!
16 Ikowan ko iyay son si‐kayo. Sajay i ka‐onoran na Paskowa ja pekipenganan ko. Enshi ma nin ingkatod metongpal i podnon olog ni Paskowa shi pantoshayan nen Apo Shiyos.”
17 Inda nen Jesus sota tasa et nan‐iyaman son Apo Shiyos, asan kowan to ey, “Iya, ko‐ko‐tik jon inomen iyay.
18 Ikowan ko iyay son si‐kayo. Sajay i ka‐onoran na penginom ko ni shanom ni obas, jet ekak nin menginom ingkatod metongpal aliy pantoshayan nen Apo Shiyos.”
19 Inda to sota tinapay et nan‐iyaman son Apo Shiyos, asan toka showashowa‐a. Jet in‐akan to nodta ira apostol to, ja kowan to ey, “Sajay i bakdang kon itolok kon bono‐en sha; si‐katoy kaysedakan jon took. Si‐kayo, itodtodoy jon mandilikob ja menowashowa ni tinapay, ja si‐katoy penginemneman jo son si‐kak.”
20 Jet idi naksheng iren engan, inda to sota tasa jet kowan to ey, “Manshoki ma niman, badoy pesing nen Apo Shiyos ja mengisedakan ni totoo, jet saja inomen jon ẃared tasa, si‐katoy pengiroki to, ta sajay i shalak ka on‐ayos ali nem meteyak. Sajay i on‐ayos say maysedakan kayo.”
21 Jet intoloy ton kowan to ey, “Nem niman, ẃaren ekilikob son si‐katejo sota mengibaag son si‐kak so nonta ira makakontra son si‐kak!
22 Si‐kak sota kowan ni para padto nonta bayag da ey Anak ni Too, jet sigod ja inkesheng nen Apo Shiyos ey mesepol la meteyak. Nem kaasi met laeng sotan na toon mengibaag son si‐kak, ta meshosen pasiya!”
23 Idi inkowan nen Jesus iyay, sota ira apostol to, nanbibinaga ira nem sipa son si‐kara i ondaga so nonta kowan nen Jesus.
24 Nansosongbat pay ira nem sipa aliy ibilang nen Jesus ey kangeto‐an.
25 Jet kowan nen Jesus son si‐kara ey, “Say ogadi ira nonta mantoshay shima kompormin ili, tan sota eshom ma toon nankengatoy saad sha, shaka ipakat i saad sha ni shaka pengitoshay met laeng so ni sinekopan sha.
26 Nem no si‐kayo, aliẃen inges nontan i pesing jo so ni sakey tan sakey son si‐kayo. Sota pangolon kangeto‐an son si‐kayo, si‐kato komay singa orishiyan ja ekombaben man‐obda ni pansigshan ni kait to.
27 Nemnem jo kari iyay. Sipay engatngato — sota timongaw ja emengan, ono sota emengi‐kan ni kenen to? Simpri sota toon timongaw wa emengan. Nem angken apo jowak, naka man‐obda ni olay ni pansigshan jo.
28 “Angken eshakel i digat ko, mapiyan kayon on‐ono‐onod son si‐kak.
29 Si Apo Shiyos ja Amak, inkesheng to ey si‐kak i mantoshay ni ka‐onoran alin akew, jet si‐kak ngoy mengigsheng ey mekitoshay kayo ali.
30 Mekiladsak kayo son si‐kak ni pantoshay ko, tan ontongaw kayo pay ja mengigsheng ni panbenagan ni emin na Hodiyos ja poli nonta sampolo tan showa ja annak nen Israel.” Kowan nen Jesus.
31 Jet ẃaray inkowan to son Pedro ey, “Simon, Simon, iyay i ikowan ko son si‐kam. Si Satanas, ẃaray parang to ey pandikat shakejo, balang kono nem ma‐adilaw kayo, say mansisi‐jan kayon singa tineg‐ap ni emenaap.
32 Mebedin na ma‐adilaw ka Simon, ni sanka‐atikan, nem inshawat ko son Apo Shiyos ey eg mekolpin onkapoy i pamatim. Jet no may‐odi mowan i pamatim son si‐kak, si‐kam ngoy pekedsang so ni kait mo.”
33 Simongbat si Pedro ja kowan to ey, “Apo, eg mebedin! Angken ibalod sha‐ak, angken bono‐en sha‐ak, esagana‐ak ja kadẃa‐en taka ni olay!”
34 Kowan nen Jesus ey, “Ikowan ko iyay son si‐kam Pedro: niman na dabi, isaot mowak ni memintedo ja ikowan mo ey eg mowak am‐amta, asan ẃaray ontekok ja kawitan.”
35 Jet kowan nen Jesus son si‐karen emin ey, “Nonta inbetkag takejon enshiy jo inta‐jon na pilak ono bayong ono sapatos, ẃaray kolang ja kasapolan jo nontan?”
Simongbat ira ja kowan sha ey, “Enshi, ẃaren emin.”
36-37 Kowan ma nen Jesus ey, “Eg kayo nankolang nontan tep ensemek sha‐ak nodta dinaẃan jo, isonga in‐aknan shakejo. Nem niman, apil ma. Ta say nemnem ira ni totoo son si‐kak niman, kowan sha ey sakeyak kono ngon enshiy kenkenshat to. Ta mesepol la metongpal son si‐kak sota padto nonta bayag da ja kowan to ey, ‘Maybidang ey sakey ya bimasol.’ Isonga manshoki ma niman, no sipa son si‐kayo i ẃaray pilak to ono bayong to, ita‐jon to koma. Tan no sipa son si‐kayo i enshiy kampilan to, idako to komay baro to et menongkal ni sakey.”
38 Jet kowan nonta ira apostol to ey, “Apo, asas mo! Iyay i showen kampilan!”
Kowan nen Jesus ey, “Kosto ma, enog.”
Nanshawat si Jesus shi shontog ga kowan sha ey Olibas
39 Kanajon na kaondaw si Jesus shima shontog ga kowan sha ey Olibas jet idi bimo‐day ira nodta baley ya enganan sha, inodop to ira sota apostol to et dimaw ira nodtan na shontog.
40 Idi mimotok ira nodta dogad ja kanajon na toka pansheẃati, kowan to son si‐kara ey, “Panshawat kayo son Apo Shiyos ni kedsang say eg shakejo ebaken ali ni digat ja onsabi son si‐kayo.”
41 Idi inkowan to iyay, bintawan to ira ni ootik et nantalimokod ja nanshawat son Apo Shiyos,
42 ja kowan to ey, “Ama, no mebedin koma, eg mo ipalobos iyay ya pandikat ko di. Nem say kowan ko, sota piyan mo, si‐katoy metongpal, aliẃen sota kostok.”
43 Waray anghil ja edapod dangit jet to tinodongan si Jesus say onkedsang.
44 Emandikat si Jesus sa pasiya, isonga mas pay ya nanshawat ta pasiya son Apo Shiyos. Naydi‐di‐ngetan ja singa shalay toka pantedted.
45 Idi imekẃas ni toka pansheẃat, dimaw et to inon‐an sota ira too to, jet simbi to iren na‐ogip. Nabdey ira ni nemnemnem sha ni shaka pandeshingit.
46 Jet kowan to son si‐kara ey, “Ngantoy? Na‐ogip kayo? Bangon kayo, jet panshawat kayo son Apo Shiyos say eg shakejo ebaken ali ni digat ja onsabi son si‐kayo.”
Si Jesus, inshel ma nonta ira makakontra son si‐kato
47 Maramen eman‐a‐sel si Jesus ey onmotok aliy eshakel la totoo. Si Judas Iskariote, ja sakey so nonta ira sampolo tan showa ja apostol nen Jesus, si‐katoy engibalnay so ira nonta eshakel la totoo. Insopan nen Judas si Jesus, ja kowan to ey to ongo‐an.
48 Nem kowan nen Jesus son Judas ey, “Ongo gayam i pengitoshom so nen si‐kak so nita ira makakontra son si‐kak? Amtam met ey si‐kak sota kowan ni padto nonta bayag da ey Anak ni Too!”
49 Idi inamta‐an nonta eshom ma too nen Jesus i mepesamak ali, kowan sha son Jesus ey, “Apo, palobosim kamin mengibediw son si‐kam! Iyay ngoy kampilan mi!”
50 Jet sota sakey so nonta ira too nen Jesus, kinimpas toy kanawan na tangida nonta sakey ya baga‐en ni kangeto‐an na pari.
51 Nem imesel si Jesus ey, “Kosto, enog!” Jet in‐oli nen Jesus sota tangida nonta too et nay‐olin mimapteng ma sota tangida.
52 Kowan ma nen Jesus so nonta ira apo ni papashi tan kowadja ni Timplo, tan sota eshom iren pangolo ni Hodiyos ja en mengshel son si‐kato ey, “Apay nga nan‐etak kayo di tan ẃaray peg‐as jo? Apay tolisan i kowan jo ey a‐shelen jod jay?
53 Inakew met ja ẃara‐ak shima Timplo, ket apay nga eg jowak inshel nontan? Nem niman na kalebi‐an met kitdi i timpoyo, tep si‐katoy pan‐obda nen Satanas!”
Indibak nen Pedro ey am‐amta to si Jesus
54 Singkel shes Jesus et indaw sha led baley ni kangeto‐an na pari. Jet si Pedro, tinned to ira nem bimetaw.
55 Waray emenangshang nodta bo‐dayan, jet nay‐eshom ngos Pedro.
56 Nem idi on‐an nonta sakey ya biin baga‐en ni kangeto‐an na pari si Pedro, inningning toy dopa ton esilẃan nonta apoy et kowan to ey, “Angken si iyay met, kait nonta inshel sha.”
57 Nem nandibak si Pedro, ja kowan to ey, “Keba‐ba‐ngata niyay ya bii! Apay am‐amtak sotan na kowan mo!”
58 Enshiy bayag to, ẃara mowan i daki ja engimaton son Pedro et kowan to ey, “Si‐kam met i sakey ya too nontan na too.”
Nem kowan nen Pedro ey, “Moka ba‐ba‐ngatay esel! Apil, aliẃen si‐kak!”
59 Idi epalabas i sakey ya oras, ẃara mowan i sakey ya toon emengipidit ja shinoyshoy to pay si Pedro, ja kowan to ey, “Ayshiy showashowa! Kenshat ta si‐katoy sakey ya kait to did Galilia, tep si‐katoy kait ton i‐Galilia!”
60 Simongbat si Pedro ja kowan to ey, “Enshiy amtak nita moka pan‐ikowan!”
Jet idi maramen eman‐a‐sel pay laeng si Pedro, timekok i kawitan.
61 Jet nontan ẃimingi si Jesus et inshemang tos Pedro. Jet ninemnem ma nen Pedro sota inkowan nen Jesus ey, “Isaot mowak ni memintedo, ja kowan mo ey eg mowak am‐amta, jet no meksheng, ẃara ngoy ontekok ja kawitan.”
62 Jet si Pedro, dimaw shima powisha ja epaladoy nangis to tep naydaw‐an.
Si Jesus, binistigal ira nonta makakontra son si‐kato
63-64 Sota ira emanbantay so nen Jesus, shaka sengsengkita: inopopan shay mateto, asan shaka shengshengpela, jet kowan sha ey, “Sipay enengpel son si‐kam? Tiga, ipadtom ka!”
65 Tan eshakel pay i inkowan shen ngaaw son si‐kato.
66 Idi eẃa‐ẃa, esa‐nop sota ira pangolo ni Hodiyos, pati sota ira apo ni papashi, tan sota ira mamaistoro ni dinteg ni Hodiyos. Jet insekep shes Jesus et insango sha son si‐kara met laeng. Jet inbag‐an sha, ja kowan sha ey,
67 “Ipodnom no agpayson si‐kam sota inkari nen Apo Shiyos nonta bayag da ey ibetkag to alin mengisedakan!”
Nem simongbat si Jesus ja kowan to ey, “No ikowan ko, eg jo met laeng pati‐en.
68 Jet no ibag‐an takejo ngo, eg jowak met songbatan.
69 Nem iyay i ikowan ko son si‐kayo. Si‐kak sota inpadtora nonta bayag da ey Anak ni Too et shanshani men mekitongawak son Apo Shiyos ja Manakabalin, ja nak ngo mantoshay.”
70 Jet kowan sha ma ey, “No kasta ngarod, kowan mo ey si‐kam i Anak nen Apo Shiyos?”
Simongbat si Jesus ja kowan to ey, “Sota inkowan jo, si‐kato.”
71 Kowan sha ma ey, “Eg mesepol la ẃara pay i sistigo! Intenengan tayon mismoy kowan to!”