17
Basol i pengeẃis ni eshom ja manbesol
1 Kowan nen Jesus so nonta too to ey, “Waren kenshat i onsabin panbesolan ni too, nem kakaasi sota toon mengi‐kan ni panbesolan ni kait to.
2 Say pansigshan nontan na too ket, ma‐ono‐an koma ni ebadeg ga bato et en mayteb‐ok shima baybay. Pansigshan to ta engka‐jas sotan na keshosa to nem say sota penosa nen Apo Shiyos son si‐kato ja pengikesho to nontan na basol to, no istay engi‐kan koma ni nanbasolan ira niya nankebaben emati son si‐kak.
3 Isonga tanshaaniyon shorog i bakdang jo.
Mesepol la pekawanan ira sota nanbasol son si‐katejo
“No sota kait mo ket, nanbasol son si‐kam, bilin mo jet no itenengan toka ja manbebawi, pasinsiya‐im.
4 Ket no manbesol son si‐kam ni meminpito ni san‐akew et sinshon manbesol son si‐kam, ondaw alin en manpasinsiya ni meminpito, ja kowan to ey manbebawi ni ngaaw wa dingka to, mesepol la pasinsiya‐an mo.” Kowan nen Jesus.
Epateg i pamati son Apo Shiyos
5 Idi sakey ya akew, kowan nonta ira apostol to ey, “Paba‐deg moy pamati mi.”
6 Simongbat si Apo Jesus ja kowan to ey, “No say kaba‐deg ni pamatiyo ket may‐eshig shi botil la ootilek, mebedin na ibetkag jo sota ebadeg ga kiyew ey, ‘Kagabot ka et kaymola ken shorog shima baybay!’, jet may‐agpayso ja pati‐en toy kowan jo.
Sota mapteng nga nemnem nonta emansilbi so nen Apo
7 “Kaspangarigan ey ẃaray baga‐en ja inpangesharo ni apo to, ono inpanbantay to ni kalniro, ja imakad alin edapod obda to, aliẃen ogadi tayo ey si‐katoy mepangdon mengan nem say apo to.
8 Nem say ikowan jo son si‐kato, ‘Ikamakamimak ni kenen ko tan inomen ko asan ka ngo mangan.’
9 Jet sota baga‐en, eg mesepol la pan‐iyamanan mo i obden kinsheng to, ta si‐katoy obda to.
10 Inges to ngo son si‐kayo. No kinsheng jon emin i kowan nen Apo Shiyos ey dag‐en jo, eg jo koma nemnemen ey ẃaray otang nen Apo Shiyos son si‐kayo, no diket say ikowan jo koma, ‘Baga‐en mokami bengat, Apo Shiyos. Saja dingka mi bengat, sota inkowan mo, enshiy eshom.’ ”
Inpamapteng nen Jesus sota ira sampolon ebayabayang
11 Idi emandaw si Jesus shi Jerusalem, nanshalan shi nankinaw‐an ni Samaria tan Galilia.
12 Nodtan na minotok ton dogad, ẃaray sampolon too ja ebayabayang i bakdang sha. Sha inaspol si Jesus, nem naybetaw ira.
13 Isonga kimeljaw ira ja kowan sha ey, “Jesus! Apo! Kaasi jokami!”
14 Inon‐an nen Jesus ira et kowan to ey, “Daw kayo, jo pa‐sas i bakdang jo so nonta pari.”
Jet nonta ẃara pay laeng ired shalan ja ireka emandaw shi kad‐an ni pari, na‐omas ma sota bayang sha.
15 Jet sota sakey son si‐kara, idi inon‐an ton mimapteng ma, nay‐oli din epaladoy dadsak to son Apo Shiyos.
16 Dimaw ja en nantalimokod shi sango‐an nen Jesus ni iyaman to. Sajay ya too ket, i‐Samaria.
17 Si Jesus, kowan to ey, “Aliẃa ayen sampolo kayon mimapteng? Towa da ira sota siyam?
18 Apay eg mebedin ngo aya ja on‐oli ira di ja en man‐iyaman son Apo Shiyos? Saja aliẃa et ngo mowan na kait tayon Hodiyos, si‐kato bengat i nay‐oli di.”
19 Jet say kowan nen Jesus son si‐kato, “Dayat ka et angken ondaw ka. Sota pamatim, si‐katoy minaptengan mo.”
Sota itsora ni imotok mowan ali nen Jesucristo
20 Sota ira Parisiyo, inbag‐an shes Jesus nem pigan aliy panshoki ni pantoshayan nen Apo Shiyos. Nem say insongbat nen Jesus son si‐kara, kowan to ey, “Aliẃen en ondaw alin ẃaray amta‐an jo so.
21 Enshiy en mengikowan ey ‘Asas mo! Iyay shiyay i pantoshayan nen Apo Shiyos!’ Tan enshiy en mengikowan ey ‘Imed man!’ Ta ẃara son si‐kayo niman.”
22 Kowan nen Jesus so nonta ira too to ey, “Waray timpon onsabi ali ja pandikat jo, jet piyan jon asen i angken san‐akew wa pantoshay ko di. Nem eg mebedin.
23 Wara iray toon mengikowan son si‐kayo ey, ‘Wares Cristo! Jo on‐id man!’ Ono ikowan sha ey, ‘Iyed jay!’ Nem karejo patpati‐en.
24 Ta say itsora ni idaw ali mowan nonta kowan ni para padto ey Anak ni Too, ja mantoshay, inges toy bagidat ja silẃan ton shagos i emin na naykayang.
25 Nem say pilmiro, mesepol la mandikatak nin ja pasiya, ta sota toon sina‐kop kod ja dobong niman, eg sha‐ak pati‐en; ikowan sha et ey enshiy kenkenshat ko.
26 “Say arig ni timpon idaw mowan ali nonta naypadton Anak ni Too, inges toy timpo nen Noe. Ta sota aramid ni totoo nontan den timpo to, inges to met laeng i aramid ali ni totoo ni idaw ko mowan ali, jet inges to mowan i idibag ni totoo.
27 Ta nonta aneng pay laeng sota dayos, enshiy shaka panshanagi ni inakew: ireka mengan, ireka menginom, ireka man‐a‐asawa — ingkato nonta simabi sota timpon simekep si Noe nodta barko to. Jet idi simabi ma sota dayos, etey iren emin.
28 Arig to pay sota totood Sodoma nonta timpo nen Lot. Esiwat ira nontan da ni pangan sha tan inom sha; esiwat ira ni tongkal sha tan dako sha; esiwat ira ni mola tan amag ni baley.
29 Nem nontan na akew ja indekjas nen Lot i Sodoma, imoran alid naykayang ni apoy tan asopri jet binono ton emin ira sota totood man.
30 Inges niyay met laeng aliy imotok nonta Anak ni Too ja palibdibag.
31 “No onsabi sotan alin akew, sota toon naytompong nga man‐adibay shi bo‐dayan, eg to koma nemnemen sota kokowa ton ẃared naydaem ni baley; eg koma onsekep ja en mengeda ni kompormin ẃara nodta naydaem ni baley to. Kasta met sota ẃared payew, eg to koma nemnemen ja on‐oli nin shi baley to.
32 Nemnem jo kari sota epasemak so nonta aseẃa nen Lot nonta ẃiningi to bengat sota ili ton Sodoma ja shaka pan‐idekjas.
33 Sota toon entapi toy biyag to ja kowan to ey ensikshal la metey, si‐kato et ngo mowan i mepokaw i biyag to. Nem sota toon itolok toy bakdang ton metey, odi‐en to met laeng sotan na biyag to ingkatod ingka.
34 “Ikowan ko iyay son si‐kayo. No sotan alin akew, odopen koy eshom ma too, nem sota eshom, bay‐an ko. Jet no kaspangarigan ey kalebi‐an, ket sota showen too i naytompong nga nan‐arol shi sakey ya katiri, sota sakey, may‐odop son si‐kak, nem sota sakey, mebay‐an.
35 Angken ngon sota showen biin maytompong nga emengiding, sota sakey, may‐odop son si‐kak, nem sota sakey, mebay‐an.
36 Sota showa ngon daki ja maytompong nga ẃared payew, sota sakey, may‐odop son si‐kak, nem sota sakey, mebay‐an.”
37 Sota ira too to, inbaga sha ey, “Towen dogad Apo?”
Jet simongbat si Jesus ja kowan to ey, “No toway kad‐an ni bangkay ni etey, si‐kato ngoy kesa‐nopan ira ni kaẃang.”