5
Kaasi kayo din bebaknang no on‐onong kayon ma‐isew
1 Niman, iyay i ikowan ko son si‐kayon ẃaray mebedin to. Sigoradon ẃara aliy digat ja da‐kaman jo; isonga niman, nangis kayo, ngagngag kayo ni daringit jo.
2 Ta sota eshakel la inolnong jon kokowayo, enshi malay pansilbi‐an to. Tan angken sota ira baro jon insholin jo, nankebotbotan.
3 Sota balitok jo tan pilak jo, nandati et sota dati to, si‐katoy ka‐amta‐an to shorog ey in‐emot jo bengat, ja eg jo intolong so ni makasapol. Jet no onsabi ali sota pandikat jo, sotan na inpangikot jo ni kokowayo i kabol la kepokawan jo, ja singa mepoolan kayo ni apoy. Shanshani ali sota ka‐onoran na akew et nganto emo aliy pesingan jo so ira nita kokowayo?
4 Na‐olnong itan na pilak jo ta saol la emin i inpasing jo so nonta ira inpan‐obdayo shi bo‐day jo; kasta met ira sota inpan‐ani jo. Nakol ni shaka pan‐i‐ibajos so nen Apo Shiyos et intenengan to, jet si‐katoy mengibediw son si‐kara.
5 Siya, say biyag jo niman, nam‐ay, ja kayoka mandaddadsak. Nem no ka‐onoran alin akew, ikaro jo. Singa inges jo sota kalniron timaba ni pangan ni edet, nem eg to amta ey mepalti gayam ali.
6 Si‐kayo, inpabasolan jo iray toon enshiy basol sha; inpabonoyo pay i eshom. Jet sajay, in‐onod sha tep enshiy baal sha son si‐kayo.
Pan‐anos kayo et niman na timpo; panshawat kayo son Apo Shiyos
7 Si‐kayon a‐akik shi pamati, pan‐anos kayo nin, ingkatod idaw mowan ali nen Apo Jesus. Jet say nemnemnemen jo koma ja i‐arigan jo so ni anos jo, sota toon nanmola: toka enosin mansesked ni i‐oran to, ja onsibog ni moleto, tan toka enosin mansesked mowan ni i‐apit to so. Eg on‐ekdas ni seked to tep amta to ey mapteng i panpa‐no‐an to ali.
8 Pan‐anos kayo ngo, karekayo medismaya, tep sota akew wa idaw mowan ali nen Apo Jesus, shanshani ma.
9 Isonga si‐kayon a‐akik shi pamati, karejo noy‐an i eshom ni joka pandikat, say enshiy jo ikaro son Apo Shiyos. Pannemnem kayo, ta kompormin oras i imotok ali ni kowis; singa ẃared sakepan ja shanshanin onsekep.
10 Si‐kayon a‐akik shi pamati, nemnem jo kari iyay. Sota ira para padto nonta bayag da ja engikowan ni esel nen Apo Shiyos, intoled shen inenosan i emin na digat ta mimotok son si‐kara. Isonga si‐kara koma ngoy onoran jo ja mengitoded tan mengenos ni digat.
11 Wara sota kowan tayo ey, “Sota toon eg to tinengdawan i digat ket mayshedjaw.” Kaspangarigan sota too nonta bayag da ja si Job; eg na‐opay ni pamati to, et amtayo ey mapteng i nanbanagan to, ja si‐katoy ka‐asan to ey si Apo Shiyos ket eg medokod i semek tan kaasi to.
12 Si‐kayon a‐akik shi pamati, mesepol la pati‐en jo iyay ta kasapolan na pasiya. Karejo iba‐ngat i sangba son Apo Shiyos, ono shiya dobong, ono kompormin ngaran. On‐anay sota esel la owen ono enshi ja isongbat jo. No owen, owen; no enshi, enshi. Sajay i pesing jo say enshiy jo ikaro di son Apo Shiyos.
13 No ẃara son si‐kayoy emandikat, mesepol la si Apo Shiyos komay pansheẃatan to ni tolong. Inges to ngo no ẃara son si‐kayoy edadsak, si Apo Shiyos i ikansiyonan to ni iyaman to.
14 No ẃara son si‐kayo i emansekit, to pa‐odop ali sota pangolo jod pamati, say ondaw ira di, ja sha ishawatan son Apo Shiyos, tan dag‐en sha sota sigod ja shaka pesing ja mengipojok ni dana, jet ingadnan sha pay i ngaran nen Apo Shiyos.
15 Sota shawat ta etaksholan ni pamati, si‐katoy kabol la kedsangan ni toon emansekit, tep pemapteng nen Apo Shiyos, tan kasta met sota basol la dingka to, mepekawanan.
16 Isonga mesepol la eg jo i‐emot i kompormin nanbasolan jo; nem ipodnoyo et shi eshom ma kait jon emati. Tan pan‐ireẃati joy sakey tan sakey son si‐kayo, say no ẃaray digat jo, ma‐kal. Ta sota shawat ni toon mapteng i ẃared nemnem to, asdeg ton ẃaray banag to.
17 Inges to ngo sota shawat nen Elias, ja para padto nen Apo Shiyos nonta bayag da. Too si Elias ja inges tayo, nem inpasnek ton nanshawat son Apo Shiyos ey eg koma on‐oran, jet eg imoran nga agpayso ni tedon tawen tan enem ma bolan.
18 Jet idi edabas mala iyay, asan mowan manshawat si Elias son Apo Shiyos ey on‐oran koma, jet imoran ali nga agpayso, jet nankebiyag ira may mola.
19-20 Si‐kayon a‐akik shi pamati, no ẃara son si‐kayoy inbi‐jag toy pamati to, i‐odiyo nodta sigod ja pamati to, ja itorong jo shi pansigshan to. Ta no eg may‐odi sotan na pamati to, kenshat ta shosa‐en nen Apo Shiyos. Jet sotan na toon mengi‐odi ni sakey ya too shi pamati, si‐katoy kabol la kepekawanan ni eshakel la basol to.