5
1 Niman ta annak shakejo ma nen Apo Shiyos, mesepol la say onoran jo, sota ogadi nen Apo Shiyos.
2 Mesepol la ẃaray semek jo ni olay shi sakey tan sakey. Nemnem jo ey si Cristo, ebadeg i semek to ngo son si‐katejo; isonga intolok toy bakdang ton metey para son si‐katejo. Saja engitodokan to ni bakdang to, may‐eshig ga daton ja piyan nen Apo Shiyos.
3 Si‐kayo, ta too kayo ma nen Apo Shiyos, karekayo ma memii ono mekileki, ono mandeka ni kompormin ensekig ga aramid, ono epaladon pengamkam ni ka‐iri‐irin, tan eg jo pay tabtabalen ira jay.
4 Tan pan‐anad kayo pay ni pesing jon mekitbal. Baka ẃaray ngaaw wa esel ja onbo‐day shi bongot jo, ono esel la enshiy silbi to, ono solsolog ja nayda‐kad. Ta aliẃen anam jon mandeka niyay. Say mesepol et mango, sota pan‐iyaman ni olay so nen Apo Shiyos.
5 Sigorado iyay: sota toon mabii, ono sota mandeka ni olay ni eshom ma ensekig ga aramid, eg mebedin na mayda‐kam shi pantoshayan nen Cristo, ono shi pantoshayan nen Apo Shiyos. Jet angken pay sota toon magamkam ni kompormi, eg mayda‐kam met laeng, ta saja toka kamkamkami, si‐katoy singa shiyos to.
6 Karejo patpati‐en sota kowan ira nonta eshom ey palobos sa dag‐en ira jay ya edogit ta aramid, ta sota ensekig ga aramid i kabol la shosa‐an so nen Apo Shiyos so nonta ira eg memati.
7 Isonga si‐kayon emati, karekayo mekikadkadẃa so ni toon ensekig i aramid to.
8 Ta nonta eg kayo pay laeng emati, may‐eshig ey ẃara kayo shi embolinget, nem niman ta emati kayo, may‐eshig ey ẃara kayo med emanniyal. Isonga say dag‐en jo koma, sota anam ni toon ẃared emanniyal.
9 Ta sota toon ẃared maniyal, si‐kara sota mandeka ni mapteng nga aramid, tan sota kostoy pesing sha shi kait sha, tan podnoy ikowan sha.
10 Isonga si‐kayo, say mesepol la dag‐en jo, ashal jo no ngarantoy mengi‐kan ni pan‐imdengan nen Apo Shiyos, say si‐katoy nemnemen jo.
11 Araẃi‐i jo sota aramid ja kedagdag‐a ni toon ẃara pay laeng shi embolinget, ta enshiy silbi nontan. No diket say pesing jo koma, ikowan jo et i nankolangan sha, say amta‐en sha.
12 Sota aramid ja kai‐em‐emot ira niya toon eg emati, angken eg maykowan shiya solat ko, ta kabebaing nga pasiya.
13 Nem sota aramid ja ngaaw, no mesokalan, amta‐an ira nonta dimaga so i itsora nontan na basol sha et balang nem ibi‐jag sha ma.
14 Sajay i kaytoshongan nonta kowan to ey, “Si‐kam ma may‐eshig ey na‐ogip, bangon ka, panpawil ka did patey, jet si Cristo, deẃagan toka.”
15 Asas joy itsora ni biyag jo: aliẃen jo ba‐ba‐ngaten i daga ni angken nganto, ja singa enshiy amtayo, no diket pannemnem kayo nin.
16 Iringan jon mengikowan so nonta ira eg memati, ta say timpo niman, emankema‐ma ja emanngaaw i kedagdag‐a ni totoo.
17 Isonga pannemnem kayo et asas jo no ngantoy piyan nen Apo Shiyos ja dag‐en jo.
18 Aliẃen sota boteng i jo dagdag‐en, ta sotan i panshoki‐an ni aramid ja ngaaw. Say mapteng nga onoran jo ni olay, sota itorong ni Ispirito Santo.
19 No mesa‐nop kayo, ikansiyon jo sota kansiyon ja pengiredjaw son Apo Shiyos, pati sota ira salmo, ta si Apo Shiyos i emengitneng. Jet angken mansisi‐jan kayo, pan‐imdeng kayo met laeng ja singa kayoka mankankansiyon shi poso jo.
20 Angken ngantoy medeka son si‐kayo, pan‐iyaman kayo ni olay so nen Apo Shiyos ja Ametayo, jet maykadẃa ni olay i ngaran nen Jesucristo ja Apo tayo.
21 Pan‐i‐inanos kayo kabol ni joka pengipateg son Cristo; karejo ipilit i kostoyo.
22 Si‐kayon bibii ja ẃaray aseẃa to, patiyoy aseẃayo ja inges toy joka pemati so nen Apo Jesus.
23 Ta say pangolo ni bii, sota aseẃa ton daki ja inges toy kepengipangolo nen Cristo so nonta ira emin na emati ja may‐eshig ey bakdang to. Nem ẃaray eg kay‐ingesan ni daki son Cristo, ta si Cristo met i engisedakan so nonta ira emati.
24 Nem mesepol met laeng ja si‐kayon bibii, pati‐en joy aseẃayon daki, ja inges toy kepemati ira nonta emati so nonta kowan nen Cristo.
25 Jet si‐kayo ngon daleki, semek jo ni olay i aseẃayo, ja inges toy semek nen Cristo son si‐katejon emati son si‐kato. Ta sajay met i kabol la intolokan to so ni bakdang to ja metey para son si‐katejo.
26 Sajay i dingka nen Jesus, say sota emati son si‐kato, ẃara ma ira so nen Apo Shiyos. Jet nonta ineẃat to ira, dininisan to ira ni basol sha nonta esel to met laeng, tan singa dininisan to pay ira ni shanom nonta inkabonjag sha.
27 Pemapteng to ira say mapteng nga pasiya i pengidmang to ali son si‐kara. Piyan ton enshiy kolang sha, ono kompormin sha kebedawan, no diket inges sha mala i ogadi nen Apo Shiyos.
28 Isonga si‐kayon daleki ja ẃaray aseẃa to, mesepol la ensemek jo ni olay i aseẃayo ja inges toy joka penmek ni bakdang jo. Sota dakin ensemek toy aseẃa to, singa ensemek to shorog ngoy bakdang to, ta sota san‐aseẃa, singa saksakey i bakdang sha.
29 Enshiy toon en‐oges to shorog i bakdang to, no diket toka ajowani, ta ensemek to. Inges niyay i kepesing nen Cristo son si‐katejon emati son si‐kato,
30 ta si‐katejon emati, may‐eshig ey nay‐eshom kito shi bakdang to.
31 Sajay i kaytoshongan nonta esel nen Apo Shiyos nonta bayag da ja naysolat ja kowan to ey, “Sota daki ja mengesawa, idekjas toy ameto, tan ineto, jet en maymongsan so nen aseẃa to. Jet sotan na showen bakdang, manbedin ma ni sakey.” Kowan nonta esel nen Apo Shiyos.
32 Eshakel i kaytoshongan niyay ya toro, nem say epateg ja piyan kon amta‐en jo, maytoshong iyay so nonta ira emati ja naykasakey so nen Cristo.
33 Nem ẃara met laeng i kaytoshongan to son si‐kayo ja ashalen jo koma. Si‐kayon daleki, mesepol la ensemek jo ni olay i aseẃayon bii, ja inges toy joka penmek ni bakdang jo. Jet si‐kayo ngon bii, patiyo sota kowan ni aseẃayon daki.