10
Aliẃa kamin basta toon abos, nem eg shinotokan shakami nen Apo Shiyos ja manbedin ni apostol
1-2 Niman, iyay i ikowan ko so ni eshom son si‐kayo shita Korinto ja eg makakosto son si‐kak, ja makakowan ey sota aramid ko ket aramid met laeng ni karakdan, ja ekak mepiyal kono. Si‐kak si Pablo, nem ekak ipakat i kina‐apostol ko son si‐kayo, no diket ibabak i bakdang ko ja mekikaasi son si‐kayo. Tep mesepol la onoran ko si Cristo ja dododop ni olay i inpasing to so ni totoo. Sota eshom son si‐kayo, kowan sha kono ey ekombaba‐ak no ẃara‐ak son si‐kayo, nem no araẃi‐ak son si‐kayo, embel‐at konoy naka pemidin son si‐kayo shi solat. Sheẃaten ko son si‐kayo ey manbebawi kayo, say no ondawak da son si‐kayo, eg mesepol la ito‐to‐ẃak ja pebel‐at i pemidin ko son si‐kayo.
3 Agpayso ja say kawad‐an mi niman, shiya dobong. Nem eg kami manshinel nonta ogadi ni karakdan na too shiya dobong ni pekileban mi so nonta ira makakontra son Cristo.
4 Sota singa almas ja mika osala ni pekileban mi son si‐kara, aliẃen na inges to sota almas ni tood ja dobong, no diket sota panakabalin nen Apo Shiyos i mika osala. Isonga kamika mengebak ni olay ja meneshal nonta angken nganton singa kaontiped son si‐kami.
5 Say pangkep mi, ibaba mi sota kowan sha ey matekal, ono etangsit, ja eg makakoston mengamta so nen Apo Shiyos. Piyan min angken sipa, say nemnemen sha bengat, sota piyan nen Cristo, say si Cristoy pati‐en sha.
6 Jet sota toon memasig, ja eg mebidin, esagana kamin memidin son si‐kato. Nem asen mi nin son si‐kayo no sipay mematin kosto son Cristo.
7 Sigosho say kabol la eg jowak so pati‐an, sota kakapoy ni bakdang koy joka nemnemnema. Nem no ẃara son si‐kayo i toka ibilang shorog i bakdang to ey too nen Cristo, mesepol la nemnemen to ey angken si‐kami ngo, too shakami nen Cristo ja inges to.
8 Nem si‐kak, ẃaray nandasinan ni saad ko. Isonga angken bilang ey ẃaray edabas ja naka ikowan pangkep niya saad kon in‐awat nen Apo Jesus son si‐kak, agpayso. Say kowan nen Apo Jesus ey dag‐en ko, sota ontolong son si‐kayo say onkedsang i pamatiyo, aliẃen sota peneshal son si‐kayo.
9 Jet ekak koston nemnemen jo ey takejoka panta‐kota nodta insolat ko la.
10 Nem ẃara met son si‐kayo i makadedamsis son si‐kak, ja kowan sha kono ey, “Si Pablo, makedsang noman i solat to, ja ẃaray banag to, nem pampamaayan met kari i bakdang to no mismon ẃared jay, angken sota toka pan‐a‐sel!” Kowan sha kono.
11 Nem no sipa sotan na toon engikowan niyay da, mesepol la eẃatan sha koma ey enshiy na‐apilan nonta insolat ko no enshi‐ak, tan sota dag‐en ko ni kawashak son si‐kara. Ta sota insolat ko, ja kowan sha kono ey emena‐ta‐kot bengat, sotan met laeng i dag‐en ko ni kawashak son si‐kara!
12 Aliẃen na mika pan‐i‐inges i bakdang mi so nonta ira toon kowan sha ey si‐karay kamaptengan. Eg mi i‐eshom i bakdang mi nodta shaka pesing nga mengi‐tek. Ta sotan iren too, enshiy am‐amtara! Say shaka pengilokori ni amtara, sota inges sha; isonga kowan sha ey si‐karay kamaptengan.
13 Nem si‐kami, eg mi iba‐ngat i dastog, eg mi da‐to‐an sota obden in‐akan nen Apo Shiyos son si‐kami. Nem si‐kayon i‐Korinto i sinekopan niyay ya obda mi.
14 Wara met i nebeng mi son si‐kayo, ta si‐kami met i pilmiron dimaw son si‐kayo ja engikowan ni mapteng nga shamag maypangkep son Cristo.
15 Aliẃen kowan mi ey obda mi sota inobda ni eshom, ta enshiy mi kaybiyangan nodtan. Nem shita Korinto, say namnama mi, no onkedsang koma i pamatiyo, mebedin na si‐kami mowan may nemnemnemen jo.
16 Ta piyan min mengitosho pay nonta shamag pangkep so nen Cristo shima dogad ja medabsan i kad‐an jo. Jet si‐kayo komay mengisekot son si‐kami. Ta say obda ja mika idastog, sota obda ja dingka mi, aliẃen sota obda ni eshom.
17 Nem agpayso noman sota naysolat nonta bayag da, ja kowan to ey, “Sota toon piyan ton mandastog, say idastog to koma, sota kekosto‐i nen Apo Shiyos son si‐kara.”
18 Isonga sota mengisekot shorog ni bakdang to, karejo pati‐en; say koskoston pati‐en jo koma, sota insagot nen Apo Shiyos.