6
Eg kayo koma ondaw shi paganon kowis say tongtongen shay kaso jo
1 No kaspangarigan ey ẃara son si‐kayon emati i eg man‐inawatan, apay enshiy baing jo aya ja jo petongtong iyay ya kaso jo so nonta ira kowis ni ili? Pagano met ira! Apay nga eg jo ngo olnosen shorog i eg jo pan‐inawatan?
2 Apay eg jo aya amta ey si‐katejon emati i mengitoshay ali niya dobong? Jet no si‐kayon emati i mengigsheng no ngarantoy medeka so ni totood ja dobong ingkatod ingka, apay eg jo aya posi‐en i angken otik ka banag ja tongtongen?
3 Apay eg jo aya amta ey no ka‐onoran ali ket itorayan tayo ali sota ira anghil? No kabaalan jo alin itorayan sota ira anghil, apay eg jo et ngo kabaalan ira ta kokonting nga banag niman?
4 No ẃaray kaso jo, apay nga ondaw kayo so nonta ira eg jo patkan i kowan sha, ja si‐kara et ngo mowan i menongtong son si‐kayo?
5 Sajay i inkowan ko ta kabebaing itan na joka pesing. Apay enshi ngoy angken sakey son si‐kayo ja ẃaray amta to ja ontongtong met laeng son si‐kayo ni eg jo pan‐i‐inawatan?
6 Nem si‐kayon san‐a‐aki shi pamati, say joka pengitongtongi ni kaso jo shorog, shima toon enshi et ngo mowan i pamati to, jet si‐karay kaontongtong so!
7 Sajay ya joka panshiringkol, si‐katoy ka‐asan to ey singa eg jo benolan i pamatiyo met laeng. Say mapteng nga pesing jo koma, eg kayo mekiringkol; angken ontolok kayon ma‐ebak, angken doko‐en shakejo.
8 Nem si‐kayo, ngaaw met ngo i aramid jo, jet joka pandoko‐a ira sota mismon agi jo shi pamati!
9-10 Amtayo met ey sota toon ngaaw i aramid to, eg mayda‐kam shi pantoshayan nen Apo Shiyos. Isonga aliẃen sota ngaaw wa aramid i jo dag‐en, ta naytopoy nemnem jo no kowan jo ey baybay‐an nen Apo Shiyos sotan na basol. Ta sota mabii, sota maleki, sota emay‐a‐shom so nonta ira ensekig i shaka dagdag‐a shima timplo ni pagano, tan sota daleki ja kait ton daki met laeng i shaka eshola, eg ira mayda‐kam shi pantoshayan nen Apo Shiyos. Kasta met sota makibot, sota magamkam ni kompormi, maboteng, masomang, mengolbod ni kokowa ni eshom, eg ira ngo mayda‐kam.
11 Waray eshom nontan da son si‐kayo ja inges niyay i aramid to. Nem niman ma, ta emati kayo son Apo Jesucristo, tan ẃara sota Ispirito Santo nen Apo Shiyos son si‐kayo, epakaẃanan ira jay den aramid jet may‐eshig ey edinis kayo ma. Too kayo ma nen Apo Shiyos, ja para mansilbi son si‐kato, jet si Apo Shiyos, kinosto‐an tokejo ngo.
Aliẃa komen ekotay i pannemnem jo maypangkep ni pengeshem
12 Owen, agpayso sota kowan jo ey si‐katejon emati, palobos ja mebedin na dag‐en tayon emin. Nem aliẃen emin na dag‐en ket, ẃaray i‐akan ton panmaptengan tayo. Isonga no si‐kak, ekak itolok ja sotan et ngo mowan i onsekdin shi naka pansilbi son Apo Jesus.
13 Say dason jo, kowan jo ey, “Nganto mangoy epalsowa‐an ni bakdang, no aliẃen para pengeshem?” In‐arig jo pay i ekes, ja kowan jo ey, “Say ekes, kay‐iyanan ni mekan; tan say mekan, ondaw shi ekes.” Nem say bakdang, aliẃen na para pemii ono pekileki, no diket para son Apo Jesus tep si Apo Jesus, si‐katoy makakokowa ni bakdang. Nemnem jo iyay, ta no ondaw ali mowan si Cristo, mesa‐datan iya sigod ja bakdang, pati sota istay tayoka dagdag‐a.
14 Si Apo Shiyos, inpanbiyag tos Apo Jesus shi patey, jet panbiyag shakito ngod patey ni panakabalin to.
15 Apay eg jo aya amta ey say bakdang jo ket, parti ni bakdang nen Cristo? Isonga no si‐kak, eg mebedin na sota parti ni bakdang ko, ja parti met laeng ni bakdang nen Cristo ket, nak osalen ja i‐eshom so nonta bakdang ni biin maleki. Ayshi — eg mebedin sotan!
16 Apay eg jo aya amta ey sota toon nay‐eshom so nonta biin maleki ket, naykasakey son si‐kato ja singa saksakey may bakdang sha? Ta say kowan ni naysolat nonta bayag da, kowan to ey, “Sota showen bakdang, no man‐a‐shom, saksakey ma.”
17 Nem sota emati ja naykasakey son Apo Jesus, saksakey ma i nemnem sha nen Apo Jesus.
18 Isonga karekayo memii ono mekileki; araẃi‐i jo ira jay ya aramid. Ta sota mabii, bakdang to shorog i dino‐shis to. Sota eshom ma basol, eg ma‐apiktaran i bakdang ja inges niyay.
19 Baka et ey dinibkan jo ey say bakdang jo ket, Timplo ni Ispirito Santo ja inpan‐iyan nen Apo Shiyos son si‐kayo. Isonga say bakdang jo, aliẃen kokowayo.
20 Si‐kayo, may‐eshig ey tinongkal shakejo nen Apo Shiyos ni epalit; isonga say dag‐en jo koma, sota kayshedjawan nen Apo Shiyos.