53
Peopo Dat Do Bad Kine Stuff
One David kine song fo make peopo tink plenny, fo da main music guy sing wit da flute
1 Inside, da stupid peopo tink,
“No mo God!”
Dat kine peopo,
Dey ony like bus up stuff.
An do pilau kine tings,
No mo even one a dem
Dat do good kine stuff!
2 God look down from inside da sky,
He see all da peopo.
God look fo see if get even one guy
Dat undastan wass happening
Fo real kine,
An dat like know God fo real kine.
3 But no mo dat kine peopo.
Erybody same same,
Dey like bag from God,
Dey all come pilau inside,
No mo even one a dem
Dat do good kine stuffs!
4 Dem guys dat stay do bad kine tings,
How come dey neva learn notting?
(But fo shua dey know!)
Fo dem, easy fo bus up my peopo,
Az jalike easy fo eat food.
Dey no tink dey need fo yell
To Da One In Charge fo help dem.
5 Bumbye, someting goin happen ova dea
Fo make dem guys come real sked,
Mo plenny sked den was befo time.
Cuz wen da peopo dat stay agains you
Put dea army camp in front you,
You goin make dem all come shame.
An God goin kill um
An throw dea bones all ova da place,
Cuz he tell “Laytas” to wat dey do.
6 Fo shua! I like God do someting—
Da God dat stay Mount Zion side—
Fo get da Israel peopo
Outa trouble real quick!
Cuz bumbye,
Wen God make eryting come good
One mo time fo his peopo,
Erybody dat come from Jacob
Goin yell cuz dey feel good,
Dey da Israel ohana,
An dey all goin come good inside!