38
One Guy Pray Cuz He Stay Suffa
One David kine song fo tell Da One In Charge fo no foget us guys
1 Eh! You Da One In Charge!
Wen you tell me
I stay do someting wrong,
No come real huhu wit me
Wen you give me lickins
Fo teach me stuff!
2 I stay plenny sore inside,
Jalike you wen shoot me wit arrows.
I feel jalike I all bus up,
Jalike you wen false crack me.
3 Cuz you stay huhu wit me,
All my body stay sick.
Cuz I wen do bad kine stuff,
I no can feel good.
4 I know you gotta punish me
Fo wat I wen do,
But I no can handle dat.
Jalike I gotta carry someting
Real heavy.
5 Cuz I wen ack stupid an do bad tings,
All da places I stay bleed,
Pilau an haunas awready.
6 I no can stan up strait, cuz real sore.
Ery day, I feel sad,
Jalike wen somebody mahke.
7 I feel jalike I get one fever inside me,
An I stay real hamajang.
8 I stay real tired an bum out to da max.
Cuz I stay sad inside,
Dass why I stay moaning.
9 Eh Boss! Fo shua you know
All da tings I like happen to me.
An erytime I moan, you know dat too.
10 My heart stay pounding real fas,
An I no stay strong no moa.
My eye stay come poho.
11 Da peopo I get love an aloha fo,
An my frenz,
Dey all stay far, cuz dey sked
Dey goin get da same kine sick
Jalike me.
Even my ohana peopo,
Dey no come close.
12 Same time, da guys dat stay agains me
Put up one trap fo catch me.
Dey make one plan fo wipe me out.
All day, dey figga how fo bulai me
Fo kill me.
13 But no matta da bad tings
Dey tell dey goin do,
I make deaf ear to dem.
In front dem, I no tell notting,
Jalike I one guy dat no can talk.
14 I tink mo betta I no hear notting,
An I no ansa dem notting.
15 Eh! You Da One In Charge! I make lidat,
Cuz I stay waiting fo you do someting!
Eh God! You da Boss fo me,
Az why you da one gotta do someting!
16 I wen pray to you lidis:
“No go let da guys dat stay agains me
Tink dey wen win ova me!
No let um feel good inside
If someting bad happen to me!”
17 But now, I ready fo fall down,
An I stay sore all da time.
18 But I goin tell you dis fo real kine:
“I wen do bad tings.
Now, I real sorry cuz a wat I wen do.”
19 Get plenny peopo dat stay agains me.
Dey hate me,
No matta I neva do notting
Agains dem.
20 I do good tings fo dem,
An dey do bad tings fo pay me back.
Dey agains me,
Cuz dey know I like do wass right.
21 Eh! You Da One In Charge!
No bag from me!
Eh you da God fo me!
No stay far away from me!
22 You da Boss fo me,
Da One dat get me outa trouble.
So, come quick fo help me!