140
No Let Da Bad Peopo Hurt Me
Fo da main music guy, one David kine song
Da Guys Dat Stay Agains Me, How Dey Ack
1 Eh! You Da One In Charge!
Help me get away
From da bad kine peopo.
Da guys dat like bus up peopo,
No let um hurt me.
2 Dem guys, dey erytime make plan
Fo do bad tings,
An all day dey go afta peopo
Fo make um fight each odda.
3 Da stuff dey tell can kill you,
Jalike one snake bite.
Wen dey open dea mout,
Eryting dey tell,
Jalike da poison from da cobra snake.
(Time out fo da music.)
4 Eh! You Da One In Charge!
No let da bad guys catch me!
No let da guys dat like bus peopo up,
Hurt me,
Cuz dey make one plan fo take me down.
5 Get peopo dat ack high makamaka
Dat like put trap fo catch me.
Dey spread out one rope net fo grab me.
Dey put plenny trap
Fo catch me by da road.
(Time out fo da music.)
Eh God, No Let Me Get Hurt
6 I tell Da One In Charge dis:
“You, you da God fo me!”
Eh! You Da One In Charge!
Wen I tell you fo help me, try lissen!
7 You Da One In Charge!
You da Boss fo me!
You strong fo get me outa trouble.
You make shua I no get hurt
Wen get war.
8 Eh! You Da One In Charge!
No let dose bad peopo do
Da kine tings dey like do to me.
Eh God! Da tings dey plan fo do,
No let um do um.
(Time out fo da music.)
Wipe Out Da Peopo Dat Stay Agains Me
9 No let dose guys stan aroun me
An ack jalike dey da winna!
Da kine trouble dey tell
Dey like do to me,
Let um happen to dem, not me!
10 Make hot burning wood
Fall down on top dea head.
Throw um down inside da fire,
O inside holes wit mud inside
Wea dey no can get out.
11 No let da ones dat talk bad
Bout odda peopo get respeck
Hea inside oua land.
Da bad peopo dat like bus up erybody,
Make bad tings come to dem,
Ova an ova!
12 But I know dis: You Da One In Charge,
An you da Judge dat goin help
Da peopo dat no mo notting.
You goin make shua
Dat da pooa peopo get dea rights.
13 An dis fo shua too:
Da peopo dat erytime
Do da right ting,
Dey goin tell good tings bout you
Cuz dey know who you.
Da ones dat do wass right,
Dey goin live togedda wit you.