3
Da Leada Guys Do Pilau Kine Stuff
1 Den me Micah tell:
“Lissen up, you leada guys dat come from Jacob,
You guys dat stay in charge a da Israel ohana.
You da guys suppose to know wass right an wass wrong, aah?
2 But you guys, you hate da good kine stuff,
But get love fo da bad kine stuff!
You guys pull da skin off my peopo
An take da meat off dea bones!
3 Jalike you guys eat da meat off my peopo,
You cut dea skin fo make strips.
Afta dat you guys broke up
Dea bones fo make um small.
You cut um up an put um all inside one pot
Fo cook da meat on top da fire.
4 Bumbye, dose leada guys goin yell real loud
Fo Da One In Charge help dem.
But he no goin ansa dem!
Dat time he goin hide his face from dem guys,
Cuz a all da bad kine stuff dey wen do.”
5 Dis wat Da One In Charge tell
Da bulaia guys dat tell dey talk fo him:
“You guys stay lead my peopo wrong way!
Wen somebody give dem someting fo eat,
Dey tell, ‘Eryting okay!’
But wit whoeva no give dem notting
Dey start one war!
6 Az why nite time goin make eryting dark fo you guys.
You guys no goin dream notting.
Goin come all dark,
So you guys no can make ceremony fo find out
Wass goin happen afta.
Da sun goin go down fo you guys dat tell you talk fo me,
Wat you guys stay do no goin be lidat no moa!
7 “Da guys dat tell dey see wat odda peopo no can see,
Goin come shame.
An da guys dat tell wat goin happen,
Dey all goin lose face,
Cuz God no tell dem notting dey aks um about.”
8 Den me Micah tell,
“Fo shua, wit da spirit from Da One In Charge,
I stay real strong,
He help me figga wass right an wass wrong,
An make me come strong
Fo tell da Jacob an Israel peopo
All da bad kine stuff dey stay do.
9 “Lissen up now, you leada guys dat come from Jacob,
An you main guys dat stay in charge a da Israel ohana!
You guys tink az pilau, wen da judges judge da right way!
You guys take eryting dass right,
An make um come all kapakahi.
10 You guys kill peopo fo you build up Mount Zion,
An judge da wrong way fo you build up Jerusalem town.
11 Dea main guys take unda da table kine money
Fo judge dat da guy dat pay um, he da one stay right.
Dea pries guys teach da Rules from God,
But ony if da peopo pay um too.
Da guys dat tell dey talk fo God,
Make da peopo pay fo tell dem wat goin happen.
But same time dey talk bout how dey trus Da One In Charge, an tell:
‘Da One In Charge stay hea wit us guys.
So no mo notting bad goin happen to us guys!’
12 Fo shua, cuz a you guys,
Da peopo dat stay agains us goin plow Mount Zion jalike az one field.
Jerusalem town goin come all bus up.
Da hill wea da Temple Fo God stay,
Goin get ony bushes all ova.”