9
1 I like my head come jalike one spring fo watta,
An my eyes jalike one fountain fo my tears come out!
Cuz I like cry plenny, day time an nite time,
Cuz plenny peopo get kill, an dey my peopo.
2 Too bad no mo one place inside da boonies
Fo me stay dea nite time.
Den fo shua I can go way from my peopo
An stay ova dea.
Cuz all my peopo fool aroun wit odda gods
Jalike dey fool aroun wit peopo dat not dea wife o husban.
You no can trus dem cuz dey bulai.
3 Dis da message from Da One In Charge: “Dey get dea mout ready fo bulai,
Jalike how you make one bow ready fo shoot arrows.
An cuz dey bulai an you no can trus um,
Az how dey win inside da land.
Dey do one bad kine ting, an den anodda bad kine ting.
But me, Da One In Charge, dey donno who me!”
4 Da One In Charge tell, “You guys betta watch out fo yoa frenz!
No trus yoa braddah guys.
Cuz ery braddah like take away da rights from da odda braddahs.
An ery fren, dey like talk bad bout you.
5 Ery fren bulai dea fren.
No mo nobody tell da trut.
Dey teach dea tongue fo bulai.
Den dey come tired
Cuz dey make eryting come hamajang.
6 Wea you live, erybody bulai erybody.
An cuz dey bulai,
No way dey goin tell dat I dea God.”
Az da message from Da One In Charge.
7 Az why dis wat Da One In Charge, da God Ova All Da Armies, tell:
“Look! I goin tes dem
Jalike wen peopo melt metal fo tes if stay good o no good.
Dass da ony ting I can do!
Cuz I get love an aloha fo my peopo.
But dey wen go do plenny bad kine stuff!
8 Wateva dey tell, az jalike one poison arrow
Cuz dey bulai.
Dey tell dea frenz, ‘I like eryting come good fo you,’
But inside, dey make plan fo jump um an kill um.
9 You tink I no need punish dem fo all dis stuff?!
I goin punish um!
You tink I no need pay back dat kine nation fo dis?!
I goin pay um back!”
Az wat Da One In Charge tell.
Sad Song Fo Judah An Jerusalem
10 Jeremiah tell: “Wen I tink bout da mountains, I like cry an make big noise.
I goin sing sad songs bout da mahke peopo,
Cuz a da grass inside da boonies
Wea da sheep guys wen stay wit dea sheeps.
Da grass stay all burn up,
No mo nobody go thru dea.
You no hear da noise from da cows no moa.
Da birds an all da animals,
Dey run away awready.”
11 Da One In Charge tell, “I goin make Jerusalem town come one rubbish pile.
Ony goin get wild jackal dogs ova dea.
I goin wipe out da Judah towns
Fo no mo nobody live ova dea.”
12 Nobody stay smart enuff fo undastan all dis! No mo nobody dat Da One In Charge wen teach fo da guy tell wat all dis mean! How come da land stay all wasted an burn up jalike da boonies fo no mo nobody go thru dea?!
13 Da One In Charge tell: “Az cuz dey no like follow my Rules dat I wen give um. Dey no like lissen wen I talk, an dey no do wat da Rules tell.
14 But da way dey live, dey ony hard head fo wateva dey like do. Dey pray to da Baal kine idol gods, jalike dea ancesta guys wen teach um.
15 Az why dis da message from Da One In Charge, da God Ova All Da Armies, da God fo da Israel peopo: ‘Dis wat I goin do. I goin make dis peopo suffa, jalike I give um da kine food dat taste real bad fo eat, an poison watta fo drink.
16 I goin let plenny diffren peopos make da Israel peopo prisonas—da kine peopos dey donno. Da Israel peopo ancestas, dey neva know bout um befo time too. I goin sen peopo fo chase um wit swords till I wipe dem out.’ ”
17 Dis anodda message from Da One In Charge, da God Ova All Da Armies:
“Tink plenny bout dis!
Tell da wahines dat know sad kine funeral songs fo come.
Call da wahines dat know how fo cry da bestes.
18 Tell um come quick fo cry loud
Cuz us guys goin mahke.
Dey gotta cry till us guys cry too,
Jalike one riva come out from oua eye.
19 Can hear da crying come from inside Jerusalem,
Da peopo tell, ‘Us guys all bus up!
Us guys stay shame!
Us gotta give up oua land,
Cuz da peopo dat stay agains us
Wen bus up oua houses!’ ”
20 Now, you wahines, lissen up wat Da One In Charge tell!
Open yoa ears fo hear!
Teach yoa girls how fo cry.
Teach each odda da funeral songs.
21 Teach um lidat, cuz da way us stay now,
Jalike oua enemy guys stay come inside thru oua windows fo kill,
An inside oua strong wall.
Jalike fo wipe out da kids on top da streets
An da young guys inside da parks.
22 So tell um, “Dis, da message from Da One In Charge:
Da mahke bodies all ova da place,
Jalike rubbish all ova da country side.
Da mahke bodies jalike wheat dat some guy wen harves,
But no mo nobody dea fo pick um up fo bury um.”
23 Dis wat Da One In Charge tell:
“Da guy dat know wat fo do erytime
No good fo him talk big dat he know wat fo do.
Da guy dat know how fo fight
No good fo him talk big dat he know how fo fight.
Da rich guy, no good if him talk big bout how rich him.
24 But anybody like talk big,
Good he talk big bout dis,
Dat he undastan me an know me,
Cuz he know dat me Da One In Charge,
An I help peopo stay tight wit me,
An judge da right way erytime,
An do da right kine ting inside da world.
Cuz da kine peopo dat make lidat,
Make me stay good inside!”
Az wat Da One In Charge tell.
25 Anodda message from Da One In Charge: “Da time goin come
Wen I goin punish all da guys
Dat get da cut skin mark ony on top dea body
But dey no mo notting inside fo show dey my peopo:
26 Da Egypt guys, da Judah guys, da Edom guys,
Da Ammon guys, da Moab guys,
An all da ones dat live inside da boonies
Dat cut dea hair spesho fo dea gods.
All dose peopos, an all da Israel guys, dey cut skin,
But dey no mo da mark inside dem
Dat show dey my peopo.”