51
Mo Plenny Trouble Fo Babylon
(2 Corint 6:16)
1 Dis wat Da One In Charge tell:
“Look! I stay ready fo make somebody
Wipe out Babylon town an da Babylon nation.
2 I goin sen guys from odda places to Babylon town.
Dey goin chase da Babylon peopo all ova da place,
Jalike da wind blow away da junks from da wheat,
Dey goin wase da Babylon land.
Wen time fo wipe out Babylon town,
Dey goin attack ery side.
3 No give da Babylon bow an arrow guys time fo make ready.
No let dem put on dea body armor.
No show pity fo da young Babylon guys.
Kill all dea army guys jalike dey one sacrifice.
4 Da Babylon guys goin fall down an mahke.
Dey goin get poke wit spear all ova da streets.
5 Cuz Da One In Charge, da God Ova All Da Armies,
He no goin bag from da Israel an Judah peopo,
Jalike one husban leave his wife wen he mahke.
No matta da Israel an Judah peopo get plenny blame fo wat dey do,
Da way Da One In Charge see um,
He da Good An Spesho God fo da Israel peopo.
6 “Run! Get outa Babylon!
Run fo stay alive, all you guys!
No good you guys come wipe out
Cuz a da bad kine stuff da Babylon guys stay do!
Cuz az time awready fo Da One In Charge pay dem back
Fo wat dey wen do.
7 Da One In Charge wen use da Babylon peopo
Fo punish da whole world!
Jalike he stay give um one gold cup
Fo make da whole world come piloot.
Jalike all da peopos suck up da wine
Dat da Babylon guys give um,
Az why all da nations come pupule!
8 Wen da Babylon peopo tink notting bad goin happen,
Right den an dea dey goin fall down an come all bus up!
Cry fo da Babylon peopo!
Bring medicine cuz dey hurt!
Maybe dey can come good.
9 “Da peopo from anodda place dat live Babylon side tell,
‘We wen try fo make da Babylon peopo come good.
But dey no can come good.
Mo betta us bag from Babylon
An go back oua land.
Cuz wen God punish da Babylon peopo,
He goin do um big time,
Jalike he pile um up all da way to da sky,
To da top a da clouds!’
10 Da One In Charge wen make erybody see
Dat us Israel an Judah guys get um right wit him.
Go come, we go tell da Israel an Judah Guys story Jerusalem side,
Wat oua God, dass Da One In Charge a us, wen do.”
11 Da ones dat goin attack Babylon tell,
“Make yoa arrows sharp.
Fill up yoa arrow bags!
Da One In Charge wen put one spirit inside da kings fo da Mede peopo
Dat make um like do someting.
Az cuz he make up his mind,
Fo wipe out Babylon.
How come Da One In Charge goin pay dem back, aah?
He pay um back
Cuz a wat dey wen do to his Temple!
12 “Put up one flag fo yoa army guys
Fo tell um attack da Babylon town wall!
Put mo plenny guard guys aroun da town!
Tell da watcha guys wea fo stan!
Hide army guys fo dem stay ready
Fo jump da Babylon guys!
Da One In Charge tell all dis
Cuz he make one plan awready agains da Babylon peopo,
An he goin do wat he wen promise fo do.
13 You guys dat live by da big rivas an watta ditches,
You guys dat get plenny rich kine stuffs,
Pau awready fo you guys!
Time fo you guys get wipe out!
14 Da One In Charge, da God Ova All Da Armies,
Wen make one strong promise.
He da One goin make shua dat wat he tell goin happen, goin happen.
He tell: ‘Fo shua, I goin fill up you Babylon guys town wit plenny army guys,
Dat goin jump all ova you guys jalike wen get real plenny locust kine grasshoppas.
Dey goin yell cuz dey win ova you guys.’
15 “Da One In Charge wen make da earth,
Cuz he get da powa.
Da world stay how stay,
Cuz he da One make um lidat,
An cuz he know wat fo do erytime.
He spread out da sky
Cuz he know da bestes way fo make um lidat.
16 Da thunda, az his voice,
Da big noise from da watta inside da sky.
He make da clouds come up
From da mos far places on top da earth.
He make da lightning come wit da rain
He let da wind come outa his storage places.
17 “Erybody dumb, an dey donno how fo tink.
All da guys dat make stuff from gold
Ony come shame cuz a da idols dey make.
Da idol kine gods dey make, dey not fo real!
Dey no can breave!
18 Da idol kine gods, no worth notting!
Peopo make fun a dem.
God da Judge goin wipe um out.
19 Da One da Jacob peopo get fo be dea God,
He not jalike dose idol kine gods!
Cuz he da One wen make eryting.
He make da Israel ohana peopo fo come his peopo.
Dass Da One In Charge, da God Ova All Da Armies.
20 “You Babylon guys, you jalike my war club fo fight,
My war club fo make war.
Wit you, I goin use you fo bus up da peopos,
An fo wipe out kings an dea peopos.
21 I goin use you guys fo bus up da horses
An da guys dat ride um,
Fo bus up da war wagons
An da guys dat drive um.
22 I goin use you fo bus up da guys an da wahines,
Fo bus up da ol guys an da young guys,
Fo bus up da young guys an da young wahines.
23 I goin use you fo bus up da sheep guys an dea sheeps,
Fo bus up da farma guys an da cows dey use fo plow.
Fo bus up da govnas an da govmen peopo.”
24 Da One In Charge tell: “You goin see wat goin happen wen I pay back da Babylon peopo an erybody dat live ova dea fo all da bad kine stuff dey wen do inside Jerusalem town. An I goin do dat in front you Judah guys.”
25 Da One In Charge tell: “I da One stay agains you Babylon guys,
You jalike one volcano dat wipe out da whole earth.
I goin use my powa agains you,
An roll you off da cliffs.
I goin make you jalike one mountain dat stay all burn up.
26 Nobody goin even take one stone block from yoa town
Fo make one corna block.
An nobody goin even take one stone block from yoa town
Fo make one foundation.
Cuz yoa town goin stay all wipe out foeva!”
Az wat Da One In Charge tell.
27 “Put up one flag inside da Babylon land!
Blow da sheep horn trumpet
Fo tell da diffren peopos time fo attack!
Make da peopos come spesho fo me
Fo dem fight Babylon!
Call dese peopos fo go agains Babylon:
Ararat, Minni, an Ashkenaz.
Pick one officer guy fo take charge agains Babylon.
Sen plenny horses jalike az plenny locust kine grasshoppas.
28 Make da peopos ready fo fight Babylon.
Da Mede kings,
Dea govnas an leada guys,
An all da peopos wea dey stay in charge.
29 Da land shake an move jalike stay hurt,
Cuz Da One In Charge know wat he like do,
An fo shua he goin do um!
He goin wase da Babylon land,
So dat no mo nobody goin live ova dea.
30 Da Babylon army guys,
Dey no fight no moa.
Dey stay inside dea strong wall.
Dea powa all dry up.
Dey come jalike wahines.
Dea houses all burn down an dea town gates all broke.
31 One messenja guy come, den anodda, den anodda,
Fo tell da Babylon king all da bad kine stuff dat stay happen.
Dey tell um:
‘Get plenny army guys take ova yoa big town awready,
From one side to da odda side!
32 Dey take ova da places wea peopo walk ova
Da odda side a da riva!
Dey even burn da swamp!
Dass why da Babylon army guys come real sked!’ ”
33 Dis one message from Da One In Charge, da God Ova All Da Armies, da God fo da Israel peopo. He tell:
“Babylon town an da peopo dat live dea
Goin come jalike one flat place
Wea peopo clean da groun
Fo take da junk kine stuffs outa da wheat.
Wen da flat place all clean up,
Den da harves time almos ready fo come.”
34 Dis how da Jerusalem peopo goin talk:
“Nebukadnezzar, da Babylon king,
He eat up us Jerusalem guys.
He make us come hamajang.
He show erybody, dat us guys no mo notting,
Jalike us one empty pot.
He swallow us guys,
Jalike he one big monsta from inside da ocean.
He fill up his opu wit ery part a us dat taste good to him,
An den, he spit out da res.
35 ‘We like da Babylon peopo get da blame
Fo how dey wen bus up us guys an oua relatives.’
Az wat da peopo dat live on Mount Zion tell.
‘Dey get da blame fo make oua peopo bleed an mahke.’
Az wat da peopo dat live inside Jerusalem town tell.”
36 Az why Da One In Charge tell dis:
“You know wat?! I goin fight fo you guys.
I goin pay back da Babylon guys
Fo wat dey do to you guys.
I goin dry up da place dea watta come from
An make dea pukas fo watta come dry.
37 Babylon goin come one big pile a rocks from da ol buildings,
One place wea da jackal kine wild dogs can hide.
I goin bus up dis big town so no get notting dea,
An peopo goin come shock wen dey see Babylon.
An no mo nobody goin live ova dea.
38 Now, all da Babylon peopo roar togedda,
Jalike da lions befo dey hunt.
Da Babylon peopo growl
Jalike da small lions.
39 Wen da Babylon peopo all stay amping out,
Me, Da One In Charge, goin make one big party fo dem.
An dea, I goin make dem come all piloot an wasted,
Dey goin all pass out sleep foeva,
An no wake up.”
Az wat Da One In Charge tell.
40 Den Da One In Charge tell:
“I goin take da Babylon guys down to da killing place,
Jalike dey bebe sheeps, o boy kine sheeps, o goats,
Fo da butcha kill um.”
Wat Goin Happen To Babylon
41 Dis wat Da One In Charge tell bout Babylon town:
“You know wat?! Da army guys goin take ova Sheshak
(Az one secret name fo Babylon town)!
Dey goin take charge a da town
Dat peopo all ova da world talk good bout!
All da odda peopos goin come real sked
Wen dey see how Babylon town stay wasted!
42 Jalike da ocean goin come up ova Babylon.
An da big waves goin come in loud an cova up da place.
43 Da small towns aroun Babylon goin come wasted,
All dry up jalike da boonies,
Wea nobody live,
An nobody go thru dea.
44 I goin punish Bel, da god fo da Babylon peopo.
I goin make Bel bahf wat he wen swallow.
Da peopo no goin go Babylon fo pray to Bel no moa,
Jalike how was befo time.
Da Babylon town wall goin fall down too.
45 “Eh, my peopo! Get outa Babylon!
Run away fo stay alive!
Run, cuz Da One In Charge stay real huhu!
46 No lose fight! No come sked!
All ova da land, can hear peopo talk bout war.
Dey tink, maybe dis year, maybe nex year,
One king agains anodda king.
47 Cuz fo shua, da time goin come
Wen I goin punish da idol kine gods Babylon side.
Peopo all ova da Babylon land goin come shame,
An peopo inside Babylon town goin fall down an mahke.
48 Den, da sky, da earth, an erybody inside um,
Goin cheer plenny,
Cuz dey stay good inside fo wat happen Babylon side.
Cuz from da north side,
Army guys goin attack Babylon.”
Az wat Da One In Charge tell.
49 “Babylon goin come wipe out,
Cuz dey wen kill plenny Israel peopo.
Same ting, all ova da world plenny peopo wen mahke
Cuz a da Babylon peopo.
50 You guys dat wen run away from da army guys wit swords,
Get outa hea! No jus stan dea!
No foget Da One In Charge even wen you stay one far place,
An tink plenny bout Jerusalem town!”
51 Da Jerusalem peopo tell:
“Us stay real shame,
Cuz we hear da peopo from odda places talk bad bout us.
Us guys get shame an lose face, cuz dey wen go
Inside da place a Da One In Charge Temple dat stay spesho ony fo him.”
52 Dis wat Da One In Charge tell: “But da time goin come
Wen I goin punish dea idol kine gods
Dat da Babylon peopo stay pray to.
All ova dea land,
Da ones dat almos mahke goin cry an moan.
53 No matta da Babylon peopo like climb up to da sky,
An make dea town wall real high
Fo nobody climb ova um,
Goin get guys dat come from me
Dat goin wipe out Babylon town.”
Az wat Da One In Charge tell.
54 “You know wat?! Can hear peopo yelling from inside Babylon fo somebody help dem!
Can hear one loud crash from inside dea land!
55 Da One In Charge stay ready fo wipe out Babylon town.
He goin make all da big noise from dea come quiet.
Da army guys dat goin attack Babylon town
Goin poun um jalike wild waves.
Goin soun jalike monsta surf.
56 Wen da army guys go attack Babylon town fo wipe um out,
Dey goin make da Babylon army guys dea prisonas,
An broke dea bows an arrows.
Cuz fo shua, dass da kine God me, Da One In Charge.
I goin pay dem back fo eryting dey wen do.
57 I goin make um come piloot—dea leada guys,
Dea guys dat erytime know wat fo do,
An dea govna guys, dea govmen guys, an dea army guys too.
Dey all goin go sleep foeva, an no wake up.”
Az wat da king tell,
Da One dat get da name “Da One In Charge, da God Ova All Da Armies.”
58 Dis wat Da One In Charge, da God Ova All Da Armies, tell:
“Da thick Babylon wall goin come all broke down.
Da high town gates goin come all burn up.
Plenny nations wen work hard fo build um—fo notting.
Wase time, all dose peopos wen work fo make wat da fire goin burn down!”
59 Da year numba four wen Zedekiah stay da Judah king, da officer guy Seraiah, Neriah boy an Mahseiah grankid, wen go Babylon wit Zedekiah. Dis da message dat Jeremiah tell Seraiah fo take wit him:
60 Jeremiah wen write um inside one roll up kine book, bout all da bad kine stuff dat goin happen to da Babylon peopo—he write down eryting, wat goin happen.
61 He tell Seraiah, “Wen you reach Babylon town, make shua you read eryting inside dis book wit one loud voice.
62 Den tell, ‘Da One In Charge, you da One wen tell dat you goin wipe out dis place! Da peopo an da animals no goin live hea no moa! Ova hea goin stay all wipe out foeva!’
63 Wen you pau read dis book, tie one rock aroun um, an throw um inside da middo a da Eufrates Riva.
64 Den tell, ‘Az how Babylon goin go down an no come back up no moa, cuz a all da bad kine stuff I stay ready fo make happen to dem. An dea peopo goin lose fight.’ ”
Az all da messages Jeremiah wen tell. Dass it, pau awready.