25
Dey Goin Be Prisonas Fo Seventy Years
1 Dis, da message Da One In Charge wen give Jeremiah bout all da Judah peopo. Was da year numba four wen Jehoiakim, Josiah boy, stay king fo Judah. Az was da firs year dat Nebukadnezzar stay da king fo Babylon.
2 So Jeremiah, da guy dat talk fo Da One In Charge, tell all da Judah peopo, an all da peopo dat live inside Jerusalem:
3 “From da year numba thirteen wen Josiah, Amon boy, stay king fo Judah, till today, az twenny-three year. All dat time, I get messages from Da One In Charge, an I stay tell you guys ova an ova wat he tell. But you guys no lissen.
4 “Da One In Charge sen his worka guys by you guys ova an ova fo talk fo him. But no matta Da One In Charge sen um, you guys no lissen wat his talka guys tell. You ony make deaf ear.
5 Da guys dat talk fo God wen tell dem dis: ‘All you guys gotta change da way you tink! You gotta change an no do bad kine tings no moa! Den you can come back fo live inside da land Da One In Charge wen give you guys an yoa ancesta guys fo real long time.
6 No follow odda gods. No work fo dem. No go down in front dem. No make me come huhu wit da idol kine gods you guys make wit yoa hands. Den I no goin hurt you guys.’ ”
7 But Da One In Charge tell: “You guys no lissen me. An you guys make me come huhu cuz a da idol kine gods you guys make wit yoa hands. Az how come you guys make trouble fo you!”
8 Az why Da One In Charge, da God Ova All Da Armies, tell dis: “Cuz you guys no lissen wat I tell,
9 I goin call all da peopos from da north fo come togedda. I goin call King Nebukadnezzar fo come too from Babylon. He do my work fo me, an I goin bring him an da odda peopos agains dis land an da peopo dat live hea, an agains all da peopos aroun hea. I goin wipe dem all out, jalike oua peopo wipe out one animal wen dey make one sacrifice. Dass how I goin make erybody come shock an shake dea head, an come real sore inside cuz a dem. No goin get notting dea, all da time afta dey come wipe out.
10 I goin make shua dat no mo nobody from Jerusalem goin stay good inside o like make party. Even da bride an groom no goin say notting. No goin get noise from da stones dat make da wheat flour, an no goin get light from da olive oil lamps.
11 Dis whole land goin come dry an no goin get nobody live ova dea. Anybody go by dea goin come shock. All dese peopos goin work hard fo da Babylon king fo seventy year.” Az wat Da One In Charge tell.
12 An Da One In Charge tell: “But wen da seventy year pau, I goin punish da Babylon king an his peopo an wipe out dea land, cuz dey get da blame fo da bad kine stuff dey wen do. An I goin wipe out dea land foeva, an dis goin make peopo come shock foeva.
13 I goin make happen eryting dat I wen tell goin happen agains da Babylon land, an eryting dat stay inside dis book, an eryting Jeremiah wen tell fo me agains all da diffren peopos.
14 Da Babylon guys goin be da ones fo come slaves fo strong kings an dea peopos. I goin pay back da Babylon guys fo da bad kine stuff dey do!”
God No Take Wat Da Nations Do
15 Dis wat Da One In Charge, da God fo da Israel peopo, tell me: “Take dis cup from my hand. Da wine inside da cup, jalike stay dea fo show dat I no like wat da diffren peopos do. Wea eva I sen you, make dem drink dis wine.
16 Wen dey drink um, dey goin stagga, an come pupule, cuz I goin sen war inside dea countries fo wipe um out!”
17 So I take da cup from Da One In Charge hand, an I make all dese nations drink um, ery place he sen me:
18 I give um to da Jerusalem peopo, an da peopo inside da towns inside Judah, an dea king guys an leada guys. Az fo make dem come wipe out, an make dea peopo come bum out, an come shock an shake dea head, an put kahuna on top dem—jalike how dey stay today.
19 I give da cup to
da Pharaoh guy, da king fo Egypt,
his palace guys, his leada guys, an all his peopo, an
20 all da odda kine peopo from diffren place dat live dea,
all da king guys fo Uz,
all da king guys fo da Filisha peopo (da ones from Ashkelon, Gaza, Ekron, an da peopo dat still yet stay alive Ashdod side),
21 da Edom, Moab, an Ammon peopos,
22 all da king guys fo Tyre an Sidon,
da king guys from da islans da odda side a da sea,
23 da peopo from Dedan, Tema, Buz,
an erybody dat cut dea hair spesho kine fo dea gods,
24 all da king guys fo Arabia,
all da king guys fo da peopo from anodda place dat live inside da boonies,
25 all da king guys fo da Zimri, Elam, an Mede peopo,
26 all da king guys from da north, nea an far, one afta anodda—
all da king guys land dat get on top da earth.
An afta all dose guys, da king fo Sheshak (az one secret name fo Babylon, you know) gotta drink um too.
27 Den Da One In Charge tell me: “Now tell um, ‘Dis wat Da One In Charge, da God Ova All Da Armies, da God fo da Israel peopo, tell: Go drink plenny from da cup. Come piloot an puke an fall down so you no can stan up no moa, cuz I goin sen armies fo wipe out you guys.’
28 But if dey no like take da cup from you an drink um, tell um, ‘Dis wat Da One In Charge, da God Ova All Da Armies, tell: No matta you no like drink um, you guys gotta drink um!
29 Da firs ting I goin do, I goin punish da peopo from Jerusalem, da town dat get my name! An if I do dat, how come you guys tink I no goin punish you too?! Fo shua I goin punish you guys! I goin make war agains erybody dat stay on top da earth!’ ” Az wat Da One In Charge, da God Ova All Da Armies, tell.
30 “You, Jeremiah, go talk fo me to all da diffren peopos. Tell all dis stuff agains dem, an tell dem:
“ ‘Jalike one lion dat stay ready fo hunt,
Da One In Charge goin make big noise from da sky.
He goin make thunda
From da place dat stay spesho fo him.
He goin make one big noise fo make da sheeps come sked his peopo.
An he goin yell plenny,
Jalike da guys dat step grapes fo make wine.
He goin yell agains all da peopo dat live on top da earth.
31 Da big noise goin go to da mos far places on top da earth.
Cuz Da One In Charge goin poin finga da peopos.
He goin go agains erybody dat stay alive.
He goin go afta da guys dat do wass wrong wit his sword.’ ”
Az wat Da One In Charge tell.
32 Dis wat Da One In Charge, da God Ova All Da Armies, tell:
“Dis wat I goin do.
Bad kine stuff goin happen to one peopo
An go from dem to anodda peopo.
Jalike one strong storm stay coming
From da mos far side a da earth.
33 “Dat time, da peopo Da One In Charge goin kill, you goin see dea bodies all ova da place, from one side a da earth to da odda side. No mo nobody goin cry fo dem. No mo nobody goin take away da bodies. No mo nobody goin bury dem. Dea mahke bodies goin stay ova dea jalike rubbish all ova da groun.
34 “You bad leada guys,
You suppose to take kea yoa peopo
Jalike da sheep guys take kea dea sheeps.
But you goin cry an yell.
You guys dat get powa ova yoa sheeps,
Roll aroun on top da dirt,
Jalike fo one funeral!
Now stay yoa time fo you get kill
O get chase all ova da place!
You guys goin fall down an come bus up
Jalike you da kine clay pots dat cost plenny an easy fo broke.
35 No mo place fo run an hide
Fo you guys dat suppose to take kea da sheeps.
No mo place fo get outa trouble
Fo you guys dat get powa ova da sheeps.
36 Da sheep guys stay yell fo help!
Da ones dat own da sheeps stay scream fo help!
Cuz Da One In Charge stay wipe out dea grass fields.
37 Da places wea da sheeps stay
Wea eryting stay quiet,
Dose places goin come all wipe out.
Cuz Da One In Charge stay real huhu
An he goin burn up eryting.
38 Jalike one lion leave da place wea he stay hide fo hunt,
Da One In Charge goin go out lidat too!
Az why dat land goin come one skery place fo live.
Cuz da guys dat like put presha on dem,
Goin bus um up wit swords,
An cuz Da One In Charge stay real huhu.”