28
Bummahs Fo Da Efraim Peopo!
(Rome 9:33; 1 Corint 14:21; 1 Peter 2:6)
1 Bummahs! Samaria town, Efraim side,
Look jalike get one nice haku lei
On top a da Samaria hill,
Ova one valley wea eryting grow good!
But dat lei, jalike da good looking flowas
Stay come all dry up now.
Az cuz da Efraim peopo get big head
An dey stay piloot all da time!
Plenny rich stuff come from dat valley,
But da peopo from dea ony drink up da wine,
Till dey no can even stan up!
2 But you know wat?!
My boss get da Assyria army,
Dat stay real strong wit plenny powa.
Dey stay jalike one rain storm dat fall down wit ice,
One real strong wind dat wipe out all da plants,
One storm dat make da watta come up all ova da place,
Wit plenny powa fo throw down da big town.
3 Dat town look jalike get one nice haku lei on top um.
Proud, da piloot guys from Efraim tink bout um.
Da ones dat stay agains Samaria goin bus up da town
Jalike dey step an smash da nice haku lei.
4 Dat town, da army guys goin take um ova
An rip off eryting,
No matta da place stay look
Jalike one nice looking flowa,
On top a da Samaria hill,
An stay jalike one real nice haku lei
Dat stay come all dry up,
Ova one valley wea eryting grow good!
Dat town, goin be jalike one fruit dat come ripe early
An somebody see um,
An right den an dea,
Dey grab um an eat um.
5 But dat time, Da One In Charge,
Da God Ova All Da Armies,
He goin come jalike da nice looking haku lei
An jalike one awesome crown
Fo da Israel peopo dat still stay alive dea.
6 Da guys dat get da job fo judge,
He goin make dem come
So dey fo real kine like judge da right way.
Da army guys dat get da job
Fo make whoeva like fight dem
Go back da town dey come from,
He goin make dem fight good.
7 But nowdays, even dose guys
Fall down cuz dey drink too much wine
An no can walk good cuz a da beer!
Even da pries guys an da guys dat talk fo God,
Dey fall down cuz a da beer
An no can figga right cuz a da wine.
Wen God like show um someting jalike one dream,
Dey no undastan um an dey tell um az wrong
Wen dey gotta judge wass right an wass wrong,
Dey no can do um, cuz dey stay jam up.
8 Dey bahf all ova on top all da tables,
Get doodoo all ova on top,
No mo one clean table.
9 Dey stay talk lidis:
“Eh! Dis Isaiah guy, who he tink him?!
He try fo teach us stuff,
An make us guys undastan!
How come he stay make to us
Jalike us bebes dat jus pau drink milk
From dea muddah breas?!
10 Da buggah ony tell da same ting, ova an ova,
‘Do dis, do dat,
One rule, anodda rule,
Litto bit hea, litto bit dea!’ ”
11 Cuz dey no like lissen,
God goin sen odda peopo fo talk to dem,
Army guys from anodda place
Wit da kine language dey no undastan!
Still yet, God goin talk to his peopo,
12 Jalike he wen tell um befo time,
“Dis da place fo res.
Da guys dat tired can res ova hea.
Dis wea you guys can sleep.”
But dey no like lissen.
13 Az why, fo dem guys, wat Da One In Charge tell um
Goin be jalike wat he tell befo time:
“Do dis, do dat,
One rule, anodda rule,
Litto bit hea, litto bit dea.”
An dey goin go way,
But den dey goin fall on dea okole.
Dey goin come all bus up.
Da army guys goin grab dem
An dey goin come prisonas.
14 Cuz a dat, lissen wat Da One In Charge tell,
You guys like laugh at God,
You guys dat stay in charge a dis peopo inside Jerusalem!
15 You Jerusalem guys talk big!
You guys tell,
“Us guys wen make one deal fo us no mahke.
We get promise fo no go da Mahke Peopo Place!
Wen da army guys come hea,
No matta dey go all ova jalike da big watta,
Dey no goin come wea us guys stay.
Cuz us guys know how fo bulai dem
So dey no goin hurt us.
We no goin tell um da trut,
An dass how we goin stay outa trouble.”
16 Cuz dass how you guys tink,
Da One In Charge a me tell dis:
“Dis, wat I do!
I da One goin put one stone on top da Zion hill
Wea my Temple stay.
One fo shua solid kine stone.
Dat stone, jalike da corna block.
Dass real importan
Fo make da foundation stay solid.
An da stone mean dis:
‘Anybody dat trus him, no need worry.’
17 Fo tes you Jerusalem peopo,
I goin look fo see if you stay judge da right way
An if you do wass pono erytime,
Jalike da builda guys use one strong string
Fo measure tings,
An dey pull anodda string
Fo check out if da building stay strait.
You guys tink you can bulai da Assyria army guys
Fo dem no hurt you.
You tink you get one place fo hide
Wen da army guys come
Jalike da big watta.
But no way you can bulai dem!
No mo no place you can hide!
18 Da deal you guys wen make fo no mahke,
No goin be awready!
Da promise somebody wen make to you guys
Fo no go da Mahke Peopo Place,
No goin work!
Wen da army guys come thru dis place,
No ways you guys even can stan up,
Jalike wen da big watta come!
19 Goin get plenny army guys
Dat stay come thru hea
Ery morning, ery day, an ery nite,
Jalike erytime da big watta come,
An catch you guys an take you away.”
Wen da peopo undastan wat dis mean,
Dey goin be fo real kine sked an shaking.
20 Da peopo, dey no goin get one place fo hide,
Jalike dey stay sleeping in one bed dass too short,
Jalike dey stay using one blanket dass too small.
21 Da One In Charge goin start fo do tings fo you guys,
Jalike da time da Israel peopo wen fight da Filisha guys, Mount Perazim side.
Da One In Charge
Goin come real huhu an bus up peopo,
Jalike da time dey wen fight da Amor peopo, Gibeon Valley.
He goin do watevas he like do,
No matta wat he stay do
Goin make da peopo drop dea jaws,
No matta nobody wen see him make lidat befo time.
22 So now, dass why you guys betta not make fun a wat I tell,
O God goin punish you guys even moa.
Cuz dis wat Da One In Charge a me tell,
He Da God Ova All Da Armies:
He make up his mind awready
Fo wipe out all da Israel peopo
Inside da land!
23 Lissen good wat I stay tell you.
Hear wat I stay tell.
24 Wen da farma guys plow da dirt fo plant,
You tink dey ony plow um ova an ova,
But dey no plant notting?!
No way.
You tink dey ony broke up da dirt
An make row fo plant?!
Not even.
25 Afta dey make da top come level,
Dey throw da seeds fo da black cummin
An fo da regula kine cummin on top dea.
Dey plant da wheat in rows,
An barley in da right place,
An anodda kine wheat aroun da outside.
26 Cuz da God da farma guys pray to
Make shua dey know how fo do um,
He show um da right way.
27 Dass why, wen dey take out da junks,
Dey no drag one heavy wood ova da black cummin,
An dey no roll da wagon wheel ova da regula cummin.
Dey hit da black cummin wit one stick ony,
An same ting fo da regula kine cummin.
28 Fo make bread, firs gotta smash da wheat litto bit
Fo take out da junks,
But no need stay take out da junks all da time.
Dey use da horses
Fo move da wagon wheel ova um,
But not fo smash da wheat real small kine.
29 So all dis stuff dat da farma guys know,
Dass one mo ting dat come from Da One In Charge,
Da God Ova All Da Armies.
Wen he teach peopo how fo do someting new,
Dea jaw drop!
Fo shua he know how fo do
Importan kine stuff erytime!