23
Wat God Tell Bout Tyre
1 Me, Isaiah, I get heavy kine stuff fo tell bout wat I see goin happen to da Tyre peopo:
All you guys inside da boats dat go Spain side,
Cry an yell cuz you stay sad inside.
You guys no mo house now,
No mo place fo da boats fo go in.
Wen da boats come back from Spain
An stop Cyprus Islan,
Den somebody tell dem
Dat Tyre town stay all bus up awready.
2 You peopo dat live nea da beach,
No say notting cuz you feel so bad!
You Sidon guys dat buy stuff an sell um,
Was da Tyre peopo
Dat go an come on top da boats
Dat befo time wen bring you wateva you like.
3 Befo time, dey go on top da big ocean
An bring back plenny stuffs,
Cuz dey buy an sell seeds Shihor side,
An buy da food da Nile Riva peopo harves.
Az how Tyre town wen stay
Jalike da open market fo all da nations.
4 But now, you peopo inside Sidon town,
You ony get shame!
Tyre was da town wit da strong wall by da sea
Dat wen take kea all you odda peopo!
But now, jalike da Tyre peopo stay tell,
“Us guys no mo nobody
Fo do how us wen do befoa.
Jalike us neva hurt plenny
An born kids fo stay tight wit us,
Us neva raise young guys o wahines
Fo take ova oua biznis bumbye.”
5 Wen da Egypt peopo hear
Bout wat happen inside Tyre,
Goin hurt dem plenny,
Jalike one wahine start fo hurt
Wen she start fo born one bebe.
6 Run away da odda side a da sea, to Spain!
Cry an yell cuz you stay sad inside,
You peopo from da islan dat still stay dea!
7 Fo shua, dis not da same big town
Dat erytime stay make party befo time!
Dis not da same ol town dat stay from long time befo time.
Cuz now, all da Tyre peopo go far away awready.
Dey no stay dea no moa.
Dey go live wea dey no mo land.
8 Who you tink wen make da plan
Fo wipe out Tyre, da big town?!
Befo time, was dea king
Dat give plenny odda kings dea crown!
Da guys from Tyre dat buy an sell stuff was princes,
An erybody in da world get respeck
Fo da guys dat go one far place fo sell stuff.
9 Was Da One In Charge, Da God Ova All Da Armies!
He da One plan um
Fo shame all da awesome peopo dat get big head,
An make erybody in da world lose face
Dat wen get respeck befo time.
10 You Tyre peopo dat live Spain side now,
Okay fo you go from one end a yoa land to da odda end,
Jalike da Nile Riva go all ova Egypt,
From one end to da odda end,
Cuz no mo notting make you stay one place no moa.
11 Wen Da One In Charge put up his hand fo use his powa ova da ocean,
He make da kings an dea peopos come sked an shaking.
He da One dat tell, az time fo wipe out
Da towns inside Fonisha dat get strong wall.
12 He tell da peopo inside Sidon town
“You no goin feel good bout notting no moa!
You guys goin be jalike one young wahine
Dat get rape.
Even if you guys go ova dea Cyprus Islan,
You guys no goin res dea.”
13 Look! da Babylon land!
Da peopo dat live dea,
Befo time, nobody know who dem.
Da Assyria guys wen use da Babylon land
Fo da wild animals dat stay inside da boonies.
But layta, az da Babylon peopo from da boonies
Build towas fo fight Tyre town.
Dey rip off eryting inside da palaces inside da town,
An leave all da rubbish wea had house.
14 All you Tyre guys inside da boats dat go Spain side,
Cry an yell cuz you stay sad inside.
Cuz yoa Tyre town dat get strong wall stay all bus up!
15 Dat time, erybody goin foget bout Tyre fo seventy year. Dass jalike da time wen one king stay alive. Afta da seventy year, goin come fo Tyre jalike da song tell bout one hoa:
16 “You, da hoa dat erybody foget,
So take one harp
Play nice music an sing plenny song
Fo guys tink bout you long time.”
17 Cuz afta seventy year, Da One In Charge goin tink bout da Tyre peopo, an goin do someting fo help dem. Den da peopo inside Tyre goin go back an make jalike befo time. Dey goin buy an sell stuff one mo time wit all da kings all ova da world an dea peopos, jalike one hoa.
18 But dat time, wateva da Tyre peopo make from wat dey buy an sell, an from work, goin come spesho fo Da One In Charge, not fo ony dem. Wateva dey make, goin be fo plenny food an good clotheses fo da peopo dat stay tight wit Da One In Charge.