11
God Get Love An Aloha
Fo All Da Israel Peopo
(Matthew 2:15)
1 Da One In Charge tell,
“Befo da Israel peopo come one nation, dey jalike my kid.
I get love an aloha fo all dem.
An I call out to all dem, ‘Eh my boy! Go come outa Egypt!’
2 But no matta how plenny I wen call dem,
Dey go da odda way, mo far away.
Dey wen make sacrifice fo da Baal gods,
An dey burn incense fo da idol kine gods.
3 But az jalike I da One wen teach
Da Efraim peopo fo walk.
I wen carry dem in my arms.
But dey neva tink
Dat was me wen take kea dem.
4 I wen lead dem wit my yoke straps,
An make nice to dem.
I wen show love fo dem.
Az jalike I wen take da yoke off dea neck,
An bend down fo feed dem.
5 “But my peopo tell ‘Laytas!’ fo come back to me
Cuz dey like, dey goin go back Egypt side!
Oddas goin let da Assyria king come dea leada!
Az cuz dey no change dea mind.
6 Cuz a dat, da peopo dat stay agains dem goin use swords
Fo attack da Israel towns
Dey goin bus up da bars on top da Israel town gates.
Da Israel peopo goin make plans,
But dey no can do notting!
7 My peopo go all out fo tell ‘Laytas’ to me.
Even wen dey call me Da Mos Importan God,
Dey no mo respeck fo me.
8 “You Efraim peopo, no way I goin tell you guys ‘Laytas!’
No way I goin give you Israel peopo to anodda god!
No way I goin wipe out you guys jalike I wen wipe out Admah town!
O Zeboim town!
Now I wen change my mind,
Az why now I feel all kine love an pity fo you guys!
9 I no goin punish you guys jus cuz I stay huhu wit you.
I no goin turn aroun an jam up you Efraim peopo.
Cuz I God! I not one guy!
I da One dat stay good an spesho, an I live wit you guys.
I stay huhu, but I no goin come bus up you guys!
10 “Bumbye da Israel peopo goin come follow me, Da One In Charge.
I goin make one loud noise jalike one lion.
Wen I make dat loud noise,
My peopo goin come from da islans on da west side, sked an shaking!
11 Dey goin come, sked an shaking,
Jalike sparrows from Egypt an doves from Assyria.
I goin let dem live inside dea homes.”
Az wat me Da One In Charge tell.
Da Bad Tings Da Israel Peopo Do
12 Da Efraim peopo stay bulai me all da time.
Az da Israel peopo, an da way dey ack, I no trus dem.
But da Judah peopo still hang out wit me, God,
no matta wea dey go!
Dey stay good wit me,
Da One dat stay good an spesho,