49
Israel Tell His Boys How Dey Goin Be
1 Laytas, Jacob tell all his boys fo come by him. He tell:
“Go come togedda aroun me.
I goin tell you guys wat goin happen to you
Afta I mahke.
2 My boys, Jacob kids,
Come lissen me, Israel, yoa faddah guy.
3 “Reuben! You my numba one boy.
You wen born wen I was mo strong.
You da numba one in da blood line,
An da mos importan one fo get powa.
4 But eh! You not real strong inside, jalike da wave watta!
Dass why from now you not goin get da rights dat da firs boy suppose to get!
Cuz you wen make sex wit my odda wife,
An do one pilau ting on top my bed dat time.
5 “Simeon an Levi! Dey da same kine braddah guys.
Dey like hurt peopo!
6 Inside, goin bodda me plenny if I gotta lissen
Wen dey make plan togedda fo do bad kine stuff.
Wen dey come togedda, I no like stay wit dem,
Cuz wen dey come huhu, dey kill peopo.
Dey even tink az good fun hurt da cows fo notting.
7 I like one bad ting happen to dem weneva dey come real huhu,
An weneva dey figga az good fo dem make any kine.
Az why I goin put dem one side, inside da Jacob ohana,
Fo no come togedda wea da Israel peopo live.
8 “Judah! Yoa braddah guys,
Dey goin tell you awright.
Erybody dat go agains you,
You goin make dem do wat dey suppose to do.
Yoa odda braddah guys, dey goin go down in front you
Fo show you respeck.
9 Judah, he jalike one young lion.
He come big cuz he kill meat fo eat.
Jalike da lion, he lay on top da groun,
Ready fo jump an kill all da animals.
Jalike da lion, no mo nobody goin make um stan up!
10 Judah guys goin carry da spesho stick fo show peopo dey da king,
Da Judah ohana goin keep dat stick foeva.
Till da real owna show up
Dass goin be da one
Dat da odda peopos goin do wat he tell um fo do.
11 Judah get plenny grape farm,
So he no lose notting if he tie his young donkey to one grape plant,
Da bebe donkey, he tie um to da plant dat get da bestes grape.
He no need watta fo make his clotheses come clean,
Cuz he rich, an he get plenny wine fo wash um,
He can even wash his robe wit da red juice from da grape dat look jalike blood.
12 His eye shine mo den da wine.
His teet mo white den da milk.
13 “Zebulun! He goin live by da beach.
He goin make one boat harbor.
Da Sidon peopo goin be his neighba guys.
14 “Issakar! He jalike one donkey dat get strong bones
Dat like lay down in da middo a da two bag he suppose to carry.
15 He figga, az one good place fo res,
An nice, da land.
All da time, he jus one worka guy.
Az why no bodda him bus ass fo carry one big load.
16 “Dan! He goin be da judge fo his peopo,
Cuz dey goin be one a da ohanas dat goin come from me, Israel.
17 Dan goin be jalike one snake dat stay nea da road,
Jalike one snake wit poison dat stay nex to da trail
Fo bite da horses feets
Fo make da guy on top da horse fall down.”
18 Den Jacob pray lidis:
“Eh! You Da One In Charge! I stay wait fo you, God,
Cuz I know you goin come help me!”
19 Jacob tell some moa:
“Gad! Goin get steala guys dat come togedda an bus him up.
But layta, Gad goin go afta dem an bus up dem too.
20 “Asher! He goin make fancy kine bread,
An fancy kine food, da kine da king guys like eat.
21 “Naftali! He jalike one wahine kine deer
Dat da peopo let run away,
An bumbye, get nice looking bebe deer.
22 “Joseph! He goin get plenny peopo come from him
Jalike he one tree branch dat get plenny fruit
Ova dea wea da watta come outa da groun.
Jalike he get branches wit leafs,
Dat grow ova one wall.
23 Da army guys dat use bow an arrow
Fo attack Joseph guys,
Dey stay real piss off wit da Joseph guys.
24 But Joseph guys, dea bow neva lose fight
An dea arm stay strong fo move quick.
Az cuz me Jacob, I pray to da Strong God.
Az why he make Joseph guys come strong too.
God jalike da Sheep Guy dat take kea me,
Jalike he da Big Rock dat stay help me, Israel.
25 God, he da God fo me, yoa faddah guy.
I like fo God help you, Joseph,
I like fo Da God Wit All Da Powa do good tings fo you.
I like fo him make good kine stuff come down from da sky fo you,
An good kine stuff from deep unda da groun,
An give you plenny kids
An plenny bebe animals!
26 Me, yoa faddah, I like da good tings dat I tell God fo do fo you
Come mo plenny den all da good tings
You goin get from da ol mountains,
Mo plenny den from da nice tings dat come
From da hills dat goin stay foeva.
I like all dis good stuff come to Joseph,
On top his head, his girigiri,
Cuz he da guy dat wen come mo importan
Den all his odda braddah guys.
27 “Benjamin! His ohana goin be jalike one wild wolf dog dat go afta da animals.
Morning time, he eat da meat he wen kill.
Evening time, he half half wit his army guys da stuff he wen steal.”
28 Dass da twelve ohanas dat come from Israel, an dass wat dea faddah guy tell um wen he make da ceremony fo tell God wat he like God do fo dem an da peopo dat goin come from dem bumbye. Fo ery boy, he give um da kine words dat stay right fo him.
Israel Tell His Boys Wea Fo Bury Him
29 Den Israel tell his boys wat dey gotta do wen he mahke. He tell, “Pretty soon, I goin mahke an go meet my peopo. Bury me da place wea my ancesta guys stay, ova dea inside da cave inside da piece land dat Efron da Het guy had,
30 da one inside da Makpelah field, wea can see Mamre, Canaan land. Dass da land dat Abraham wen buy from Efron da Het guy fo bury his peopo dea.
31 Dass da place dey wen bury Abraham an his wife Sarah. Same ting fo Isaac an his wife Rebecca. Dass da same place I wen bury Leah.
32 Az da land wit da cave inside dat oua ancesta guy wen buy from da Het peopo.”
33 Afta Jacob pau tell his boys wat dey gotta do, he pull his feets inside da bed. Den he breave da las time an mahke, an he go meet his peopo from befo time.