13
Wali agalime mbirale dindini wini harini wini ngaruhondo bi pupu wiali henego ogo
1 Wali agali Ngode Datagaliwabe manda nabi karu ti luluore ka. Wali agali urunibi karume mbirale bayale tini deni kaware ngaru hondolebirago ainde Ngode Datagaliwabe ibuni haore biarua lalu taya buwa handa walia naholebira. Biabe bu wini ngago baya hangu bigibege lalu handalu howa biabe ogoni biaga kago ibuni baya hangu taya bialu handa walia nahaga ka.
2 Tigua mitangi bialu howa ira dene dedagobi puriabu pu laragobi iba solowara timbuni bedagobi yakundi karubi iba li timbuni poragobi ni kagobi ege kagobi ti timbuni howa tigua dindi ogo handaya ho ka lo manda biaga ka.
3 Wali agalime mbirale urunihondo turu timbuniore howa tigua mbirale uruni bi pupu wiagane ale ka lo manda bu haga ka. Anigo Anduane Homogo mbirale uruni wabiaga kago ibuni mbirale ibunime wabinidaru bolangua hene daligaore ka. Ani bialu Anduane Homogo ibuni mbirale bayale damene ngaruni abaore ka.
4 Wali agalime mbirale uruninaga hongo ngago hondowa mogo timbuni lalu biabe hongohe birago de hondowa mogo timbuni laga ka. Anigo ainde mbirale uruni wabini aba ibuni kago ibu mbirale uruni bolangua hene howa ibu hongo gibiorehe ka.
5 Wali agalime mbirale baya taraorebi timbuniorebi mbira ti kagoria ngaria hondowa ai mbirale baya ogoni aba baya taraore halu mbirale timbuni ngaru aba timbuniore harua lo manda bulene nga.
6 Anigo ai tinaga miniha wá nale heagua nde tigua henemane manda buwa bero lalu bialu hene ndo dege holebira. Tigua Ngode Datagaliwabe ibuni taya bule bialu karia pu luluya howa bulebira.
7 Anidagua bulebirago irane Ngode Datagaliwabehanda mbirale bayale wabiyago damene bibahende tinaga deni panaga bu payabu wiai kagola tigua Ngode Datagaliwabe ibuni taya bialu hene holebira. Mbirale ibugua wabini uruni baya taraoreru bu ngagola tinaga bu mini uruniha ha holebira.
8 Anigo ainde ti luluyu kago daraba.
9 Tigua mbirale bu ngarunaga mana ogodagua biaga agua piaga agua haga lalu manda timbuni uruninaga wu ka. Anigo ainde mbirale bayale uruni aba kago ibuni abale handa walia nahaga kago irane agimeda.
Wali agalime ira dibalu gime wabini wiaruhondo bi pupu wialu henego ogo
10 Wali agali darabiru tigua manda bialu mbirale holene nayi ngarume ti biamogo bulebirabe toba howa urunialehondo mini mbiraore wu karu dege daraba. Tigua mbirale agali tininaga gime wabini ngaruhondo bi pupu wiaga ka. Agali mbira mandabi kagome ema bialu piaga biru ngarunaga ngolo silibarume wabu wini ngagohondo bi pupu wialu haga ka. Ani bialu ege to̱le̱ bamba agalime podo wini ngagohondo bi pupu wialu haga ka.
11 Agali anda biaga kagome biabe biagago baya hangu manda bulene nga. Ibugua ira mbira dibalu ongoba bu wiaga. Ani buwa ogonime wali agali biamogo bulene ale bayale mbira gime wabiaga.
12 Ani wabialu howa ira ogoninaga duni haraneru tomo hirule ira delowa ibuni turu ho biraga.
13 Anigo ira bogo wahene harene ngarume biabe bulene mbira nawi. Ira ogoni ibu yiyoleni howa de habane bere bada. Anidagua bini mbira wiagua nde agali biabe biaga biago ibu biruwa ira ko galone nabibehe ogoni tigi haga buwa tigini urunime wali agalinaga bigiyaru
14 ema bialu piagarunaga bigiyaru wabiagaya. Ani wabuwa maruhayagi bayale ndo ngaru daramabi lo budambi haga.
15 Ani biai howa ogoni ibu mo ngelolenaga tamu bayale mbira anda hai kagoria wiapara ho ngelowa mbirale irame wabiyago mo yalu puwa pume dariba howa mo ngelaga.
16 Mbirale irame wabini ogoni puriabume mo ibira haragola ibira howa gingirula hole bulino baya hanguore waya pume daba haga bu ngelaga. Baya hangu mo dariba haga biagadago irane ira dibalu bame agalime wabini wuwa ibuni pelemialu hongo naholobada manda bialu baya hangu agalime dege mo daba haga buwa helaga.
17 Ani helowa agali ogoni ibuni taga nahe howa mbirale ibunime wabu wiyagohondo bi pupu wialu ibu one baya hangu handaya ho habe lalu ibu waneiginibi ibunaga mbirale ngarubi baya hangu handaya ho habe lalu bi lamiaga.
18 Ibugua mbirale irame wabu wiyagome ibuni tingini mo hongo habe lalu bi pupu wiagagoyu mbirale irame wabini ogoni ibuninaga hongo nawi. Agali biago ibu holene ngibe lalu bi pupu wiagagoyu irame wabini ogoni ibuniha holene mbira naheore. Agali biago ibugua mbirale ogonihondo ibu biamogo bia lalu bi pupu wiaga. Anigo irame wabini ogoni ibuni biabe mbira bibe naheore ka. Agali biago ibugua irame wabini ogonihondo ibu baya hangu ibagabu holiya biamogo bibe lalu bi lagagoyu irame wabini ogoni ibaga bialu napiaga.
19 Agali biago ibugua irame wabu wiyagohondo bi pupu wialu lamialu ibunaga biyinaya biabe bialu kago biamogo bialubi biabe maru ibugua bialu karubi biamogo bibe lalu bi lagago ainde mbirale gime wabini ibuninaga ema bialu hongo holene mbira nawiore ndobe.