6
1 Ai mbiralila nenege hariyagua lone waitigi holene manda nabibe. Lone waitigi haregome í̠naga mini mo ko haragola taga timbuni holebere. Wali agali bi lo mende halu bi kira laga ko bu karunaga yolo ogoni mo yaga ka.
2 Miniha dimagoli ko ngegome í̠ haru helo nahabe. Miniha dimagoli holene ogonime í̠ nogo bulumagame hengedaradagua bialu í̠ balu home loligo hondo habe.
3 Miniha dimagoli holene ogoni ibugua í̠naga yuni linibi bibahende nai haragola Í̠ ira gabuni ale holebere.
4 Heneneore mbirali ibu miniha dimagoli ogoni ale ngelo kago ibu mo ko haragola waitigi bu karume ibu hondo oba holebira.
Nenegela biagane mana ngago ogo
5 Bi dendebi laregome nenege dewaore hinalu bi hendore lalu bedegome hadapaya bu holene mo yu anda ibaga.
6 Wali agali dewaoreme í̠la mini hana haga bu hene heaguabi ai daosini mbira (1,000) bu karu aria mbiraoreli hangume í̠ baya hanguore mo tiga biaga holebira.
7 Í̠naga nenege holene mbira taya bialu hariyagua í̠na mbirali kagohondo abale mini mbiraore nawibe. Í̠na ibu abidabe hondole baya hangu begelo hondolene ngago
8 irane nenege mbiraore ndo nenege tara tara dewa hagane ngagonaga ani hondolene nga. Nenege mbirago ibu í̠ bayale kengi nenege howa í̠ha genda ibirangi í̠ heba mandagi naholebira.
9 Nenege mendego ibugua í̠naga nenege ha howa dege mani í̠la waitigi halu bi ohowa libuni hangu howa laga wiribigo bibahende hale hai helo latagi haragola í̠ taga ho holebere.
10 Maru í̠na tomo merengi libu nenege howa mani í̠ha genda anda ibirangi í̠ biamogo nabulebira.
11 Nenege uruni aleme í̠ bayale kengi nenege halu í̠la mini mbiraore ho holebira. Ani howa ibunaga mini bayaleru í̠ andaga ibuwa latagi haga bulebira.
12 Anigo tigua í̠naga mini mo guya harangi nenege biagome í̠ erembira ngialu ibunaga wanakui mo do holebira.
13 Wali agali í̠la waitigi bu karu kaware nahe kaundiaha halu í̠naga nenege karu baya hangu minime ti mo tale bialu de hondo habe.
14 Ainde í̠naga nenege henene kago ibu anda hongohe kaligobi ka. Wali agali mbirale yolo dewame miaga ngaligobi nenege bayale ogoni ibu holebira.
15 Nenege heneneore wali agalime yolo nabulebira. Nenege bayaleoredagola ibunaga yolo ogo aleria lade naholebira.
16 Nenege henene he kago ibuha holene bayaleore holebira. Ani bialu mbirali ibu Anduane Homogo gi howa ibuni andaneha haga kago ibu nenege uruni ale handa walia holene nga.
17 Heneneore Anduane Homogo andaneha kago ibu nenege bayale karia handa walia holebira. Ani bialu libunaga mini mbiaraore ogobi degedane hondolebira.
Mini gigabi wulene manda bayale bulenelame iname wali agali mende kago baba bayale holene mo yu anda ibaga
(6.18–14.19)
Mini gigabi wulenenaga galone manda bulene nga lenego ogo
18 Waneigini-o í̠ wene daliahe kengi í̠na mbirale lo manda bule hongo halu Í̠ waheale biruwa mini gigabi wulene taya bule manda bibe.
19 Wali agalime mabuha biabe erekuibiore bialu dindi tombalu tomo hongowa mani lini bayale delonaga maliaho hagadagua tígua mini gigabi wulene taya bialu haabo halimu. Heneneore í̠na mabuha biabe bulenengi emene tigi mbira degeni birigo ai mabuni tomo liniru bayale dedagola abale do nolebere.
20 Ainde wali agali manda nabini bu karu tihondo mini bayale wulene ibu erekuibioredagola wali agali kuni naheru baba ibu lu haabo naholebira.
21 Mini gigabi wulene ibu ege to̱le̱ gendabi ngaligobi ngagome wali agali gendame bope hagane. Ani bope haragola tigua mini gigabi wulene ogoni abale yu wahagaya.
22 Ainde wali agali dewalime mini gigabi wulene ibunaga mini lolene hame lariyagua nde mbirale tara tara bayale handa walia nahaga ngaru mini lolene karulape nga.
23 Waneigini-o bi hale halu í̠naga mini ngogo baya hangu taliabe. Bi i̱na langerogo mo embeda holeni.
24 Í̠naga ge mini gigabi wulene ege pu ngagome dabaho ngelalu í̠naga ma mini gigabi wulenenaga pume dabaholene nga.
25 Mini gigabi wulene ibunaga genda gibiore ngago í̠naga payani yu pialu ibunaga ege pume daba hayagobi ogoninaga mini burugu nale yu pobe.
26 Í̠naga bu mini bibahendeme mini gigabi wulene taya biaabo halu í̠naga hongo bibahendeme ibunaga hariga ngagoha pialu habe.
27 Ayu ogoni handa walia holeberego taya bima pialu handa walia halu minu yania hariyagua nde pelo yupe habe.
28 Ani beregola mahaore miniha mo palia holene mini gigabi ibugua ngiaga ngago handa walia halu turu holebere.
29 Ani beregola ege pume í̠ dariba hayago ibugua ayu í̠ handaya ho halu pu alatawe biaru ti í̠naga tolanda ge hala gi pagida aleru holebira.
30 Ibunaga genda mo yarigo í̠naga ngolo manda halu ege pume í̠ dariba haga biyaru baya taraore girilimame dedaru ale holebira.
31 Ani bialu í̠naga mini gigabi wulene aga lu bayale karula gimbu biaga ale ngago taya buwa í̠naga embone mo yari bia howa ibaga bu holebere.
32 Waneigini-o hame layagua nde biwai harago baya hangu manda bibe. Manda biriyagua nde í̠ nde í̠ bayaleore holebere.
33 Bi larago baya hangu hale hole hongo ho hariyagua nde í̠na manda bayale bulebere. Í̠naga wiaho biraga hariyagua nde wali agali mini bayalewi mbirago í̠ holebere.
34 Agali wahe mo ngoaiho biruwa bi lalu biraga ngagoha pobe. Ani pu biruwa wali agali mini bayalewi mbira bereagua í̠ ogonila birabe.
35 Ngode Datagaliwabenaga bi te larago í̠ hale nahe bederia í̠ helalu pubagi holigo baya hangu hale ho birabe.
36 Í̠na handalu keria wali agaliyaguabi manda bayalebi mbira bedaria handariyagua nde gao laragola egerebagi heyalu gerai lalu puwa ibu andaga haraba ge halu ubaanda hagane dagia bidagoria ge habe.
37 Anduane Homogonaga bi langiyago baya hangu mitangi biaabo halu ibunaga bi manabi mitangi bibe. Ibugua í̠ mo hongo halu ibugua mini bayale í̠nime yulene hame ledegobi ngulebira.