36
Isaraeleme Anduane Homogohondo bi lenego ogo
1 Ngode Datagaliwabe-o í̠ dindinaga dahuliya andaganagabi Anduane Homogo kego ina kemaru de handalu ina dara halu wali agali hameigini tara tara paluyu pedaru bibahende í̠nihondo gi helo mo gi habe.
2 Wali agali í̠hondo mini mbiraore nawiaga karu ti í̠naga hongo ngego handa walia helo pani nelo mialu minu bai habe.
3 Bamba í̠ni ina heba mandagi howa biabe bialu hegola wali agali bu hearume í̠naga mini timbuni mini lene hego de handaya. Ai ayubi í̠na tiha biabe beregola í̠naga hongo tara ngego mo walia haregola ina hondoleneore hame ledema.
4 Ani beregola iname mini mbiraore wulene mbirali nahe Ngode Datagaliwabe í̠ hangu kegohondo ina mini mbiraore wu haga kagoni í̠ ale mende nahe lalu wali agali maru karume hondo manda bilo ani bibe.
5 Í̠naga hongo lone mo walia halu agalime nabiaganeale maru bibe. Ani bialu í̠naga hongo timbuni ngego lone mo walia halu ti hendelo mo pana ho ngelabe.
6 Í̠na keba holene ngego mo heya halu í̠na miniha tandaga holene ngego inanaga waitigi kagoha mo batagi habe. Bibahendeore bo wahai halu mbiraoreli hangubi mbira helo yupe nahabe.
7 Buleore lalu bi lo wiriru abaleore mitangi bibe. Ai wali agalime biabe timbuni í̠na birirunaga te dewaore lalu helo manda buwa bibe.
8 Waitigi homa nabi ngaru homelo irame bo heda halu tungulomi labe. Wali agali tara í̠naga wali agaliru mo ko haabo halu haga karu bo haealabaga bu wahaiore habe.
9 Waitigi agali haguane bu karunaga haguane karume haguane timbuni mende mbira nahe ti hangu kama lalu haga kago ai agali haguane uruninaga emboneore bo gingirulo wahai habe.
10 Yagoba hameigini bu karu ti hameigini mo mbiraore howa helo bibahende mo mogo bialu tininaga dindi í̠nime mini ngagoria helo mo mbiraore habe.
11 Anduane Homogo-o ina Isaraele í̠naga mini inanaga mini mo wialu ina í̠naga waneigini mo waheneho helalu birigo kemago ainde í̠na ina dara habe.
12 Í̠ninaga dindiore Yarusaleme ngago dara habe. Ani bialu dindi í̠niore biragane ngago mitangi bialu dara habe.
13 Í̠ninaga mini yaraga holene iba ganarume Saiono to̱latagi helalu í̠ni andaga kagoha í̠naga mini mo yaraga halu mo timbuni habe.
14 Í̠naga wali agali abale í̠nime wabu helene biaru baba mandagi kaware habe. Ani bialu agali í̠naga bi mana latagi halu mbiwia haga bu heneruha howa mbiwia halu bi laga birigo ayu mo walia haga bia.
15 Wali agali í̠ malia ho karuhondo yolo bayale mialu agali í̠naga bi latagi halu mbiwia haga henerume biwia ho winiru heneneore helo mo pana halu tagira pelalu haabo habe.
16 Í̠naga wali agali kemarunaga bi laramago hale halu agali í̠naga biabe bia haga Aronohanda ina mo bayale habelo ibugua í̠hondo bi layago mo karulape helabe.
17 Ani beregola wali agali dindi bibahendeha bu karume í̠ni hangu Ngode Datagaliwabe haluhe haabo haga kego manda biai helo ani bibe.
Mbirale ngaru tale bulene mana ngago ogo
18 Wali agalime tomo tara tara dewa mialu naganego ainde tomo maru bayale dendebiore ngaru mialu naga.
19 Ne hegelame nogo egaru bayale dendebi ogoale lalu mo tale biagane nga. Manane ogonidagua dege wali agali mandabi kagome bi henene lara ogo ke̱ howa laragoni lalu abale mo talebu lai haga nga.
20 Wali agali manda bayale nawi karume genda dewa mo yu anda ibagane nga. Anigo wali agali manda bayalewi karu tigua bi ko larago baya hangu ladai bibehe ka.
Wali mbira í̠ dabubule manda bu kego ibunaga mana baya hangu dabo handabe lenego ogo
21 Agali ibunime wali taya bulene nga. Anigo pigane wali ibu dabubule hame ledago ibuni abidabe hondole ala daba hondolene nga.
22 Walinaga dengui baya ho bedagome agali mo turu halu agali maru karunaga dimagoli holene mo heya hagane nga.
23 Wali bi hongo howa wali agali maru karu baba nalagane bereagua nde wali ogoni agalini kago ibu turubiore ka.
24 Agali wali ogoni dabubini kago ibu mbirale bayale duniniore mbirago mo wu haradagua bidago irane wali bedago ibu biamogo biagabi ibula mandagi hagabi bedagome ibu turubi ka.
25 Mabu mbira ngago pabe nabi hangayagua nde nogome mabu duga holebira. Anidagua dege agali mbira kago ibu wali nabere heagua ibu mabu pabe nabi ogonibi bame ibagabu haga ka.
26 Wali agalime agali mine haga karu tanoha ibagabu helo hame nalaga ka.
27 Ani bialu maru tini anda nahe bame paliaedede bima ibaga bialu haga karu hame naleda.