10
Gabumane biabe bayale bulene ngago ogo
1 Agali haguane kago mini gigabiwi heagua nde ibunaga wali agali baya hangu haru halu wali agali manda bayalebi karume haguane howa wali agali baya hangu haru holebira.
2 Wali agalinaga agali haguane kago ibu bayale heagua nde wali agali tibi bayale dege holebira. Ani bialu agali haguane dindi mbira mbiraha haga bidago bayale heagua nde ibunaga wali agali bu karubi bayale karulape dege holebira.
3 Kini ibu mini nawi heagua nde ibunaga wali agali mo ko hai hagane nga. Anigo agali timbuni haguane hayadago ibuni manda bayale bi heagua nde ibugua ibunaga dindi bayale ngelo mo heya hagane nga.
4 Dindi handaya ho holene hongo Anduane Homogo ibuniha ngago ainde ibugua wali agali bayale karu mo heya holenengi mo heya haga ka.
5 Anduane Homogo ibunime wali agalinaga biabe bulene ngago mo bayale halu kininaga beba gilibia dagala biaga agali kagonaga mini yaraga haga ka.
Anduane Homogohanda wali agali mine haga karu bo wahai holebira lenego ogo
6 Í̠naga nenege kagome ko emene mbira biragola ibuhondo keba halu hongo howa lai lolene nawigo nalabe. Wali agali mbiragome í̠la mine hayagua nde bialu helo habe. Mbirale mbira abale bulene nawiorego nabibe.
7 Mine hagane ngagobi wali agali mende kago mo ko holene mana ngagobi ogoni Anduane Homogonaga denibi wali agali maru karunaga denibi mana koore nga.
8 Gabumane agali tara tara bu karume mana ko lehe ngago taluwa bialu mine halu page dewa biaga ka. Anidagua biagane ngagome horo ayu marume gabumane haru kagola horo mendengi agali marume gabumane haru haga ka.
9 Wali agali dindini hene bame dege kago ai tininaga mini mo yaraga halu holene nawiore. Ti dindini kangi dege homabi ti heba nahe dege ka.
10 Anogodame warago lu balu wirago manda bibe nahe haga bialu kagoni.
11 Ayu í̠ kini kegoni yawi í̠ homale dege ke. Wali agali homene ngago ngoebi bunguna bedarubi hi̱mi̱ ngarubi tigua homa tingini ngago handaya ho haga nga.
12 Wali agali mine haga karume Anduane Homogo wahagaya. Tigua tinaga bu miniha Ngode Datagaliwabe mitangi emeneorebi mbira nahagaore ka.
13 Mana ko bulene ngago ibunime mine holene yu anda ibaga nga. Ainde wali agali kome dariba hene karu tigua mana koorene ko tara tara ngaru bialu haga ka. Ani bialu kagonaga Anduane Homogo ibugua wali agali tara tara bu karu pani mialu bo wahai halu erebaore helolebira.
14 Anduane Homogohanda kini hearu bope hai halu wali agali damene bu hearu minalu kininaga henge wiagoria bira karu lelaya.
15 Anduane Homogohanda wali agali dindi anduane hearu bo taliatagi hai howa wali agali daga nolene bu hearu minalu ti hene wiagoria ho aribia helaya.
16 Anduane Homogohanda tinaga dindi mo labu hai helalu ti dalu wiaru bo haealahole bilaya.
17 Hameigini maru bo haealahole biai helayagola wali agali uruni aria mbirali abago ogoria heneya lalubi mani te nalolebiraore.
18 Anduane Homogohanda wali agali ti ibaga biai halu mine halu keba howa bi hongo howa lama ibaga bu helo ndo wabini.
Mini lene daligaore ai kabe lenego ogo
19 Mbirali ai ibuore mini lene holobadabe. Wali agali degeme mulene nga. Ai ibu mini lene holene ngabe. Wali agali Anduane Homogonaga bi hale haga karu ti dege mini lene holebira. Wali agali mini lene habe nahe ai kabe. Wali agali dege holebira. Ai ibu mini lene holebirabe. Wali agali Ngode Datagaliwabenaga bi mana lo ngago hale nahaga bu karu ti mini lene naholebira.
20-21 Wali agalime tinaga haguane kagonaga mini yaraga haga ka. Anidagua dege Anduane Homogohanda wali agali ibunaga bi hale halu haga karunaga mini yaraga haga ka.
22 Wali agali Anduane Homogo gi halu ibu andaneha haga karu ti homogo mbirale dewaorewi heaguabi wali agali mini lene heaguabi mini nalene heaguabi bibahende mini lene hai holebira.
23 Mbirali yagibano howa manda bayalewi kago bo hengedope holene nakarulape. Wali agali mana ko biaga karunaga mini yaraga holenebi koore nga.
24 Ainde heneneore wali agali tigua agali timbuni karubi agali haguane karubi godi hale halu manani mo tale biaga bu karubi uruninaga mini yaraga haga nga. Anigo wali agali uruni aria karu ti mbirame wali agali maru Anduane Homogonaga bi hale haga karu bolangua habe naheore ka.
25 Anda anduane kagome biabe bia haga mini mandaru bayalewi kago talima piagane nga. Ainde wali agalime mini bayale wu heagua nde ogoni wu kago taga holene nawi.
Bayale mini lene holene ngago ogo
26 Ai biabe mbira bialu hariyagua kudaga bi lama ibaga nabibe. Ani bialu í̠ yagibano hariyagua nde ke̱ howa í̠ninaga mini yaraga halu holeni nahabe.
27 Wali agali biabe bialu howa tiha mbirale tubagi nahe karume wali agali kudaga bi dewa laabo halu tomo nolene nawi gariho karu bolangua hene ka.
28 Waneigini-o í̠ni mo dindiha ho hariyagua nde í̠ mini lene bayale holebere. Ani howa bi í̠na larego galone hayagua nde í̠ninaga mini yaraga holene karulape ke.
29 Wali agali tini handaya ho habe nahe karu aiwa biamogo bialu holobadabe. Ani bialu wali agali tini taga ho haga karu mini lene helo aiwa mo yaraga holobadabe.
30 Yagibano karu tinime tinaga mini bayale ngago latagi halu kagome tinaga mini mo yaraga hene mini lene haga. Anigo homogo bu karu ti tininaga mbirale dewa wu karume ti mo mini lene helaga ka.
31 Yagibano mbira ibu mini lene hayagua ibu muniru dewawi harangi ibunaga mini yaragaore halu ibu mini lene daligaore mbira holebira. Muni mbirale dewawi homogo karu ti mini lene ndo heagua nde mani ti yagibano harangi tinaga mini nawi erebaore holebira.