Pilibai
Polohanda Keriso hameigini Pilibaini hearuhondo beba ogo gilibu wia hene
Mbuga ogoha gilibu ngarunaga nemandi ogo
Polohanda Keriso hameigini Pilibaini hearuhondo beba ogo gili binigo ibu garabaya andaha howa gilibu wia hene. Polohanda genda ho howa beba gili binigo irane Ngode Datagaliwabe mana henene ngadagua ndo lawai haga agali maru hearume Pilibaini Keriso hameigini hearu mo guya halu ka layagola ibugua mana mo tiga bule beba ogo gilibu wia hene. Genda ho henegoyu beba ogo gilibu wia henegome Polo ibuni Yasu Kerisoha mini hanahe holenebi turu holenebi handa walia henego mo walia ho nga.
Ala Polo ibu garabaya naheha Keriso hameigini Pilibaini hearume Polo ibu buru pale hearia biamogo bialu mbirale maru wia henego ogoninaga ka̱i̱ lalu gilibu wia hene. Polohanda, Keriso hameigini ti mine nahe tini mo dindiha halu mini Yasu Kerisohanda wiyadagua wialu holene nga, lene. Wali agali Kerisoha ho gimbu bu howa holene gahenge yu hagago irane Yu wali agalinaga mamali mana biragome ndo Yasu Kerisohondo mini mbiraore wiragome holene gahenge yu haga, lene. Kerisoha ho gimbu bu karuhondo Ngode Datagaliwabehanda miniha turu holenebi mo palia holenebi ngiaga ka, ogoninaga lalu gili bini.
Beba ogoriani Yasunaga talima piagarume turu holenebi mini dungulo holenebi mo mbiraore ho holenebi hibu lalu hongo ho holenebi uruni bibahende tinaga nga lalu gilibu wini. Ai beba ogome Polohanda Keriso hameigini Pilibaini hearuhondo gubalini timbuniore ho henego mo walia ho nga.
Bu̱lu̱ baga buwa kuni gilibu ngago
1.1-11
Polohanda wali agalinaga la henegonaga nga 1.12-26
Polohanda, I̱ ogobi kogoni, lalu lenego nga 1.27–2.18
Kerisoha howa ogodagua holene nga, lenego nga 2.19-30
Timodi Ebaborodaidasalame biabe bilo manda manda bu winigonaga nga 3.1–4.9
Waitigi karu de hondo holene nga lenego nga 4.10-20
Polohanda ibu nenegeruhondo bi lenego nga 4.21-23
Lamaro bialu lenego nga
1
1 Polo Timodibi iyame Keriso Yasunaga biabe bia haga howa Ngode Datagaliwabenaga wali agali Pilibaini Keriso Yasuha ho gimbu bu kamirubi Keriso hameiginiru haru haga kamirubi biamogo biaga kamirubi tí bibahendehondo beba ogo gilibu wia haraba.
2 Ina Aba Ngode Datagaliwabebi Anduane Homogo Yasu Kerisobi libugua biamogo bia holenebi mo palia holenebi tíhondo ngilo hame ledo.
Polohanda Keriso hameigini Pilibaini hearunaga Ngode Datagaliwabehondo bi la henego ogo
3 I̱na tí mitangi beroangi Ngode Datagaliwabehondo ka̱i̱ laruli.
4 I̱na Ngode Datagaliwabehondo bi lalu howa tí bibahende mitangi biai halu turu howa bi la haruli.
5 Irane tígua i̱ biamogo bialu bi mana debene lamulene biabe ogoni pigane tehinarimangi howa bialu harimago áyubi bia ho wiaabo kamagonaga ibuhondo turu halu ka̱i̱ lalu kogoni.
6 Ngode Datagaliwabehanda tíha biabe bayale pigane biyagoni Keriso Yasunaga Horo harangi bia maro bule lowa ibugua bia ho wiaabo holebiralo manda bu ko.
7 Horo bibahendengi tí i̱naga gubaliniha mitangi bu wiaabo hagago ogoni tíhondo gubalini ho kogobiore bira. Biamogo bia holene biabe ogoni Ngode Datagaliwabehanda i̱hondo ngiyago i̱naga hangu ndo tíbi i̱ heba biabe mandagi howa bialu kama. I̱ ala garabaya nahe hewangibi áyu garabaya bidagola kogo howabi wali agalime Bi Mana Debene yu tiga bilo lamulenaga wai bialu kogola tíbi nde ina haru mandagi bialu harimago kamagoni.
8 I̱na tíhondo gubaliniore ho kogonigo gubalini holene ogoni Keriso Yasu ibuninaga gubaliniha howa ho kogoni larogola i̱na heneneore larogo Ngode Datagaliwabe ibu manda bu ka.
9 I̱na Ngode Datagaliwabehondo tínaga bi la haruligo ogo. Tínaga gubalini holene anda halu wiaabo helobi manda bulene henenebi daba ki bulene tiga tigabi heba anda halu wiaabo helonaga laruli.
10 Mbirale dabolene ngagola bayaleorego dabalimulonaga bi la haruli. Ani dabarimiyagua Kerisonaga Horo harangi tíni ko mbira para nahe tigatiga holeberami.
11 Ngode Datagaliwabe mini daliga taraore lelonagabi ibu mini mo yaraga helonagabi mana tigabiore bulenenaga lini Yasu Keriso ibunime ngiagago ogoni tíha to̱lai helo i̱na bi ogoni la haruli.
I̱na Kerisonaga mini yaraga holenaga garabaya kogoni
12 I̱ hamene mbaliniru-o i̱hondo mbirale biyarume Bi Mana Debene heneneore lo yu lelonaga biyago manda bilimulo hamelo ko.
13 Ani bidago haru haganaga ami agali mamage haga bibahende karubi maru bibahende ogoriani karubi tigua i̱ garabaya kogoni irane Kerisonaga biabe bia haga harugome kogoni manda biai ka.
14 Ai i̱ garabaya anda kogome Keriso hameigini dewa karu tinaga miniha mo hongo kagola tigua Anduane Homogohondo mini mbiraore hongohe wu ka. Ani bialu tigua Ngode Datagaliwabenaga bi mana lamialu howa mo hongoore haragola gi nahe lalu ka.
15 Ti marume tinaga miniha lai lolenebi ponana mini wu howabi Keriso mini lalu lamiaga ka. Ti marume mini henemane wu howa Kerisonaga mana lamiaga ka.
16 Bi mana debene wali agalime heneneore winidago lalu bayuwa yu tiga bilonaga i̱ garabaya andaha helayada manda buwa ti marume gubalini howa Kerisonaga mana lamiaga ka.
17 Marume mini henene wu howa ndo tini mini mo yaraga holenaga Kerisonaga mini lalu lamiaga ka. Tigua i̱ garabaya andaha koria tandaga nolene lone mo tago helonaga lamiaga ka.
18 Nde abini. Ti mini ko wu howa layaguabi bayale wu howa layaguabi ta nabi tigua Kerisonaga mana dege lamiaga kago mitangi buwa i̱ turu ho ko. Nde turu ha ho wiaabo holebero.
19 Irane tí kamirume Ngode Datagaliwabehondo i̱naga bi la ho wiaabo haramiligobi Yasu Keriso Dinini ibugua i̱ biamogo biaabo hagagomebi i̱ golope holebiraore manda bido.
20 I̱naga bu miniha howa bule hame lalubi mini dunubia ho kogobiore ogo. I̱na biruligobi bi laruligobi mitangi bialu yu wa naholeberoore. Horo bibahendengi áyu kogoni howa gi nahe mana lade haabo harulidagua laabo hole hame timbuni lo kogoni. I̱ haruyaguabi homaruyaguabi ta nabi i̱na berogome Kerisonaga mini yaraga holenaga bialu holebero.
21 I̱na manda bidogo ogo. I̱ haruyagua Kerisonaga mini yaraga halu holebero. Homaruyagua nde baya gibiore yu holebero.
22 Ani ndo i̱ tingini nahome haabo haruyagua i̱na biabe bayaleore biaabo holiyanaga biyadago loleberogoyu ago daboabe tobaho ko.
23 Kirabalime i̱ mini yani haga haga bidagola kogoni. I̱naore dindi ogo wahalu homalu Kerisola haabo hole polenegoore bayaleoredane hondo ko.
24 Ani bibehego tí mitangi bialu tí bayale halimulonaga i̱ tí heba haabo kogoni.
25 Aniore bidalo manda bidogo i̱ tí bibahende baba howa i̱na tí biamogo bialu Ngode Datagaliwabehondo mini mbiraore wu kamigoha anda holenebi turu holenebi wia tago helo holebero.
26 Ogonidagua i̱ tí heba lone kogola tígua Keriso Yasuha howa i̱ tínaga hameigini kogo mitangi bialu Kerisonaga mini yaraga holene irane timbuniore wulebira.
27 Anigo galone buleneore ngago ogo. Wali agali baba howa tígua bi laramirubi mana beremirubi bibahende Kerisonaga bi mana debeneme ledadaguaore bialu halimu. I̱na tí kamiria handama ibiruyaguabi naibiruyaguabi tí mini mbiraho ka larane hale holebero. Tí hongo howa biabe mandagi ogo bima lalu wali agali marume bi mana debene hale howa mini mbiraore wilonaga bialu kami manda bulebero.
28 Ani beramigola tí baba waitigi haga birarume tini koha polene ngagobi tí kamiru pele mulene yu holene ngagobi walia holebira. Ogoni Ngode Datagaliwabe ibunimeore bulebira.
29 Ngode Datagaliwabehanda tígua Kerisohondo mini mbiraore wulene hangu ndo ngini. Ibugua tí Kerisonaga howa tandaga na holenebi tíhondo ngini.
30 Ala i̱na wai ogonidagua dege bialu hewaria tí de handarimigoni. Áyubi ogonidagua dege bialu kogoni hale ho kamigoni. Wai ogoni dege tíguabi bialu kamigo manda bilimu.