5
Yarusaleme agali hearume emaga de hendenego ogo
1 Ogoningi dege Andiogusu ibugua Iyibi baba wai lone bialu hene.
2 Yarusalemeha wali agali bu hearu tigua manane tara mbira harini hearia handa walia howa horo pira mariani (40) hondo haabo hene. Tigua hondo hearia ami agali dewaore nogo hosini biralu gerai lalu puíbu bialu hearia de hendene. Ami agali maru nde danda timu yandareru wai biagane ayu tiburubi yu hearia de hendene.
3 Ami agali nogo hosini biruwa wai biaga hearume wai pora bule manda manda buwa ona tidiyu haga haga bini. Ani heagola ami agali maru geni pialu wai biaga hearu tigua lene labo laboha tidiyu haga haga bini. Ani howa wai bialu hene. Wai bialu howa wai biagane ayu tibubi yandare wai humbirume kilingele tilitola lalu wai timbuni uru ba hagahaga bini. Hona ni do wiagoria ami agalinaga wai yári taraore de mborerebi hene.
4 Ani biyagola wali agali tanoha bu hearume Anduane Homogohondo bi lalu mbirale manane ogoni heneneore mbirale bayale mbira mani tagira ibilonaga bi lalu hene.
Yasonohanda Yarusalemeni wai binigo ogo
5 Bi dibudibu mbira lama ibiyagome lalu, Kini Andiogusu homaya lene hale hene. Ani biya handala Yasono ibugua ami agali daosini mbira (1,000) haru halu puwa Yarusalemeni wai bini. Wai bialu Yasono halu ibunaga ami agali biarume Yarusaleme agali maru wai pabe neneni mamage haga hearu bo taliatogo lalu tano ti karulai hene. Ani biyagola Menelausu ibu ibida pialu tanoha ami agalinaga wai pabeanda hongohe heagoha ha do hene.
6 Ani biyagola Yasono halu ibunaga agali biarume tano bibahendeha pugu pugu bialu tini aria bu hearu homelo bo wahai hene. Ainde Yasono ibugua wali agali ibuni dameneore bu karu homelo bo wahai haruyagua nde mani ibunaga hongo pirilape halu ibira holobada lo manda nabi ibu mini tigabi nawiore hene. Ibu dameneore bu hearu waitigi handaradagua bini.
7 Anigo Yasono ibugua gabumane haru holenenaga hongo nawi hene. Ani howa ibugua mana lehe ogonidagua bialu henedagome ibuniha taga mo yu anda ibiyagola ibuni hado hole Amono dindiha puwa hado hene.
8 Ani pu heagola mani howa Arebia dindinaga agali haguane mini Aredasahanda garabaya andaha helowa mini bayagola mo ko hene kuduguhe hene. Ani howa mani ibu ibida pialu tano wiaruha hadoho haga hene. Ani howa ibugua mana pugualu hearia wali agali tano uruniha hearume ibu baba keba howa bo talima ibaga bialu hene. Ibugua mana ko bialu wali agali ibuni dameneore hearubi ibu baba dindi mandagi haga hearubi ta nabi bo hilo wahai haga hayago manda bialu tigua ibuhondo turu nahe hene. Ani biyagola mani ibu Iyibi dindiha ibida pialu hado hene.
9 Ani halu mani Yasono ibu Iyibi wahalu iba sibini biralu Sabarada tano pole pene. Ibugua lo mitangi bialu Sabarada wali agali Yuda nenege kagome ibu dara halu baya hangu haru howa handaya ho holobabe toba howa pene. Anigo ibuni dindi kaundia ogoniha heaore dege homene. Agali ogoni ibugua ogonidagua bialu wali agali ibuni daluha ibu damene bu hearu bo talia hole bialu ibunibi agali mini nawi ko mbirago homaradagua bini.
10 Yasonohanda wali agali dewaore homelo bo wahai heneru mo hora habe naheore tingini bame dindini wialu wu togo biai helene. Ani binigonaga mani ibuni pani nolene wiago nene. Ibu homayagola dara holene mbira nahene. Ibunaga homali bulene mbira naheore wialu ibu mamalirunaga homaliha mandagi hora hole mo yu dai bulenebi mbira nahene.
Andiogusuhanda Yarusalemeha wai binigo ogo
11 Mbirale uruni biya layago te Andiogusu ibu hale ho howa ibugua lo manda bialu Yudiaha wali agali bu hearume wai bule heyu kada lo manda bini. Ani manda buwa ibunaga bu miniha tandaga timbuniore ira hungu ale bialu helo hene. Ani keba ho howa ibugua Iyibi wahalu abale puwa wai timbuniore u napalene Yarusalemeni bialu bo podahana halu tano karulene.
12 Ibugua ibunaga ami agaliruhondo lamialu lalu, Wali agali lenego bibahende harigani ngola haramigobi andagaha birado karia handa walia haramigobi bibahende dara nahe homelo bo wahai halimu, lalu lamini.
13 Ani layagola tigua puwa igini emene hearubi agali waheale biru wiarubi wali berearubi waneigini gali andu naga berearubi bibahende homelo bo wahai hene.
14 Horo tebira hanguni Yarusaleme wali agali daosini dege pira halira (80,000) bibahende amo lelene. Daosini dege pira maria (40,000) homelo bo wahai halu daosini pira maria (40,000) mende garabaya haru piai hene.
15 Anigo Andiogusunaga keba ereba nahe wiaabo dege hene. Ani keba ho haabo howa Anduane Homogohanda dindi bibahende wiaru dege dombene anda ibunagaore loma bia hene helo loma biahe heagoha anda pene. Ani piyagola Menelausu libu haru anda pene. Menelausu ogoni agali Anduane Homogo erembira mialu ibuninaga damene biaru erembira miaga biago libu haru anda pene.
16 Andiogusu ibu Anduane Homogo deni bayale ndo dodohe heago howa ibugua andaga tamuha gabo wiaru gime mo yalu pene. Ani bialu mbirale bayale tara tara kini maru hearume Anduane Homogonaga mini mo yaraga halu bame migi bini ela nahaga loma biahene wiarubi mo ya dege bini.
17 Andiogusu ibugua mine gibiore hene. Ibugua Ngode Datagaliwabehanda Yarusaleme wali agalihondo keba emene tigi mbira hangu haga kago manda nabiore hene. Wali agali tigua mana ko bialu heagonaga Anduane Homogohanda ti mo ko helo Andiogusu ibilalu Andiogusuhanda Anduane Homogonaga anda mo ko helo yupe hene.
18 Ainde Yarusaleme wali agali tigua mana ko nabinidale nde Anduane Homogohanda Andiogusunaga miniha mo talola halu mo luluya ho heledale. Bamba Anduane Homogo ibugua agali mbira mini Heliodorusu heago Amduane Homogonaga andaha muni agua ngabe hondo wule pu lalu Kini Selugusuhanda pelayangibi nde ani dege bini.
19 Ngode Datagaliwabehanda wali agali Anduane Homogonaga anda biamogo bilo dabo helene ndo ibugua wali agali biamogo bialu Anduane Homogonaga anda helene.
20 Ani binigome anda biago wali agali heba mo ko hamaga halu mani lone wali agali heba bayale hadai biamaga halu mini lene hamaga hene. Anduane Homogo Bibahendenaga Hongo Haiheore kago ibugua keba ho kangi ibunaga anda kago mo embeda haga ka. Mani ibunaga keba holene ereba harangi ibunaga anda kago lone mo bayale haga ka.
Waitigime Yarusalemeha wai lone binigo ogo
21 Andiogusuhanda muni siliba daosini pira waragaria (60,000) Anduane Homogonaga andaha wiago mo pagebu yalu abale Andiogo tano dai bini. Ibu lulu taraore mbirago howa ibugua mitangi bialu iba sibi bame iba mu ngagoria pialu ami agali iba solowarani gehalu polebira lo manda biniya.
22 Ibugua kiabe agali maru Yuda wali agali tandaga mo mialu helo dabo helene. Ibugua agali mbira Pirigiali mini Pilibi heago Yarusaleme kiabe helo dabo helene. Agali Pilibi ogoni ibu minehe koore howa mana ko ibugua biagago Andiogusuhanda biaga wiago bolanguahe hene.
23 Kini Andiogusuhanda agali mbira mini Andoronigusu heago hari bare Gerisimi heagoha kiabe helo dabo helene. Ani bialu agali mbirabi daba dege binigo mini Menelausu. Agali ogoni ibugua wali agali ibuni damene bu hearu genda timbuniore kiabe agali kira biago labome miyago emene dege lowa mo mialu haga hene.
Andiogusuhanda Yuda wali agalihondo keba timbuni halu howa
24 ibugua agali mbira mini Aboloniusu ibu Misia dindinaga ami agali haru haga haguane heago ibunaga ami agali daosini dege pira kirani kira (22,000) hearu haru halu Yarusaleme pelene. Pelalu howa Andiogusuhanda tihondo lamialu lalu, Agali damenego bibahende bo hilo wahai halu wali waneigini minalu garabaya haru hai halimu, lene.
25 Ani laya handala Aboloniusu ibu pialu Yarusalemeni anda pu howa ibugua ko mbira nabi bayale hole tingi ho hene. Ani howa Sabada horongi hayagola Yuda wali agali biabe nabi bame ha̱lo bereagola ibugua ami agali hearuhondo lamialu ibu de hondoliya tano tagirahayagi ho dugubu hole pudaba lene.
26 Ani howa wali agali ami agali biaru ti ho dugu buwa tidi yu ibaga bialu heago hondole tagira ibiyaru homelo bo wahai hene. Ani bialu mani ami agali biarume tanoha anda puwa wali agali dewaore homelo bo wahai hene.
27 Anigo agali mbira hangu mini Yudasa Magabeusu henego ogoni dege agali diriali heba pora bialu ibida dindi ko wali agali nahaga wiagoha pene. Ti pialu hari bare ko wiagoha howa tomo ega tiarume nalu biraga wiaru nalu hene. Ti tomo irabuha minana ira yuni lini tara tara wiaru nalu hene. Tomo tanoha wini ngaru naramagola Yuda wali agalinaga mana lo wini ngaru mbirago pugualino ani hene.