8
Yudidi ibu Ngode Datagaliwabehondo bi lalu biraabo hagago ogo
1 Horo ogoningi mbirale uruni bira layagola Yudidi ibu hale hene. Yudidi ibu Merari wane berene. Merari ibu Oso igini howa Oso ibu Yosebe igini hene. Yosebe ibu Osiele igini halu Osiele ibu Elegia igini halu Elegia ibu Ananaiasa igini hene. Ananaiasa ibu Gideono igini hene. Gideono ibu Labaimi igini hene. Labaimi ibu Ahidubu igini hene. Ahidubu ibu Elaya igini hene. Elaya ibu Hiligia igini halu Hiligia ibu Eliaba igini hene. Eliaba ibu Nadaniele igini halu Nadaniel ibu Selumiele igini hene. Selumiele ibu Surisadai igini halu Surisadai ibu Yagaba igini hene.
2 Yudidi agalini mini Manase henego ibu nde Yudidila libu hameigini mbiraore damenela pene. Ainde agali ogoni ibu mabuha balawa wabiaga mini bali mabuha howa lini dearu gandu lowa mo mogobu wigi bialu hearia homene.
3 Ai agali Manase ogoni ibugua agali maru bali lini deago gandulo mogo bialu heago haru heagola nime ibunaga haguaneni hongoheore daba hayagola ibu andaga pialu Bedulia tanoha ibuni dagiani palearia homene. Ai ibunaga tingini ibu aba mamaru hora heagoria dege Dodana tano Balamono tanola hengene wiagoria hora hene.
4 Ani bialu Yudidi ibu dara howa duguanda mali tebirani ege maria ibuni daluha biraabo hene.
5 Ibu anda dangini tigabi mbarale wiagoria hobane mbira bia howa ibugua ogoriani dara howa biagane aga karulo biraga berene.
6 Ibu dara ho birayadagoha biruwa tomo dewa nane wahowa berene. Anigo ai Sabada horo mendengi hole lowa horo pigane harangibi horo Sabada ibuni tagira ibirangibi horo timbuni malinaga ege pigane ngabulo mbiraga piganengibi horo ogoni ibuni tagira ibirangibi horo Isaraele tinaga Ngode Datagaliwabe bi lolene tagira ibirangi tinaga horo timbuni turu ho haga winigo tagira ibirangibi horo uruni bibahende ibirangi Yudidi ibu tomo wanahe nolene ngadagua naga berene.
7 Ai Yudidi ibu wali baya tara mbira ibunaga dengui bayaore wali maru berearubi ndo ibu bayaore mbira berene. Ainde ibu agalini Manase homayagola muni ngolo dewaorebi wali agali biabe biaga hearubi nogo bibahendebi maburubi dindibi ibuni karulai hene. Ani karulai howa Yudidi ibuni handaya ho haga berene.
8 Bi wahalu wali agalibi mbiralime ibuhondo bi ko mbira lade habe naheore ibu Ngode Datagaliwabe andaneha biraabo howa bi lalu biraga berene.
Yudidihanda agali haguane hearuhondo keba halu lai lenego ogo
9 Wali agali bu hearume ti iba nalu holene nawidagome tiha mo ko holene timbuniore wiyada lowa tigua keba howa Usiahondo lai lalu heago Yudidi ibu hale ho berene. Ani bialu Usiahanda bi layago leagola horo duria howa tano ogoni Asiria ami agali karuhondo mimi̱ya lalu gi dolalu lo wiyagobi Yudidi ibu hale hadege bini.
10 Ani hale howa Yudidihanda wali mbira ibunaga mbirale ngago damene bibahende handaya ho hai haga bereagohondo lamialu, Usiabi Kabarisibi Kamasibi tanonaga agali haguane tebirali uruni i̱ bedoria ibidaba laya lalu lamule pu, lene.
11 Agali tebirali uruni ibiyagola ibugua tihondo lamialu lalu, Tí Bedulia tanonaga agali haguane bedemiru tígua bi i̱na larogo hale hadaba. Tígua wali agalihondo bi áyu lamirimigo nakarulape larimi. Tígua mbirale buleore lowa Anduane Homogonaga deni howa gi dolowa lalu Anduane Homogohanda horo duria ogoniha ina biamogo nabiyagua nde tigua tano ogo waitigi giha mo ya hami̱ya larimiya.
12 Anigo tí ai howa tígua horo duria ko tagira ibirangi Ngode Datagaliwabe kago bahondolene manda birimibe. Tígua Ngode Datagaliwabe bolangua halu tí daliga holene manda bu kemibe.
13 Tígua Anduane Homogo Bibahendenaga Hongo Haihe kago bahondolene manda birimida. Tí mini nawiore harimida lo manda bido.
14 Tígua agalinaga bu habaneha manda bu kago ogoale bu ka lalu manda biade habe naheore kemigoni ndobe. Ani bialu agalinaga miniha yado kago handabe naheore kemigoni ndobe. Ani ngago ai tígua Ngode Datagaliwabe ibu mbirale ngago wabiai haga kagonaga miniha wu kago agua handa walia holeberemibe. Mbaliniru-o darabioredago tígua Anduane Homogo inanaga Ngode Datagaliwabe kago ibugua ina baba keba helo tígua mo keba nahalimu.
15 Ibugua ina horo duria uruni andaneha howa biamogo bua nahayagua nde horo tara mendengi biamogo bulene hongohe karulape ka.
16 Ina Anduane Homogo inanaga Ngode Datagaliwabenaga mini hamelo ngago handaya ho hagane ndo kema. Iname mo giha ladebodebo bia bulene Ngode Datagaliwabe ibu ina wali agali kamago ale ndo ka.
17 Ani kago manda bialu iname hondo howa ibugua ina dara halu biamogo angi birabe hondole ema nabi howa biamogo bia lowa ibunihondo olalu haabo holene nga. Inanaga dugu bialu kemago ibunaga hameme hale hoa biyagua nde hale holebira.
18 Bamba ina mamaliru howa hama ibinigo áyu kemagoni howa hameigini mbiralimebi dindi gibuni podenehayagi habagi ho henemebi aba igini emene mbiramebi mbirale dama mitangi bialu bi pupu wule gime wabini wiaruhondo bi pupu nawi hama ibinigo áyu kemagoni ndobe. Bambaore inanaga mamali alaore headarume nde dama mitangi bialu bi pupu wule gime wabini wiaruhondo bi pupu wialu heneya.
19 Anidagua bialu hemiria Ngode Datagaliwabehanda tí waitigi giha pilopaga helayagola bibahende tini homai halu mbirale wiarubi mo page biai helalu biyagola ti bibahende ko hai hene.
20 Ani binigo áyu iname bi pupu wule gime wabini urunialehondo pupu nawi wahai halu iname Anduane Homogo ibuni inanaga Ngode Datagaliwabe kago ibu hanguhondo bi lalu kema. Ani bialu haga kemago manda bialu ibugua ina bame handaya naholebirago iname ibuhondo mini mbiraore wu holene nga.
21 Hale hadaba. Waitigime anda ibalu ina balu wayali hayagua nde Yudia wali agali bibahende bo hana hai holebira. Ani bialu Ngode Datagaliwabenaga anda kago heba bo gialo wahai holebira. Ani biragola Ngode Datagaliwabehanda ibunaga anda barago pani inanaga darama poragome holebira.
22 Ina damene bo wahayaguabi maru garabaya yalu piyaguabi uruni iname bia ko hene mbira ngane hondowa bulebira. Ani bialu dindi inanaga mamalirunaga hiha howa bame ngini yu harimago bo gialo wahai halu bo labu hayagobi nde iname bia ko haramagome dege bulebira. Ani bialu ina garabaya biabe ale bialu kemagola tigua ina mo taga haragola waitigime ina mo taga timbuni halu kagome ina tinaga deni ko galone nabulene mbirago holeberema.
23 Ani birangi mbiralime dara holene nawulebira, lalu Yudidihanda lene.
Yudidihanda mini bayale gigabi wiago latagi henego ogo
24 Yudidi ibugua laabo halu lalu, Ani bulebirago ai mbaliniru-o ina damene bu karuhondo mana bayalego bu walia hami̱ya. Ai tinaga holene bibahende inanaga giha ngagoni ndobe. Ani bialu Ngode Datagaliwabenaga andabi ibunaga lomabu delaga dabubi inanaga giha dege nga.
25 Iname Anduane Homogo inanaga Ngode Datagaliwabe kagome bamba ina mamali bahandalu henedagua áyu inabi bahandaragoni.
26 Ibugua Abarahamahondo biyagobi Aisagahondo genda mo miyagobi Yagaba ibugua ibu hanini Labananaga nogo sibi hinalu Mesobodemia heangi biyarubi iname manda budai bulene nga.
27 Ngode Datagaliwabehanda agali uruni tinaga miniha agile ngabe hondolenaga ti henemane bahandaga binigo. Ai áyu inahondo ogonidagua bahanda ndo bira. Inaha genda mo ngiyaruni mana ko iname bialu harimago pani karulape ndo ngiya. Ai Ngode Datagaliwabehanda wali agali ibuni kagoria kaware hapara ho kagohondo lawai halu genda holene mo miaga ka, lene.
28 Ani layagola Usiahanda Yudidihondo ladai bialu lalu, Í̠na bi lariruni bibahende henene ngago lai hari. Mbiralime í̠na bi lariruni mo nagalone naholebira.
29 Áyu í̠naga mini manda bayale latagi haregoni áyu pigane ndo latagi hare. Bamba í̠ wandari berengi howa mini manda bayale í̠ha ngago latagi halu mana bayale ngago bu walia halu biraga bedegoni.
30 Anigo ainde wali agalime iba noleneore nawidagola tigua lo hongo halu iname buleore lalu habo nalolene bi ogoni lo widaba lalu ka. Ani bialu iname buleore lalu gi dolalu lo widaba lara.
31 Í̠ wali mini mbiraorewi bedegola í̠ore birarigonigo ainde Anduane Homogohondo inanaga bi lahabe. Bi halu mende Anduane Homogohanda iba dalu ibilalu inanaga iba hambiaga uli ngaru iba biru to̱laragola ina iba nalu hongohe holoma̱ya iba biru to̱lelo bi labe, lene.
32 Ani layagola Yudidihanda ladai bialu lalu, Hale harene. Ai inanaga waneigini aguane aguanalioremebi embeda naholene mbira i̱na bule manda bido.
33 Áyu mbiraga wali i̱naga biabe biaga bedago iya tagira polobaya tigua wai pabe panga dugupe hole manda manda bu halimu. Í̠na horo manda bialu tano ogo waitigi giha ya hole lalu bi lo wirigo tagira naibi ngaore dege Ngode Datagaliwabenaga hongoni howa i̱nime ina Isaraele wali agalinaga genda timbuni ngagoni mo wahai holebero.
34 Í̠na agile bulebe lalu i̱nihondo hale nahalimu. I̱na tíhondo ogoale bule lalu langia nabi howa buledago bupe harogola handalimulo, lene.
35 Usia halu agali haguane hearume bi ogoni hale howa tigua Yudidihondo lamialu lalu, Ngode Datagaliwabe ibunime í̠ handaya ho holebirago í̠ pu. Anduane Homogo í̠ heba kago ibunime waitigime inahondo mana ko bialu karuhondo pani mulebira, lene.
36 Ani lalu ti Yudidi andaga wahalu tini mamage hagane wiyagoria hole pene.