13
Anduane Homogohanda dindi tu wa ta haga biniru Isaraelealime mia nabi winigonaga bi lenego ogo
1 Yosua ibu waheore hayagola Anduane Homogohanda ibuhondo lamialu lalu, Áyu í̠ waheore haridago ai Isaraele hameigini tígua dindi maru karulai nahe kami.
2 Tígua Pilidialirunaga dindibi Gesualirunaga dindibi bibahende ngaruni karu nale dege kamigoni.
3 Dindi unurahayagi Abimi hameiginiru haga ngarubi karu nale kamigoni, lene. Pilidialirunaga kini durialime Gasabi Asadodobi Asagelonobi Gedebi Egeronobi tano uruni bibahende handame haga hene. Dindi hobane mbiraha iba mini Sihoro peagoria howa pialu Iyibi dindila tubari howa pialu abene uyurahayagi Egerono dindi wiagoria tubari bamba Kenana wali agali ti haga biago hene.
4 Anduane Homogohanda la dege bialu lalu, Kenanalirunaga dindi bibahendebi Meara tano Saidono wali agalirunaga ngagobi karu nale dege kami. Dindi ogoni wima pialu amuraore Amoro hameiginiru baba tubari Abege tano ngagoriani tagira peda.
5 Tígua Gebala hameigininaga dindi ngarubi Lebanono dindi ni tagira ibiragohayagi Hari Hemono kago teneha Balagada tano ngagoria pialu amuraore Hamada tano pole hariga tagira piaga ngagoriabi tígua karu nale dege kamigoni ndobe, lene.
6 Ibugua laabo halu lalu, Tígua dindi maru Lebanono dindiha hari labo hengene ngagoha Saidono wali agali bu karu ti haga dindi mini Misirebodo Maimi ngago ogonibi karu nale kami. Isaraele wali agali tígua dindi uruni karulole poramigola i̱na wali agali dindi uruniha karu waratagi hai holebero. Ani berogola i̱na bibe lalu í̠hondo ala langirudagua bialu dindi uruni Isaraele wali agaliru tíninaga dindiore ngelo talebu tahaga bibe.
7 Ani buwa dindi ogoni í̠na hameigini maru dirali karuhondo tu wa ta halu Manase hameigini halu mende karu ariabi podo tahaga bibe. Ani bialu tigua tininaga dindi heneneore ogoni wu helo ani bibe, lalu Anduane Homogohanda Yosuahondo lamini.
Iba Yodana ni tagira ibiragohayagi dindi wiaru talebu minigo ogo
8 Lubene hameiginibi Gada hameiginibi Manase hameiginiru aria marubi ti dindi Iba Yodana ange mendeha abene ni tagira ibiragohayagi winigo Anduane Homogonaga biabe bia haga Mosesehanda talebu mini.
9 Tinaga dindi tubari Aroe tano Iba Anono peago angeha dindi bayale wuyu peagohayagi wima pialu tano ogoniha dindi dombeni wiagobi karulai halu Medeba dindi bayale tigabi wiarubi Dibono dindibi ti dege karulai hene.
10 Ani bialu Amono dindi tu Kini Sihononaga tano wiaruni bibahende ti karulai hene. Ala Kini Sihono ibugua Hesebono tano wiagoria howa tano dewa wiaru bibahende handame ho howa Amono dindila tubari wiagoria handairi haga hene.
11 Tigua Gileada wali agalinaga dindi wiarubi karulalu Gesua dindi timbuni wiagobi Maga dindibi karulaga bima pialu Hari Hemono heago andaneha dindi wima pearu bibahende karulai halu bini. Ani bialu Basana dindi wiago karulama pialu Salega tano wiago karulalu bini.
12 Ani bialu Kini Oga ibu hayadangi ibugua Asadarodo tanobi Ederi tanobi handaya ho haga henego dindi ogonibi Isaraele ti karulai hene. Oga ibu Lebaimi hameigini howa tinaga kini hamaro bini. Ala Mosesehanda Lebaimi hameiginiru baba wai bialu ti bo batagi hai hene.
13 Anigo Isaraeleali tigua hameigini kira Gesua Magadala dege bo batagi nahe hene. Uruni ti Isaraele heba hamaga howa mandagi hene.
14 Ani binigo Mosese ibugua Libai hameigini hearu ti dege dindi mbira tu wa nami hene. Ala Anduane Homogohanda Mosesehondo bilimu lalu laminigodagua bialu mbirale wali agali bu hearume Isaraelenaga Anduane Homogohondo loma biniru mo yalu ibugu biragola irani delagane aria maru Libai hameigini ti talebu miaga wini.
Dindi maru Lubene hameiginiruhondo minigo ogo
15 Mosesehanda dindi tu wigi buwa maru Lubene hameiginiru tinaga dindiore wilo mini.
16 Tinaga dindi tubari Aroe tano Iba Anono peago angeha dindi bayale wuyu peagohayagi wima pialu tano ogoniha Medeba dindi bayale tigabi dombeni wiagobi ti karulai hene.
17 Ani bialu Hesebono tano wiago karulalu ogoniha dindi bayale tigabiore wia gimbu biarubi karulai hene. Ani bialu ogoniha tano dewa Dibonobi Bamodobalabi Bede Balameonobi karulalu
18 Yahasabi Kedemodobi Mebadabi karulalu
19 Kiriadaimibi Sibimabi karulalu Seredesaha tano ogoni hari emene wiagoria wiagobi karulai dege hene.
20 Ani bialu Bedebeobi Hari Pisiga heagonaga andaneha dindi bayale wiarubi Bede Yasimodo dindibi karulai hene.
21 Anidagua bialu dindi bayale ogoniha wiaru karulai hene. Abale Kini Sihono ibugua Hesebono tano wiagoria howa tano uruni bibahende handame ho haga hene. Ani karulo hearia Mosese ibugua wai bialu Midianahabi Ebihabi Legemehabi Suruhabi Huruhabi Lebahabi agali haguane bu hearu bibahende bope halu dindi karulai hene. Agali haguane uruni bibahende Kini Sihono ibugua ti tininaga dindi emene wiadagua haru haga haga bilo dabo helaga bini henego uruni bibahende Mosesehanda bo podo hana hai halu tinaga dindibi karulai hene.
22 Mani bulebiragonaga mbiwia haga agali Beo igini Balama dindi ogoniha heago Isaraeleali biarume ibubi homelo bo wahene.
23 Lubene hameigini baba maru bababi tubari Iba Yodana peago wialu iba doma ederayagi Lubene hameigini tinaga wini. Tano mbira mbirabi dindi emene mbira mbirabi Lubene hameigini tigua wai bialu karulayaru bibahende tininaga dindiore uruni mo wigi bini.
Dindi maru Gada hameiginiruhondo minigo ogo
24 Mosese ibugua dindi tu wigi buwa maru Gada hameigini aria hearu bibahendehondo talebu miyagola tinaga dindi ogoniore wini.
25 Gada hameigini tinaga dindi winigo uru. Yasere dindibi Gileada dindiha tano wiaru bibahendebi mo mialu Amono hameigini hearunaga dindiha Aroe tano ni ibiragohayagi Laba tano kawareni wiagobi mo mialu bini.
26 Dindi uruni Hesebono tano wiagoria howa pialu Lamadamisibebi Bedonimi tanobi wiagoria tagira pene. Ani bialu Mahanaimi tano wiagoha howa pialu Lodeba tano wiagoria tagira pugu bini.
27 Iba Yodana ange edeyagi dindi panda panda bayale wiagoha Gada hameigini tigua Bedeharama tanobi Bedenimara tanobi Sugodo tanobi Sabono tanobi Hesebono dindiha Kini Sihononaga dindi wiarubi ti dege karulaga bini. Gada hameigininaga dindi tubari Iba Yodana peago doma ederayagi ni tagira ibiragoha howa pialu uyurahayagi Galili iba kuyama bereagoria tagira pene.
28 Ani buwa Gada hameigini tigua wai bialu dindibi tanobi karulenedaruni tininaga dindiore wigi bini.
Manase hameigini maru ni tagira ibiragohayagi heneru dindi tu wa minigo ogo
29 Mosesehanda dindi tu wigi buwa Manase hameigini maru hearu podo migi biyagola tininaga dindiore wini.
30 Tinaga dindi tubari abale Kini Oga ibugua handaya ho hene wiaru Mahanaimi tano wiagoria howa uyurahayagi pialu Basana dindi bibahende wiarubi karulene. Ani bialu Manase hameigini maru biarume tano emene emene pira waragaria (60) Yairi hameigininaga ala wai buwa Basana dindi karulaga bini winiru urunibi ti dege karulai hene.
31 Dindi uruni Gileada dindi hobane mendehayagi wiagobi Asarodo tanobi Ederi tanobi karula dege bini. Tano uruni bibahende Kini Oga ibunaga winigo karulai hene. Mosesehanda dindi uruni Manase igini Magirinaga aguane maru hearuhondo tu wa tahaga bini.
32 Anidagua bialu Mosese ibugua Moaba hameiginiru daluha dindi bayale tigabi yu dindi wiagoha hearia Yarigo tanoha tagira ibiragohayagi dindi wiagobi Iba Yodana peago angeha dindi bayale wiarubi tu wa tahaga biai hene.
33 Anigo Mosesehanda dindi tu wa tahalu howa Libai hameigini bu hearu ti dege dindi mbira tu wa mia nabi wahene. Ibugua lalu, Tíhondo dindi tu wa ngulenego nakarulape. Tígua Isaraele wali agalirume Anduane Homogo tínaga Ngode Datagaliwabe kagohondo mbirale miniru tale bialu tíhondo galoneore ogoni ngirago yu holeberemi, lene.