☰ YUDI 1
Yudi
Yudihanda beba ogo gilibu wia hene
Mbuga ogoha gilibu ngarunaga nemandi ogo
Yudihanda beba ogo Keriso hameiginihondo gilibu wia henego irane agali marume Ngode Datagaliwabe mana henene ngadagua ndo mana tara lawai hayagola gilibu wia hene. Ogoninaga Keriso hameigini henene heneru mo hondo holigo lowa Yudihanda bi ogodagua lene. Áyu Ngode Datagaliwabehanda daba bagi ho helenedarunaga mini mbiraore wulene Ngode Datagaliwabehanda ngiai hayago waitigi ibiraru baba hongo howa ladai bilimulonaga beba ogoni gilibu wia haro, lene.
Bu̱lu̱ baga buwa kuni gili bu ngago
1-2
Yudihanda bi ala lenego
3-16
Ngode Datagaliwabe mana henene ngadagua ndo lawai hagago pani nolene wulebira
17-23
Mini bilina ho haabo holenego
24-25
Lamaro bialu Ngode Datagaliwabe mini yaraga henego
1
1 I̱ Yudi Yasu Kerisonaga biabe biahaga Yamesenaga hamene kogoni. Wali agali Ngode Datagaliwabehanda olo helayaru tí Aba Ngode Datagaliwabe ibunaga gubalini holenehayagibi Yasu Kerisonaga haru holenehayagibi kamiru tíhondo beba ogo gilibu wia haro.✡
2 Ngode Datagaliwabenaga dara howa biamogo bulenebi mo palia holenebi gubalini holenebi tíha to̱laiore helo hamelo ko.✡
Agali marume mana henene ngadagua ndo lawai henego ogo
3 I̱naga nenege turubiru-o Ngode Datagaliwabehanda i̱bi tíbi ina bibahende pele ngiyagonaga beba mbira gili bule mitangitangiore bialu haru. Ani birugoyu i̱na tíhondo bi mende gilibu wia holene manda bido. Áyu Ngode Datagaliwabehanda daba bagiho heledarunaga mini mbiraore wulene ngiai hayago ogoninaga waitigi ibiraru baba hongo howa ladai bulene mandabu halimulonaga beba ogo gilibu wia haro.✡ 4 Bi larogo irane agali maru Ngode Datagaliwabe mitangi nabiaga karume ohowa tí heba tagotago bu kagoni. Tigua mana koorene ko birago karulape berama lolenaga Ngode Datagaliwabenaga biamogo bia holene bi mana ngago mo tara haga ka. Ani bialu ina Haguane mbiraore Anduane Homogo Yasu Keriso ibu hangu kago tigua handa tara ho haga ka. Ani bialu karu tí koha pelo lalu bambaore Anduane Homogonaga mbugani mbiwia ho winigo lola haragoni.✡
5 Galone uru nde manda biai ho kami tiraga i̱na tí mo mitangi bia hoa dege halu ko. Anduane Homogohanda Isaraele wali agali Iyibi dindiha howa pele mialu haru tagira piyagome mani marume mini mbiraore nawiyagola howa bo home lai hene.✡ 6 Ani buwa dahuliyali marubi ti holeneniore helayago wahalu tarani pu hayaru Horo hamaro birangi ti heba godi lole Ngode Datagaliwabehanda seni pume uli arumaheha dariba ho haabo heleda.✡ 7 Dahuliyali biarume biyadagua wali agali Sodomo Gomorani hearumebi wali agali maru kaware ha parapara bu hearumebi tinginime ko bulenego hangu mitangitangi bialu dimagoli howa kayu koore tara tara bialu hene. Ani bialu hearu ti ira da ho wiaabo kagoria pani naabo halu kago ogoni manane ina bibahende hondoloma̱ya tigatigaore biapani ho nga.✡
8 Ogonidagua dege agali maru ohowa íbu bi tagotago bu karume de gandeba tara tara handararume tinime tinaga tingini mo ko helo handaga ka. Ani bialu tigua Ngode Datagaliwabenaga haru haga mana wiago mo nagalone hagabi dahuliyali wáhe karuhondo mege biagabi ka.✡ 9 Agali o biarume mege biyadagua dahuliyali bibahendenaga haguane mini Maigelo ibugua mege nabi hene. Maigelohanda dama Heyolabe baba Mosesenaga tingini aiwa mo yulebe lalu garere biyangi ibugua dama Heyolabe mege nabi howa lalu, Anduane Homogo ibugua í̠ talilo helarogo, lene.✡ 10 Agali o biarume mbirale ngaru tene manda nabi howa tigua mege bialu, Koorene koda, laga ka. Gabua tara tarame bua harago biagadagua agali o biarume bua harago biragome Ngode Datagaliwabehanda tini pani nelo mulene ngagoria helolebira.✡ 11 Tigua Kenihanda bialu hayadagua dege bialu kagoni. Balamahanda biyadagua tiguabi muni mule mana ko bulenehayagi pialu kagoni. Korahanda doga halu wali agali hoba migimigi bilo mo bia hayagola bo wahayadagua tiguabi hoba migimigi biyagome bo waholene yu anda ibiya. Anigo tinaga mo ko holene timbu gibiore wulebirago dara holene nga.✡ 12 Tígua Keriso hameigini gubalini holenenaga tomo nole ngoai haramingi taga nahe howa ta nabi bupe haragome ngoai holene uruni mo dodo haga ka. Tini dege mitangi bialu haga ka. Ginu maru dalu nayalu ibaga puyabume bame yalu poralidagua agali biaruni uruni ale ka. Wali agali uruni ti ira lini nadaga pini heba dugu wahene gabuniore wiagagobi ka.✡ 13 Ti iba hongo howa yaribu bima porago ale howa tigua mana tagabi koore bialu karu iba haingoda yatagi hagadagua biatagi haga ka. Ti yakundi maru hariha howa pupe haga karu ale ka. Ngode Datagaliwabehanda ti haaboboore helonaga arumaore dumbilini aleha henge mo manda manda bu winigo nga.✡
Pani nolenenaga ogo
14 Inogo ibu Adamanaga aguanene kane daba henegome uruninaga bambaore mbiwia halu lalu, Anduane Homogo ibuni dahuliyali loma bia hene daosini dewaore karu heba ibulebira.✡ 15 Ibalu ibugua bibahende daba ki bulebira. Wali agali ko Ngode Datagaliwabe mitangi nabiaga karume ibu mo tene nahe howa biyarunagabi ibuhondo handabe manga halu bi koore engengebi layarunaga ibugua ti pani mulebira, lene.✡
16 Wali agali urunime horo bibahendengi guraga guraga bialubi marume biyada lalu ke̱ halu goea bialubi tini minime ko bua kadagua biagabi tinime tininaga biyago mo yaraga hagabi ka. Ani buwa tini hame ledago bulenaga maruhondo bime la deborebo bialu haga ka.✡
Hongo howa mamage holene ogo
17 Anigo i̱naga nenegeru-o mbira mitangi bu dai bulene nga. Ina Anduane Homogo Yasu Kerisonaga abosolo karume ala langiyago mitangi bilimu.✡ 18 Ogoninaga tigua tíhondo langialu howa lalu, Horo hamaro bulene kaware haragola agali maru tagira ibalu tí Ngode Datagaliwabenaga kamigo mege bialu mo tabirane holebira. Ani biaga uruni tini minime ko bua mitangi birago haruru pialu holebira, lene.✡ 19 Agali urunime wali agali mo guru hangu haga bialu ka. Ti Ngode Datagaliwabe Dinini ibugua haru helowa ndo dindini holene hame ledarume ti haru helo ka.✡ 20 Anigo i̱naga nenege uru-o tígua mini mbiraore wirimigoni Ngode Datagaliwabe mana baya gibiore yu tiga bu kamigo anda halu yanga lelo mo tagotago bigi bialu halimu. Ngode Datagaliwabe Dinininaga hongoni howa Ngode Datagaliwabehondo bi laabo halu halimu.✡ 21 Ani bialu howa ina Anduane Homogo Yasu Keriso ibugua dara howa biamogo bialu tíhondo haabobo holene ngilo hondo kami tambu howa Ngode Datagaliwabenaga gubalini holenehayagi haabo halimu.✡
22 Tígua wali agali maru mini kira kirawi howa tobatobaho karu dara howa biamogo bialu halimu. 23 Wali agali maru ti pele mialu ira dedagoria howa abale gilila milimu. Maruhondo dara howa biamogo bialu tíni gi howa dege ani bialu halimu. Tinaga mini ko dimagoli hayagonaga aga dodohe ale karulo karu manga ho halimu.✡
Ka̱i̱ lolenenaga ogo
24 Uru-o Ngode Datagaliwabehanda tí pi nale halimulo bayuwa haru habehe ka. Ibugua tíha konaga motudu nawiore howabi turu timbuniore howabi ibunaga wá taraore kagoria haru íbu helabehe kagoni.✡ 25 Ngode Datagaliwabe ani bibeheore kagome ibu inanaga Pele Ngiaga mbiraore hangu kago Yasu Keriso ina Anduane Homogo togoni howa ibunaga mini yaraga holenebi handame ho holenebi hongohe holenebi haguane howa haru holenebi piganeoreni howa Ngode Datagaliwabe ibunaga winigo áyubi ngago awebi wiaaboboore wulebira. Aniore bilo laro.✡
✡ 1:1 Md 13.55, Mg 6.3, Yo 17.11-12, 1 Pi 1.5 ✡ 1:2 1 Pi 1.2, 2 Pi 1.2 ✡ 1:3 Pb 1.27, 1 Ti 1.18, 6.12, 2 Ti 1.13, Ta 1.4 ✡ 1:4 Ga 2.4, Ta 1.16, Hi 12.15, 2 Pi 2.1, 1 Yo 2.22 ✡ 1:5 Har 12.51, Dag 14.29-30, Iba 106.26, 1 Ko 10.5, 10.9, Hi 3.17-19, 2 Pi 1.12 ✡ 1:6 Yo 8.44, 2 Pi 2.4, 2.9, Mo 20.10 ✡ 1:7 Pig 19.1-24, 2 Pi 2.6, 2.10 ✡ 1:8 Har 22.28, 2 Pi 2.10 ✡ 1:9 Man 34.6, Dan 10.13, 10.21, 12.1, Seg 3.2, 2 Pi 2.11-12, Mo 12.7 ✡ 1:10 2 Pi 2.12 ✡ 1:11 Pig 4.3-8, Dag 16.1-35, 22.1-35, 2 Pi 2.15, 1 Yo 3.12 ✡ 1:12 Ese 34.8, Md 15.13, 1 Ko 11.21, Eb 4.14, 2 Pi 2.13, 2.17, Mo 2.11, 20.14 ✡ 1:13 Ais 57.20, Pb 3.19, 2 Pi 2.17 ✡ 1:14 Pig 5.18-24, Man 33.2, Dan 7.10, Seg 14.5, Md 25.31, 2 Te 1.7, Mo 1.7 ✡ 1:15 Iba 31.18, 94.4, Mal 3.13 ✡ 1:16 Min 28.21, Ya 2.1, 2.9, 2 Pi 2.10, 2.18 ✡ 1:17 2 Pi 3.2 ✡ 1:18 1 Ti 4.1, 2 Ti 3.1, 2 Pi 2.1, 3.3 ✡ 1:19 Hos 4.14, 1 Ko 2.14-15, Hi 10.25, Ya 3.15 ✡ 1:20 Lm 8.26, Eb 6.18, Kl 2.7, 1 Te 5.11, 1 Ti 1.4 ✡ 1:21 Ta 2.13, 2 Pi 3.12 ✡ 1:23 Amo 4.11, Seg 3.2-5, Lm 11.14, 1 Ko 3.15, Mo 3.4 ✡ 1:24 Lm 16.25, Eb 3.20, Pb 1.10, Kl 1.22, 2 Pi 3.14 ✡ 1:25 Lm 16.27, 1 Ti 1.17, 2.3, 2 Pi 3.18
☰