Agali Mandabi Henegonaga Bi
Mbuga ogoha gilibu ngarunaga nemandi ogo
Mbuga ogoha agali manda timbunibi mbirame ibunaga mini wiago latagi hene. Agali manda timbunibi ogoni ibugua mbirale wiaru baya hangu begelo handai halu wali agalime mana bialu haga wiarubi manda biaiore hene. Ani hondo heagola mbirale uruni marume ibu mo genda hene. Ibugua handalu hearia wali agali dindini holene emene tubagi hangu halu bayale ndoyane hendene. Mbirale bibahende wali agali bibahendeme bialu heago damene galone ndo dege bialu hearia hendene. Ani hondowa agali ogoni ibugua lalu, Ina wali agali áyu dindini kamagoni irane nawini howa nagaloneore kama, lene. Ngode Datagaliwabe ibunaga holene inaha kagoni howa mana ngago iname baya hangu manda nabiore kamagoni. Bi gendabi urunibi hale halu ina wali agalime manga nahami̱ya.
Ai agali manda timbunibi ogoni ibugua lalu, Tígua bi ogoni hale holene manga nahalimu, laya. Iname bi ogoni wá nale harimayaguabi harugo lowa Ngode Datagaliwabehanda ina dindi ogoria holoma̱ya henge emene nemandi ngidagonaga biabe erekuibi bialu turu haga bialu holene nga.
Dewaoreme bi ogonibigo Baibolo mbugaha ngago hondowa ti mogolo handaga. Anigo mbuga ogome ina mbira mo walia ho ngago ogo. Mbirali ibu genda tara tara bibahende ngarume ibuni mo ko halu kago ogoni ibubi nde Ngode Datagaliwabe waneigini bu karu aria holene karulape dege ka. Mbuga ogome wali agali maru genda tara tarawi mo ko hene hearu mbuga ogo gili biyadagome dewaliore biamogo bigi bini. Tigua mbuga ogo dagalalu howa tini hangu ndo harimayane hendene. Ani bialu bi ogonime Ngode Datagaliwabehanda mbira ogo bulebero lalu mbuga maruha bi lo wigi bini wiarume wali agali miniha lone mo mitangi biahaga bini.
Bu̱lu̱ baga buwa kuni gilibu ngago (1.1–2.26)
Iname dindini howa holene irane ngabe be nawibe 3.1–11.8
Iname bialu holene te laga binigo 11.9–12.8
Waneigini daliahehondo bi lenego 12.9-14
Lamaro bialu Ngode Datagaliwabe mo tene holene ngago
1
Mbirale bibahendeore nagalone ngago ogo
1 Agali manda timbuniorebi mbirame bi ogoni latagi hene. Agali ogoni ibu Debidi igini howa bamba ibu Yarusalemeni kini hene.
2 Agali manda timbunibi ogoni ibugua lalu, Mbirale bibahende bu ngaruni mbira galone nawioreni howa bibahende nagalone hangu wiai ka.
3 Iname mali bibahendengi biabe ndelahe bialu haabo haramali. Anidagua bialu ha haramaligo ai biabe ndelahe ogoninaga lini bayale mbira agile mo yaramalibe.
4 Wali agali ala heneru homaragola mani maru ha aribia haga. Anigo dindi dege mendeme ibu winigoria wia aribia naholebira. Dindi ibu winigoore wiaabo haga.
5 Horo bibahendengi ni ibu tagira ibalu horo bibahendengi ni ibu palialu horo mendengi tagira ibulenaga lone dai buwa manda mandabu wiaga. Horo bibahendengi ni ibu anidagua dege bialu howa ibu ha̱ timbuni laga.
6 Puyabu ibu nde uyurahayagi howa puloyu unurahayagi piaga. Ani bialu nde lone beregedalu uyurahayagi puloyu dai biaga. Ai puyabu ibu anidagua bialu ibaga dege bialu haabo haga.
7 Ai iba poraru bibahende solowaraha pialu pu mogo biai haragome solowara ibu biralu biru to̱ nale wiaabo kagoni. Iba uruni ti lone iba maneha dai buwa mani solowaraha lone pupe halu piaga.
8 Iname mbirale dindini ngaru bibahende manda bu handalu kamaria uruni manga hai haramali. Inanaga manga holene ogoni ogoale lalu latagi habe naheore kamagoni. Dindini ngaru bibahende deme handalu bi damenebi hale hai haramaligoyu ai urunime ina karulapu nabi dege kamagoni.
9 Mbirale tara tara abale deme hendenedaru ale dege mani hondoleberema. Mbirale mbira agalime bialu heneru manibi uruni ale dege bialu holebira. Anigo dindi bibahendeha gahenge mbira nawiore.
10 Marungi agalime lalu, Mbirale ogo gahengeda, lagago ogoni henene ndo. Ogoni ibu ina dindi ogoria nahemangi ala winigo dege nga.
11 Mbirale bamba inanaga mamaliru heangi bialu hene ngaru mbiralime manda biai naholebira. Manibi mbirale dewa tagira polebirago ogoni inanaga aguanene mani holobadaru tiguabi manda biai naholebira.
Manda timbuni bulenego nagalone ngago ogo
12 I̱ agali manda timbunibi mbira kogoni. I̱ Isaraele wali agalinaga kini howa Yarusalemeni harugoni.
13 Ani howa i̱na dindini ngaruni damene bibahende mandabu handaiore hole manda biru. Ani manda bialu uruninaga tene baya hangu tayabu handaru. Anigo Ngode Datagaliwabehanda iname biabe bialu holoma̱ya ngiyadaruni genda timbuniore mo ngiyadane hendedo.
14 I̱na dindi ogoria mbirale tara tara tagira ibaga ngaruni irane dabo handai harugo ai heneneore mbirale bibahendenaga galone mbira nawi degeya. Mbiralime gerai pialu puyabu minu yania hole poradagua biya.
15 Mbirale mbira yole ngago mbiralime mo tiga bibe nahe. Mbirale mbira nawigo iname daga labe nahe.
16 I̱nime manda bialu hewaria i̱ manda timbunibi howa i̱na kini abale Yarusalemeni henedaru bolangua hene kogonida lo manda bu haru. I̱na manda tara tara biaihe howa mini gigabi wu kogoni.
17 Ani wu howa i̱na mini giga bulenenaga tenego handa walia hole hongo howa taya bialu mini nawi lulu ale hope hagagonaga tenebi taya bialu biru. Ani taya bialu harudagoni i̱ lulu yu howa gerai lalu puyabu minu yania hole poradagua biruya.
18 Heneneore mbira ngago larogo mbirali ibu manda timbuniore bu heagua ogoni ibuha genda timbuniore tagira ibaga. Ibunaga manda bia timbu hama irigi hayagua ibuha genda bu ngarubi anda hama irigi dege halu mo timbu haga nga.