5
Capoch ka mangai craq
1 Apaq capoch grèh ka mangai craq, mahaq ep alòng hnài tìah dèh ka baq, ti gu qyoh aih tìah ka oh daq,
2 gucadrì bàc hanam aih tìah dèh ka miq, gucadrì adrùh tìah dèh ka oh daq cadrì, manoh ep qngah hliang joq qnàng.
3 Ep loq ta-iu mangai gucadrì hadrô craq ma hadrô đeh joq qnàng.
4 Mahaq tàng mangai cadrì craq hadrô aih i kon xau, adroe dìq dŏng wì aih ep loq i manoh broq trong lem dèh ka mangai ta hnim cla, i manoh broq trong lem dèh ka miq baq yaq boc, majah qmang aih trong aih lem ka manoh Boc Plình.
5 Mangai hadrô ma nan đeh joq qnàng, rìh đeh mòeq ngai, haq khoe dìq ka manoh canòm toq ka Boc Plình, dahì damang cajap manoh waiq khàn creo dang.
6 Mahaq da mangai hadrô ma oe raq ònh ka rìh tiaq trong bùi hyòq ta qnhòng kô, ma aih yac oe rìh tìah gleq khoe cachìt.
7 Ep anoe bahmàng hlài ƀài trong aih, dôq wì gêh geo pi i qmòe ajang leq hu cwò.
8 Tàng cabô ùh qnì hanò dèh ka hadròng hadrech, yeo hnau ka aih hòm, ùh hanò qmòe dèh mangai ta hnim cla, aih mangai khoe cađac deh manoh lùi, yeo qmèq hnau ka mangai ma qnhòq lùi.
9 Đòeq hu jah achìh qmùt yiniq ta hset mangai craq hadrô, mangai cadrì ep jah tadràu jàt hanam, enh nèh dua mòeq ngai ŏng raq,
10 èh waq ka i bàu wì manè ƀài trong lem haq ma khoe broq: qmang ka khoe rabiaq ka ban kon, loq đìh tamoe ùh, qnheo jènh ƀài mangai ma tiaq Chuaq, loq hanò ka mangai pa ma hamoq đeh, rai broq bàc trong lem qnoeq hòm.
11 Mahaq apaq achìh qmùt yiniq mangai hadrô ma oe raq qyoh hanam, majah qmang aih jò chac hamac wì troq hyòq, loq qnung wì hangai ka Chuaq, wì loh ka enh yŏc ŏng,
12 cađac dèh bàu ma adroe, taqmòq yŏc ka rađeh kan tah hadrah.
13 Majah qmang aih, taiq wì haq hmòt oe ùh i ka yiniq toq ti lam ha-ìa enh hnim kô trùh hnim tau, ma xài toq oe pagôq dech, wì haq toq ti bàc bàu lìq làn enh toq anoe trùh trong ma ùh khòh.
14 Qmang aih au enh thê ƀài gucadrì hadrô oe raq qyoh hanam yŏc ŏng, ha-uang kon, wèq ngan deh ta hnim cla, dôq ùh hìaq broq nen ka mangai ma tagit jah nòe hu tapoch qmèq.
15 Majah qmang aih khoe i qnah ngai cadrì hadrô tawìh tiaq Satan.
16 Tàng cabô leq i mangai cadrì craq hadrô oe deh ta hnim, aih èh ep wèq ban haq, đòeq ùh hìaq ep ka Tagop Hadròeh, dôq Tagop Hadroèh jah wèq ban toq mangai ma hadrô đeh joq qnàng.
Wì craq ta Tagop Hadròeh
17 Ƀài wì craq ma rabiaq ka wèq Tagop Hadròeh aih bèn ep loq iu camaih ka wì haq yeo bàc, mangai ma anoe hnài bàu Chuaq aih kiang yeo bàc hòm.
18 Majah qmang aih Hset Hadròeh i achìh rameh: Ìh apaq srôp mung ƀo qnang len qmau, èh hòm mangai ma patìh aih troq ka jah kùng baha.
19 Apaq dì jàiq ma achìh đòeq hu tah hadrah ka mòeq ngai gucraq leq tàng joq ùh i ka baiq piq ngai panhìn.
20 Mangai ma broq yiniq lui, ep cwò lech ka haq haq enh ngèa bàc ngai, đòeq broq ka wì qnoeq hu loq yùq.
21 Enh ngèa Boc Plình, enh ngèa Chuaq Jesus Christ xam enh ngèa bình plình jah ràih, au thê kon ep wèq ƀòe bàu hnài kô, yac ka broq cleq dua apaq gen kan, paq loq waq ka apah.
22 Apaq rênh roh tì enh qnhèq ka cabô, apaq wiang poh ta yiniq lui cabô, ep wèq rađeh jah hliang lem.
23 Apaq ôq toq diac dech, mahaq ep ôq toq ƀiaq alac, majah qmang aih gàu padùc kon ùh nèn, kon xan loq xa ka oe.
24 I ngai aih yiniq lui haq rênh jah paqnoh qmòe adroe ka hì haq ma ep chìuq kan hadrah, i qnah ngai atìq ka hadrah aih men hnoq.
25 Ƀài yiniq broq lem hanoh qmang aih: i qnah jah paqnoh qmòe, i mòeq qnah aih ùh paqnoh qmòe, mahaq atìq èh yac ka cadoc dua ùh hlèp.