3
Ƀài mangai wèq Tagop sam mangai wiang Patìh ep qmang leq
1 Tàng i cabô enh ngèh ka jah broq mangai wèq Tagop, enh qmang aih lem joq qnàng.
2 Qmang aih mangai wèq Tagop ep geo ùh i qmoè ka nòe hu cwò, haq aih ŏng mòeq ngai mai raq, loq wèq rađeh, i kan rabiaq, i kan tajì, loq đìh tamoe loq ti hnài.
3 Ùh dùh ònh ka alac, hadai apaq ngang dù, mahaq ep khun khauq, èh hadai ùh ònh trong hliac jèn;
4 ep rabiaq ka wèq dèh ta hnim cla, wèq dèh wì kon loq iu rai rìh gêh geo jang lem;
5 majah qmang aih tàng i mangai ùh qnì wèq dèh hnim cla, aih èh broq qmang leq ma loq wèq Tagop Hadròeh da Boc Plình?
6 Mangai neo lùi, ùh jah broq mangai wèq Tagop, majah qmang aih haq loq hnhè rađeh èh taclìh ta kan hadrah qmang ka kiac jròng.
7 Mangai wèq Tagop hadai waq ka i bàu wì enh gùng wiang capoch lem ka haq, aih èh haq ùh hìaq ep camaih xep, ùh hìaq hlech rajôiq kiac jròng
8 Ƀài mangai patìh hadai ep gêh geo, ùh capoch baiq bàu, ùh jah ònh ka alac, ùh jah plai ka kùng hang ma ùh troq trong,
9 mahaq ep yŏc manoh cliac hliang lem wèq tiaq kan joq qnàng da manoh lùi.
10 Ƀài wì aih hadai ep jah qnhro adroe òeq, tàng geo pi ka nòe cwò aih èh men wìa broq mangai patìh.
11 Cadrì da mangai patìh hadai ep laq alàng, ùh khòh loq capoch qmèq, hadai loq ràih bàu capoch, yac ka trong leq dua dìq dèh ka manoh.
12 Ƀài mangai patìh hadai broq ŏng mòeq ngai mai raq, loq wèq dèh wì kon xam hnim cla.
13 Mangai leq rabiaq geo trong đeh ma patìh jah wì manè iu xam kan hagau manoh lùi enh dalam ka Chuaq Jesus Christ.
14 Au ngèh ka jah rênh trùh hmàih ta kon mahaq au achìh jàiq kô,
15 yùq au loq xòe trùh aih dôq kon hu loq đeh ep broq qmang leq oe ta hnim Boc Plình, aih la Tagop Hadròeh da Boc Plình rìh halình, aih raq jrang xam nòe cachàt da bàu joq qnàng.
16 Rìm ngai doe kan halac da manoh lùi aih kàn joq qnàng:
Haq khoe jah paqnoh ta xech akia,
Khoe jah Yiang Hadròeh creo ka haq mangai taq atoq,
Jah ƀình plình ngan hnoq,
Jah anoe ka mangai rìm diac,
Jah dìq ka phù cròng canòm lùi,
Jah dèch atŏc ta kan ranhòm.