22
Sôq ramot da mangai jah ràih
1 Ƀình plình patô am au ngan cròng diac kan rìh, hliang raplênh qmang ka ngŏc xênh, loh enh gèq da Boc Plình xam da Kon Trìu.
2 Taqne plài xam baiq bè diac i long kan rìh loh plì moeq jàt baiq yàng ta hanam, mòeq khê mòeq yàng loh plì; ƀài hla da haq đòeq broq brêh ka kon magai.
3 Pi oe ƀàu capoch hanip hòm, gèq da Boc Plình xam Kon Trìu oe qne plài, ƀài hapŏng da Haq jah patìh dèh ka Haq;
4 wì haq jah hnoq hadrò deh Chuaq, yiniq da Chuaq jah oe ajang ngòng wì haq, pi oe i ka damang hòm,
5 yac ka qngah đen, qngah mahì dua wì haq pi oe ep waq hòm, majah qmang aih i Boc Plình sreo qngah am ka wì; wì haq jah broq ƀùa mòeq đòe.
Bàu pariaq ma atìq lùch
6 Ƀình plình doe ka au: “Ƀài bàu kô dìq bàu khòh lùi, bàu joq qnàng, Chuaq aih raq Boc Plình da yiang ƀài pajàu, khoe thê deh ƀình plình haq loh patô ka hapŏng Haq rìm yiniq ep drah rênh trùh.
7 “Ngan kô Au rênh trùh! Xôq ramot am ka mangai leq wèq ƀài bàu pajàu oe ta hset kô”.
8 Au kô Jon, mangai ma khoe hnoq rai tàng ƀài yiniq kô. Jò au khoe tàng rai hnoq, au bla op rađeh ta haqneq ajang nòe jènh bình plình ma khoe patô ka au ƀài yiniq kô, đòeq kùh waiq haq aih.
9 Mahaq ƀình plình aih doe ka au “apaq broq qmang qmat! Au kô hanoh hapŏng qmang ka ìh xam oh daq ìh, aih ƀài mangai pajàu, xam ƀài mangai ma wèq bàu ta hset kô; Ep kùh waiq toq Boc Plình”.
10 Khoe aih haq doe hòm ka au: “Ùh dùh nìm padràng đòeq ƀài bàu pajàu ta hset kô, majah qmang aih jò khoe haqnap”.
11 Mangai ma broq trong ùh troq, dôq da haq broq kan ùh troq hòm, mangai ma amùa trùq dôq da haq rìh tiaq deh kan trùq amùa hòm, mangai ma broq trong taq atoq, đòeq haq broq trong taq atoq hòm, mangai leq hadròeh kiang haq rìh tiaq kan hadròeh hòm”.
12 “Ngan kô Au rênh trùh rai wê kan baha lam ti au, đòeq baha tang ngai tiaq trong wì haq khoe broq.
13 Au kô Anpha xam Ômega, aih kan Adroe xam kan Atìq dŏng, kan Baxèm xam kan Pulùch
14 Xôq ramot am ka mangai leq rùh deh eo đòeq jah tajì ka thia ajang long kan rìh, jah lam trong qmang đòeq mùt ta plài kàn!
15 Ƀài koq, ƀài mangai loq ti pàih panàih, mangai tango, mangai jêh mangai, mangai tadreo radua qmù kan kiac, mangai enh xam broq kan patìah, oe dìq enh gùng”.
16 Au kô Jesus, khoe thê dèh ƀình plình trùh panhìn ƀài yiniq kô am ka pì enh ngèa ka ƀài Tagop Hadròeh. Au kô rangàu riah, xinoe da Đawit, Au kô raq halŏng sroq qngah qngai”.
17 Yiang Hadròeh xam mai neo doe: “Trùh beq! Mangai leq ma tàng hanoh doe: Trùh beq! Cabô croh ranŏng drah trùh. Cabô enh, drah trùh đòeq yŏc dech ka rađeh diac kan rìh.”
18 Au pariaq ka mangai leq ma tàng ƀàu pajàu ta hset kô: Tàng cabô tah tam cleq ta hset pajàu kô, aih èh Boc Plình dèch tam ka haq kan ranàc ma khoe achìh ta hset kô.
19 Mangai leq ma cađac đac qnah yiniq cleq ma khoe achìh ta hset pajàu kô, aih èh Boc Plình doeh đac hloe phàn da haq talong kan rìh xam ta plài hadròeh ma khoe achìh ta hset kô.
20 Mangai panhìn ka ƀài yiniq kô, doe rameh: “Joq qnàng, Au rênh trùh”. Amen waiq Chuaq Jesus! Ìh rênh trùh beq.
21 Waiq kan tabàih dech da Jesus Christ oe ti rìm ngai! Amen.