2
Achìh ka Tagop Hadròeh Êphesô
1 Achìh ka ƀình plình da Tagop Hadròeh Êphêsô rameh:
Kô bàu da Mangai kŏng pah qma haq ma wê tapèh toq halŏng rai cadiang lam taqne tapèh toq jènh đen wang:
2 Au loq yiniq broq da ìh, au ji loq kan xalep, kan loq kèm da ìh; au loq ìh ùh jùh jùn ka mangai dù, au ji loq ìh khoe qnhro ƀòe mangai ma doe đeh kô broq mangai tiaq cla, ìh khoe jah hnoq joq qnàng aih ƀòe mangai ti patìah.
3 Ìh loq kèm rai chìuq xalep ka yiniq au, ùh hìaq tagah lep.
4 Mahaq i yiniq kô au cwò ka ìh, aih ìh khoe cađac kan loq waq jò baxèm.
5 Qmang aih, hmàng hlài beq đeh khoe cro ajang leq, drah raxach rai boq hlài dèh yiniq ìh ma khoe broq enh jò baxèm; ùh meh au trùh ta ìh, tàng ìh ùh raxach aih èh au dèch đac da ìh đen khoe ka nòe da haq.
6 Mahaq ìh i mòeq yiniq kô ma yi wìa, aih ìq ìh git ka yiniq broq da bua Nicôla, yac ka au hadai git.
7 Cabô i don, drah tamàng bàu Yiang Hadròeh anoe ka ƀòe Tagop Hadròeh: Mangai leq blêq, au jah am wì haq acaq plì long kan rìh oe ta Parađi da Boc Plình.
Achìh am ka Tagop Hadròeh Simìac-no
8 “Achìh ka ƀình plình da Tagop Hadròeh Simìac-no rameh:
Kô bàu da Mangai ma adroe xam Mangai ma pulùch dŏng, Mangai khoe cachìt yàng mahaq khoe rìh hlài:
9 Au loq kan xalep, kan pa hamoq da ìh, (yac ka ìh padrŏng kan), xam ƀòe bàu capoch patah, capoch qmèq enh ƀòe wì ma doe đeh kô mangai Juđa, ma joq qnàng aih ùh xài, wì haq aih mòeq bua ka tagop da Satan.
10 Ìh apaq yùq ka rađeh ep glàm kan nanxa. Au doe ka ìh loq, kô èh taqne pì qmat Satan padon rùp clêh bàc ngai ta hnim cadrong, đòeq hu qnhro ngan pì, pì glàm kan nanxa ta mòeq jàt hì. Ep wèq manoh ùh tablòq trùh cachìt, aih èh au hi am ka pì cadoh kan rìh da diac plình.
11 Cabô i don, drah tamàng bàu da Yiang Hadròeh anoe ka ƀòe Tagop Hadròeh: Cabô blêq, kan cachìt yàng atìq kô èh pi broq cleq ka haq aih jah.
Achìh ka tagop Hadròeh Becgam
12 Hadai achìh am ka ƀình plình da Tagop Hadròeh Becgam rameh: Kô bàu da Mangai i pla chang hin baiq màn:
13 Au loq nòe ìh qnang oe qmat gèq da satan; ìh khoe wèq cajap manoh ta yiniq au, ùh cađac manoh lùi ajang au; yac ka jò Antiba, aih mangai dìq ka manoh anoe panhìn ka au khoe cachìt đeh ka wì jêh đac tanòe pì, aih nòe Satan oe.
14 Mahaq i nòe au cwò ka ìh: Majah qmang aih, ta qmat pì i mangai tiaq trong da Bala-am, aih mangai ma hnài Balac roh hmo catoeh enh qngèa mangai Isorali, đòeq padô wì haq acaq jam tadreo kiac chŏc rai ti adràc wì haq ti tango taqnung.
15 Ta ìh qmat hadai i mangai cadiang tiaq bàu trong da Nicôla.
16 Qmang aih, drah loq raxach beq, tàng ùh meh, au rênh trùh ta ìh, yŏc deh chang enh hacùng đòeq hu tajêh ka wì haq.
17 Cabô i don, drah tamàng bàu Yiang Hadròeh doe ka rìm Tagop Hadròeh: Mangai leq blêq, au am ka haq mana ma qnang cadoc hlèp, au hadai am ka haq pliang raga taboc, ta ai i achìh mòeq toq yiniq neo, enh gùng ka cla mangai jah ùh i cabô loq.
Achìh ka Tagop Hadròeh Thia-tiro
18 Ìh hadai achìh ka ƀình plình da Tagop Thia-tiro rameh:
Kô bàu capoch da Kon Boc Plình, aih Mangai mat tìah ka ùnh, jènh tìah ka đùng ma chah dìq cajaq:
19 Au loq yiniq broq da ìh, kan loq waq da ìh, manoh lùi ìh, trong patìh dìq ka manoh da ìh, manoh loq kèm da ìh, ƀòe yiniq ìh broq ta atìq kô kiang èh kiang bàc yeo loe ka angoe.
20 Mahaq yiniq au ma cwò ka ìh, aih ì oe jùh jùn ka Jêsaben, mangai cadrì aih cla haq doe đeh kô pajàu, toq ti hnài rai padô hapŏng au, đòeq hu aluàn wì ta kan tango anang, acaq jam tadreo.
21 Au khoe am ka haq i jò đòeq hu loq raxach, mahaq haq ùh raxach dèh kan tango aih.
22 Kô èh au khwênh haq ta juàng jìq hiang hloe xam ƀòe mangai wiang tango ka haq, tàng wì haq ùh raxach trong yiniq lui aih, au hadai khwênh caqnìh wì haq ta kan ranàc kàn.
23 Au jêh ka cachìt ƀòe kon da haq; aih èh rìm Tagop jah loq au kô Mangai loq ta manoh cliac kon mangai, èh au hi tiaq qmòe tang yiniq rìm ngai khoe broq đòeq hu patem chau ka wì haq.
24 Mahaq pì xam wì qnoeq ma hahdai oe ta Thia-tiro, ùh tiaq trong aih, qnhòq qnì đeh kan tai cliac Satan, qmang ka wì haq ma anoe dèh yôt, aih au tanap ka pì au ùh taqmòq tam ka pì kan trap qnoeq.
25 Toq pì ep wèq ka cajap ƀòe yiniq đeh ma khoe i, trùh jò au trùh.
26 Mangai leq blêq, broq tiaq manoh au trùh lùch trùh gêh, aih èh au am ka haq cwìang đòeq broq gàu bàc diac:
27 haq wèq cwìang xi long dùi mem, tùq bahech ƀòe diac aih budàng abôq taneh, qmang ka au khoe jah cwìang aih enh nòe Baq au.
28 Au am ka haq aih halŏng sroq.
29 Cabô i don, drah tamàng bàu Yiang Hadròeh anoe ka ƀòe Tagop Hadròeh!