8
Rìh enh dalam kaYiang Hadròeh
1 Qmang aih, manòeq kô khoe pi i kan hadrah ka mangai oe ta Chuaq Jesus Christ;
2 majah qmang aih ranenh da Yiang Hadròeh kan rìh khoe canòm ka Chuaq Jesus Christ đòeq caqnaih au loh khoe ka ranenh da yiniq lui xam kan cachìt.
3 Majah qmang aih yiniq cleq ranenh ma ùh hlàt broq, taiq xech akia broq ka ranenh loh ka pi nèn, aih Boc Plình khoe broq: Taiq yiniq lui haq majah khoe thê dèh kon yŏc xech akia qmang ka xech akia yiniq lui da bèn, èh khoe hadrah yiniq lui ta xech akia aih,
4 dôq kan taq atoq da ranenh ma panan broq jah gêh enh dalam bèn, aih la ƀài mangai ma ùh tiaq dua da xech akia mahaq tiaq dua da Yiang Hadròeh.
5 Mangai rìh tiaq xech akia gàu ngoc wì haq haqmiang chaq toq trong xech akia ma enh, mangai rìh tiaq Yiang Hadròeh manoh haq haqmiang chaq toq trong daYiang Hadròeh.
6 Chaq toq trong da xech akia enh aih èh loh kan cachìt, chaq trong Yiang Ha droèh aih èh loh kan rìh xam kan catèm.
7 Majah qmang aih haqmiang chaq toq trong da xech akia aih tablêq hlài ka Boc Plình, majah qmang aih haq ùh tiaq ranenh da Boc Plình, yeo hnau ka aih hòm haq tiaq ùh jah.
8 Ƀài mangai rìh tiaq xech akia, ùh jò leq lem ka manoh Boc Plình.
9 Hnoq anoe qmang aih, tàng joq Yiang Hadròeh da Boc Plình rìh oe enh dalam oh daq, oh daq ùh rìh tiaq xech akia hòm mahaq rìh tiaq Yiang Hadròeh, tàng cabô ùh i ka Yiang Hadròeh da Christ, aih ùh xài mangai da haq.
10 Qmang aih, tàng joq Christ oe enh dalam oh daq, yac ka chac oh daq cachìt ka yiniq lui, mahaq yiang aih rìh taiq kan taq atoq.
11 Èh hòm, tàng joq Yiang da Boc Plình ma khoe broq ka Chuaq Jesus rìh hlài enh kan cachìt oe ti oh daq. Haq ma broq ka Chuaq Jesus rìh hlài enh kan cachìt aih hadai canòm ka Yiang da haq ma oe ta dalam oh daq đoèq broq ka chac mac ma loq cachìt da oh daq jah rìh hlài.
12 Qmang aih, dìq ka oh daq bèn pi oe pòq doèh xech akia đòeq hu rìh tiaq haq.
13 Joq qmang aih, tàng joq oh daq rìh tiaq xech akia, aih èh ep cachìt, mahaq tàng canòm ka Yiang Hadroèh đòeq haq broq cachìt dŏng ƀài kan qmèq da chac hamac aih èh oh daq rìh.
14 Majah qmang aih, dìq dŏng mangai leq i Yiang Hadròeh da Boc Plình qnung trong, aih dìq kon Boc Plình.
15 Yiang Hadròeh oh daq ma khoe jah aih ùh dôq oh daq broq hapŏng dìc đòeq rìh ta kan yùq crè hòm, mahaq khoe am ka oh daq jah i manoh da kon ban, canòm ajang aih bèn mahi jah creo: “Aba- Baq!”
16 Yiang Hadròeh raq ma khoe panhìn ta manoh bèn loq đeh kô kon Boc Plình.
17 Manoèq kô, tàng joq bèn kon Boc Plình, aih bèn hadai mangai wiang jah kùng hang. Mangai wiang jah kùng hang enh Boc Plình, mangai wiang jah kùng hang ti Christ, waq toq bèn hadai wiang nanxa ti haq, aih èh bèn hadai wiang jah kan ranhòm ti haq.
Kan ranhòm tangèa èh
18 Au hèm, kan nanxa manòeq kô ùh tajì đoèq hu tawêh ti kan ranhòm padon trùh ta bla èh, aih la ƀài kan ranhòm hu padon qnoh am ka bèn.
19 Joq qnàng qmang aih, rìm yiniq dìq toq tangèh gòm hnoq ƀài kon Boc Plình jah paqnoh.
20 Majah qmang aih, rìm yiniq Boc Plình broq loh dìq khoe oe enh qneq ka kan cachìt lùch, ùh xài cla enh qmang aih mahaq enh Mangai ma broq loh ƀài yiniq aih.
21 Rìm yiniq khoe jah broq loh aih hadai tangèh ka rađeh jah dèch claih khoe ka kan cachìt lùch, đoèq hu hanoh jah oe ta kan ranhòm ti kon Boc Plình.
22 Bèn loq rìm yiniq hadai toq hràng xalep trùh manòeq;
23 ùh xài toq ƀài ngè khoe jah broq loh aih, mahaq xam ƀài bèn aih ƀài mangai ma i plì ramua da Yiang Hadròeh, hadai hràng ta manoh cliac, jò bèn qnang gòm đòeq hu jah broq kon ban, aih la kan baxon hlài chac hamac bèn.
24 Ta kan tangèh gòm kô raq bèn ma khoe jah dèch, jò wì khoe jah trong rađeh ma tangèh gòm, aih ma oe tangèh cleq hòm, bèn khoe jah hnoq aih oe tangèh gòm dèh hòm?
25 Mahaq tàng bèn tangèh yiniq đeh qnhòq hnoq, aih ajoq bèn gòm qmòe rai àt,
26 Hadai qmang aih, Yiang Hadròeh wiang da bèn trong ma ùh nèn. Bèn ùh qnì ka rađeh ep bòch cleq đòeq waiq khàn ka hatroq, mahaq Yiang Hadròeh yŏc kan pi atêh hràng enh bèn đòeq hu waiq khàn am ka bèn.
27 Mangai ma sreo ta manoh mangai loq ka manoh Yiang Hadroèh, aih la tiaq manoh Boc Plình enh haq ma waiq khàn am ka ƀài kon da Boc Plình.
28 Bèn loq rìm yiniq Boc Plình ma broq aih dìq đoèq jah lòeq ka ƀài mangai loq waq ka haq, aih ƀài mangai haq ma khoe dì dèh adroe.
29 Majah qmang aih, mangai haq ma khoe loq dèh adroe, haq khoe ta qmroq đoèq hu jah tìah ka Kon Haq, dôq Kon aih jah broq Kon ramua oe taqne oh daq;
30 mangai haq ma khoe ta qmroq dèh adroe, aih haq khoe creo, mangai haq khoe creo, aih haq khoe doe dèh mangai taq atoq, mangai haq khoe doe dèh taq atoq aih haq khoe broq dôq jah kan ranhòm.
31 Khoe qmang aih bèn doe qmang leq? Tàng joq Boc Plình wiang ti bèn, oe i cabô hu tablêq ka bèn?
32 Haq khoe ùh adênh dèh Kon cla, mahaq khoe am dŏng ka bèn, oe i cleq hòm haq ma ùh am hloe ka bèn ajang Kon aih?
33 Cabô ma aràng kan tah hadrah ka mangai Boc Plình ma khoe ràih dèh? Boc Plình aih Mangai ma doe dèh wì aih jah kan taq atoq.
34 Cabô ma taqmòq yiniq lui ka wì aih? Ùh i ka cabô. Chuaq Jesus Christ aih Mangai khoe cachìt, manoeq khoe rìh hlài, haq qnang haqngui enh qma Boc Plình đòeq waiq khàn ka bèn.
35 Cabô jah lah bèn loh khoe kan loq waq da Christ? Kan mangò, kan nanxa, kan canàt rùp, pangot hrah, hyah hyai, kan yat, chang jaoq ùh xài?
36 Qmang ka bàu khoe achìh:
“Tiaq Ìh, nhèn glàm kan cachìt xèq ka hì,
Wì ngan nhèn bu dàng trìu đoèq xah jam”.
37 Mahaq ùh xài, ta rìm yiniq aih bèn canòm ka Mangai ma loq waq ka bènThi Tv 44:22, đòeq jah blêq yeo hnau ka aih hòm.
38 Au cajap manoh rameh: Yac ka kan cachìt, kan rìh, yac ka ƀình plình, yac ka kiac dù, yac ka mangai i cwìang, yac ka manòeq, yac ka yiniq padon trùh ta bla èh,
39 kan haqnhèq kan jrùq, ùh i cleq jah lah bèn loh khoe ka kan loq waq Boc Plình khoe am ka bèn oe enh dalam ka Chuaq Jesus Christ, aih Chuaq da bèn.