HSET I PHIERƠ
1
Bàu hmàih ka oh daq
1 Phiero mangai tiaq cla da Chauq Jesus Christ, achìh ka ƀài mangai rìh paclac tagùng Bong, Galati, Capbađoc, Asi xam gùng Bithini, aih ƀài mangai khoe jah ràih,
2 tiaq kan loq dèh adroe da Boc Plình, aih Baq, jah kan basròeh enh Yiang Hadròeh, hu iu tiaq Chuaq Jesus Christ đòeq jah hadai wiang rai mahim haq: waiq kan tabàih dech xam kan catèm jah rai èh rai bàc ka oh daq.
Kan tangèh da mangai tiaq Chuaq
3 Manè apôi Boc Plình, Baq da Jesus Christ aih Chuaq bèn, haq khoe yŏc manoh loq waq kàn kaiq đòeq broq bèn jah ha-uang lauq, dôq bèn canòm kan rìh hlài enh mangai cachìt da Chuaq Jesus Christ đòeq hu jah kan tangèh rìh,
4 aih raq kùng hang ùh raliang hnhung, ùh axiang, ùh lùch khoe padon ta plình đòeq am ka oh daq,
5 aih ƀài mangai i manoh lùi canòm ka cwìang itai da Boc Plình wèq am, đòeq hu jah kan dèch claih, ma khoe ten loh ta hì atìq lùch.
6 Oh daq lem bùi ka bìac aih, yac ka manòeq kô oh daq glàm kan qnhro bàc trong broq ka oh daq ep mangò đeh toq biaq,
7 ƀài kan qnhro aih broq ka manoh lùi da oh daq jah yeo lem ùh hnau ka wang aih hang ma loq om hech yac ka khoe bùh xi ùnh, dôq oh daq jah bàu manè, jah padèch ta kan qngah qngai jò Chuaq Jesus Christ loh ta crŏng taneh.
8 Haq aih Mangai oh daq ùh hnoq mahaq camet, yac ka manòeq kô oh daq qnhòq hnoq haq, mahaq oh daq lùi haq, rai lem bùi pi cajaq ta kan ranhòm:
9 jah kan baha ka manoh lùi da oh daq aih la kan dèch mahua yiang oh daq.
10 Anoe trùh kan dèch aih, ƀài mangai pajàu khoe ti hamrìh ti boq chaq, khoe capoch bàu pajàu trùh kan tabàih ma khoe taqmroq đòeq ka oh daq:
11 aih wì chaq waq ka jah loq qnhòng leq, qmang leq cadèh Yiang Hadròeh da Christ ma oe ta wì haq khoe mahnu, jò chônh anoe panhìn kan xalep da Christ xam kan ranhòm tiaq atìq ka aih.
12 Wì aih, khoe loq ùh xài wì haq patìh ka cla rađeh mahaq ka oh daq, aih ƀài bìac manòeq kô ma khoe anoe qnoh ka oh daq, loh enh ƀài mangai ma canòm ka Yiang Hadròeh enh plình, đòeq hnài Bàu Lem am ka pì; ƀài ƀình plình hadai tangèh jah hnoq ƀài yiniq kô.
Pariaq thê rìh hadròeh rai loq waq
13 Qmang aih, oh daq ep cachang đòeq ta gàu ngoc tìah ka rìt caqnam, loq amàn, yŏc dìq ka manoh ngèh đòeq gòm kan tabàih jah am ka rađeh jò Chuaq Jesus Christ trùh.
14 Oh daq khoe wìa wì kon ma loq iu bàu, aih apaq broq tiaq kan dù enh nèh, jò pì oe raq qnhòq qnì cleq.
15 Mahaq tìah ka Mangai ma creo ka oh daq aih hadròeh, aih èh ta rìm trong acaq oe, oh daq hadai ep hadròeh,
16 majah qmang aih i bàu achìh rameh: “Ep hadròeh, majah qmang aih au kô hadròeh”.
17 Tàng oh daq creo ka Mangai ma ùh hìaq loq waq ka apah, mahaq hadrah ka tang ngai tiaq tang yiniq wì haq ma broq, aih Baq, qmang aih drah yŏc manoh loq iu yùq đòeq hu rìh acaq taqnhòng rìh đò kô,
18 majah qmang aih, bèn loq ùh xài canòm ƀài dahwèq ma loq om loq bùc qmang ka bac ka wang oh daq ma khoe jah baxon claih ka trong rìh acaq ùh loh cleq da kan cadraq ma khoe đòeq hlài ka bèn,
19 mahaq xi mahim canaq da Christ, tìah ka mahim kon trìu ùh i ka xìt ùh i ka habau,
20 ma khoe padon qmòe enh adroe ka broq plình crŏng taneh, khoe jah paqnoh taqnhòng atìq lùch kô am ka oh daq,
21 aih ƀài mangai khoe canòm ajang Chuaq Jesus Christ đòeq lùi Boc Plình, aih Mangai ma khoe broq ka Chuaq Jesus Christ enh mangai cachìt rìh hlài rai am ka haq kan ranhòm, đòeq manoh lùi xam kan tangèh da oh daq canòm dìq ka Boc Plình
22 Manòeq kô oh daq khoe canòm ka bàu joq qnàng đòeq broq hreo dèh mahua yiang, đòeq i manoh loq waq ka dabau joq qnàng, loq ha-och ka dabau dìq ka manoh;
23 oh daq khoe jah hauang lauq, ùh xài xi adrech loq om hech, mahaq xi adrech ùh om ùh hech, aih xi bàu kan rìh cajap cajình da Boc Plình.
24 Majah qmang aih:
Rìm xech akia bu diang nhat,
Kan nhòm da haq bu diang riang nhat.
Nhat croh, riang hadrùih.
25 Mahaq bàu da Chuaq oe mòeq đòe. Aih raq Bàu lem khoe anoe qnoh ka oh daq.