1 Cabô lùi Chuaq Jesus aih raq Christ, haq aih ha-uang loh enh Boc Plình, cabô loq waq ka Boc Plình aih èh hadai loq waq ka kon da haq. 2 Qmang kô bèn jah loq ka rađeh loq waq ka wì kon da Boc Plình, aih jò bèn loq waq ka Boc Plình rai wèq gêh ka ranenh da haq. 3 Kan loq waq ka Boc Plình aih rameh: wèq tiaq ranenh haq thê. Ranenh da haq aih ùh xài kan trap, 4 majah qmang aih mangai leq ma ha- uang loh enh Boc Plình, aih jah blêq crŏng taneh kô, kan blêq crŏng taneh kô aih la manoh lùi da bèn. 5 Cabô ma blêq crŏng taneh kô, aih ma ùh xài mangai ma lùi Chuaq Jesus aih kon Boc Plình qmòh?

6 Chuaq Jesus aih Mangai ma khoe yŏc diac xam mahim đòeq hu trùh, ùh xài toq xi diac hi hêq, mahaq xam diac xam mahim. 7 Yiang Hadròeh khoe panhìn qmang aih, majah qmang aih Yiang Hadròeh aih raq bàu joq qnàng. 8 Majah qmang aih, i piq kan panhìn qmang kô: Yiang Hadròeh, diac, èh xam mahim; piq aih broq mòeq. 9 Tàng bèn jah kan panhìn enh kon mangai mahaq kan panhìn da Boc Plình aih yeo haqnhèq hòm; majah qmang aih Haq panhìn dèh Kon haq. 10 Cabô lùi Kon da Boc Plình, haq i kan panhìn aih ta chac rađeh, mangai leq ma ùh lùi Boc Plình, aih haq doe Boc Plình loq amòng, majah qmang aih haq ùh lùi bàu Boc Plình ma khoe panhìn deh Kon. 11 Kan panhìn rameh: Boc Plình khoe am kan rìh halình mòeq đòe ka bèn, kan rìh aih oe enh dalam Kon haq. 12 Cabô i Kon, aih haq i kan rìh, cabô ma ùh i ka Kon Boc Plình, haq aih ùh i ka kan rìh. 13 Au achìh ƀài bàu kô đòeq pì kon aih ƀài mangai ma lùi yiniq Kon da Boc Plình loq đeh i kan rìh halình mòeq đòe.

14 Kô yiniq ma broq ka bèn cajap manoh đòeq hu thia haten ka Boc Plình: Tàng bèn waiq khàn tiaq manoh haq enh, aih yac ka bèn bòch cleq dua haq tamàng bèn. 15 Tàng bèn loq haq tamàng bèn yac ka bèn bòch cleq, aih bèn loq đeh khoe jah yiniq bèn ma bòch haq.

16 Tàng bèn hnoq oh daq broq yiniq lui, mahaq qnhòq troq ka cahìt, aih drah waiq khàn beq, aih èh Boc Plình am wì rìh, aih am ka ƀài mangai ma broq yiniq lui mahaq qnhòq troq ka cachìt. I diq yiniq lui ma troq ka cachìt, au ùh i thê pì waiq khàn ka yiniq lui qmang aih. 17 Rìm kan ùh taq atoq aih dìq yiniq lui; mahaq i yiniq lui qnhòq hìaq troq ka cachìt.

18 Bèn loq mangai leq ha-uang enh Boc Plình aih èh ùh hìaq broq yiniq lui; mahaq mangai ma ha-uang loh enh Boc Plình ep wèq cla rađeh, kiac dù ùh habo cleq ka haq jah. 19 Bèn loq đeh kô aih kon qyoh da Boc Plình, wì phù cròng ta crŏng taneh dìq oe enh qneq ka cwìang da kiac dù. 20 Bèn loq Kon Boc Plình khoe trùh, haq am ka bèn kan loq đòeq bèn canau ka haq aih Boc plình joq qnàng, oe enh dalam Kon da haq aih la Chuaq Jesus Christ. Haq aih raq Boc Plình joq qnàng xam kan rìh halình mòeq đòe. 21 Yôiq wì kon qyoh da au, wèq rađeh ma khoe ka radua qmù oq.